Read West Ambae 2 KORIN 3 Bible Online

2 KORIN 3 - West Ambae bible

2 KORIN 3

¹Hikani nu domi kwara tulu rongo hokinia hika kwara keu tuku kwaha domidomikami taliku lolo nakomiu. Vae hete kwehi. A tangaloi tuaki rau kwali a leta nona rabuluimiu kwara rana matangwasarakinira lakwakamu huri tulu he kikilaira tea. Vunu lolona ramo lakao tikamu rau kwali na nomiu leta kwara vae i rabuluimiu rana kikilaira. ?Vae tulu vai kwara tulu ne vaikami kwehi? !Hi tulu reraka!

²I kamu vohoki, i kamu hoki na nomai leta lakwakamu, u ulibibiana lolo domimai, vae a tangaloi doluaki rau taga lavia, rau valukia.

³Vunu u matangwasara vake kwara i Kraes* sibona aia u uli na leta hi, vae mo tirakinia tilo kabamai kwara kena betekinia. A leta hi i Kraes he ulia te kina igi, vake he kikiria te lo vatu lalakua. Vae u boloki kina Tanungwe noi God Tatoka mo ulia tilolo domidomi na tangaloi.

⁴Keu viti lai kwehini huri keu hariki lui Kraes, vae kemo hauhuri mo madi lui God.

⁵Maikami a kinau tikei kwara ne vaikami kena viti lai kwara, “A boloki hika a nomai boloki.” Vae a kinau hinea rau vaikami kemo huira huri boloki rau vanamai ti God kehekeheki.

⁶Aia u vaikami kemo vai lai a bolokiana na nona leo harikiana karagwa. A leo harikiana hini aia hete kinau na tangwata hinea mo uliana, vae aia a kinau na Tanungwe noi God. A tangwata hi ramo ulia, u vai matei na tangaloi, vae a Tanungwe noi God aia u bete ahiana lakwa na tangaloi.

⁷Lolona i Mosis mo lavi na Tangwata*, i God u kikiria lo vatu lalakua kairua. Vae lo taro hi a hahaviada noi God mo vavarama tilo nako i Mosis, a nakona mo kwaka. Vae vaki takuni a vavarama hi mo titikeiki tina nakona. Vae tomua a vavarama hi u huira haburu, a gwaloana noi Isrel* rahe taga lai te tilo nakona kwara ne tuai. A Tangwata hini u vanamai mana hahaviada noi God, vae a bolokiana na Tangwata aia kwara ne vai mate kehekeheki.

⁸Aia a hava na hahaviada lakua noi God mo kwaka vakahaki na bolokiana savia hinea a Tanungwe Kokona mo toko vaira.

⁹A bolokiana nona Tangwata aia u lavi na arekiana noi God tilo mateana tiluda, aia vae a hahaviada lakua noi God u kwaka vakahakinia. Vae a bolokiana nona Tanungwe hinea i God u tuku viti kwara u domidomi koro lakwa na tangaloi, vae a hahaviada lakua noi God u kwaka vakahakinia siletia hi mo kwaka vakahaki na Tangwata.

¹⁰Tana viti lai kwehi kwara i God u vosangi na nona huirana lakua hika kwahale u haburu sileti na huirana na nona hahaviada hini mo vosangia tomuaki hinea u kwaka, vae hika u rovo u tikei ba.

¹¹Kareaki a bolokiana hi nona Tangwata hinea u eno he tuai tea, vae i God u vosangi na nona huirana kina nona hahaviada lakua luna. Vae a bolokiana hini nona Tanungwe hinea u eno vaki tuai, aia u vosangi na karekarea na nona huirana u lakua karakara luna.

¹²Keu huira, kehe mataku tea, huri keu tau na nomai domidomi u madi lo bolokiana hinea a Tanungwe mo toko vai.

¹³I kami hete hoki Mosis hinea mo tau na lugwa koro na nakona kwara a gwaloana noi Isrel rana hatu tagai na hahaviada hinea lo nakona mo hivo mo toko tikei.

¹⁴Kareaki, tuai a gwaloana noi Isrel a domiga u vono kina hala na bolokiana hini tuai. Mo vano vaki na hika lolona ramo valuki na leo lo Leo Harikiana Tuai, a kinau eia u tuku tu koro na domidomiga hoki na lugwa hinea tuai mo kakavu koro na nako i Mosis. Vae diko rau hariki lui Kraes*, aia kehekeheki neri lavi na lugwa hini letiu tina domiga.

¹⁵Vae vaki na hika lo hava taro te hinea ramo valuki na Tangwata noi Mosis a lugwa hi u kakavu koro na domiga radu nga hoki na lugwa hini mo kakavu koro na nako i Mosis.

¹⁶Vae diko a tangaloi ne bohi vaki mana Hugwe i God, a lugwa hi vae ne laiana letiu. [3]

¹⁷Hikani a leo hi “a Hugwe i God” u viti na Tanungwe Kokona. Vae diko a Tanungwe na noda Hugwe* u toka mana tangaloi u teri na kaigwaruga tiura.

¹⁸I kita vunu, a hahaviada noi God u vavarama tiluda, vae a tangaloi rau tagai na nunu i God lo nakoda hinea a lugwa he kakavu koroa tea. A hahaviada hi u vanamai tina Hugwe hinea a Tanungwe Kokona, vae u vaikita tamo mulemai hokinia kina hahaviada hinea mo toko lakua vakevake.