Read West Ambae 2 KORIN 4 Bible Online

2 KORIN 4 - West Ambae bible

2 KORIN 4

¹A bolokiana hi kemo hagovia i God u betea lakwakami kwara kena vai, huri u hakavikami. Vae huri hi a domidomimai rahe sovi tea.

²A hala na doridori tavuniki mana maemaeana keu tau letiu savira ba. Vake kehe bohibohi te lo hala na kurakura, vunu kehe bohiki na leo te noi God kwara ne dolua, vae keu tuku viti huri na vitikareaki na ngwasara. Keu tu koro na nako i God keu vai kwara kena vosangikami lakwa na tangaloi kwara vae rana rongo karea kikami lolo domiga.

³Vae diko a Roro Karea hikani kemo heretuvakinia u eno tavuniki, u eno tavuniki kehekeheki lakwara hinea vae rana sala.

⁴Rahe hauhuri tea huri i Setano*, a tangaloi hati hinea u hugwe koro na varamana hika, aia u kwiribibi na domiga lolo dodoki. U vai korora kwara rana hatu tagai na vavarama hi mo kwaka tiluga. A vavarama hi u vanamai tina Roro Karea huri na huirana lakua noi Kraes*, vae i Kraes aia a nunu i God bakotoki.

⁵Kehe heretuvakikami tea, keu heretuvaki i Jisas Kraes kwara aia a noda Hugwe*, vae i kami a nomiu tangaloi boloki huri i Kraes.

⁶I God hinea u viti ba kwara, “Lolo dodoki a vavarama u kwaka tivarea,” aia hi vohoki u vai na nona leleha u vavarama tivarea mo kwaka tilumai. A nona vavarama hi u vaikami kemo kikilai na huirana lakua lengalenga noi God, aia hi kemo tagaia u kwaka lo nako i Kraes.

⁷I kami hinea keu hagovi na kinau karekarea na Tanungwe noi God, i kami hoki na laha tano kwara ne matangwasara kwara a huirana lakua lengalenga hi, aia a noi God, hetea nomai.

⁸Vakarusa keu rongo hati, vae a domimai he sovi te vohoki. Taroki tuaki keu domi kairua, vae a domimai he sala te vohoki.

⁹A nomai tavaluivuro u rusa, rau tuku vai bulakikikami, vae a nomai buluana he tikei tea. Lo taroki tuaki rau kwohi haburukikami, vae kehe mate te halaradu.

¹⁰Tigwaravu keu kwali na kaimatai na mateana noi Jisas lo tarabehimai kwara tigwaravu a tangaloi savia rana tagai na nona mauriana vake lo tarabehimai.

¹¹Tigwaravu lo mamaurianamai i kami lo hala na mateana huri Jisas kwara a tangaloi rana tagai na nona mauriana lo tarabehimai, a tarabehi hinea vae rana mate.

¹²A domiana na kinau vano hi kwara a nona mateana u tuku boloki lumai, vae a nona mauriana u tuku boloki lumiu.

¹³A Uliuli* Kokona u viti kwara, “Nu hauhuri vae huri hi nomo kwaha.” Vae i kami vake a domidomimai aia kwehi nga lo nomai hauhuriana. I kami vake keu hauhuri, vae huri hi kemo kwaha.

¹⁴Keu kikilai kwara i God hinea mo rakati na Hugwe* i Jisas tina mateana, ne rakatikami vake haragoki mai Jisas, ne lavikami haragoki maikamu vaki maia, tana tu koro na nakona.

¹⁵A kinau vano hi savira rana hago maikamu. Lo hala hokinia hi tigwaravu i God u tuku hago mana tangaloi rusa kina nona domi tabetabe lakua, vunu rana lagwakinia vakevake, vae rana tabe hakeki na hinana.

¹⁶Vae huri na kinau aira vano hi, lo nomai rongoana hati a domimai he sovi tea. Venaha diko a tarabehimai rau tuku ngwarasea, vae a tanungwemai u tuku karagwa tigwaravu vataha na rani.

¹⁷A rongoana hati vano hi ramo kihikami, rau kwaririgi vohoki, vake ranahe eno lai tea kwara ne tuai. Vae vaki takuni ne karea haburu lakwakami, vunu vake ne vaikami kena rarai kwara kena bulu lo mauriana noi God aia hinea nehe rovo lai tea.

¹⁸A domimai he tu tea lo kinau hinea tau tagaira kina matada, vae lo kinau hinea tahe tagaira tea. A havakinau hinea tau tagaira kina matada, rau eno he tuai tea, vae a havakinau hinea tahe tagaira tea, rau eno vaki tuai.