Read West Ambae 2 KORIN 6 Bible Online

2 KORIN 6 - West Ambae bible

2 KORIN 6

¹Kena viti na leo hika lakwakamu, huri i kami keu hariki lui God kwara kena boloki maia. I God u hago maikamu kina nona domi tabetabe lakua. Tulu hatu vaia mo hago maikamu haro vuroki.

²Tulu rongo na leo noi God hinea mo viti “Lolona a taro mo maravuti kwara na hago maiko, nu rongohuri na dilaomu. A rani mo maravuti kwara na vakahikinigo, vae nu hago maiko.” !Tulu rongo! Hikani a taro kwara i God ne hago maikamu. Hika karagwa a rani lakwakamu kwara i God ne vakahikikamu.

³I kami kehe lengaia tea kwara te tangaloi ne hagwe na hatiki lo nomai bolokiana, vae huri hi keu huiratakinia, kwara kena hatu vai na kinau hinea vae a tangaloi dolua ramai sovi luna.

⁴Vae lo kinau savia hinea kemo vai, keu vosangi kwara i kami a tangaloi boloki noi God. A rongoana hati mo kihikami, keu hagwe na taro madi, keu rongo hati, vae a domimai rau bua rahe sovi tea.

⁵Lo vanua tuaki a tangaloi rau kwohikami, lo vanua tuaki rau taukami lolo ingwa na gwarugwaru, lo vanua tuaki rau tu korokorokami kwara rana livutikami. Keu boloki vae u haburu vohoki, vae lo taroki tuaki a taro tikei kwara kena maturu diko kena kanikani.

⁶Lo bohianamai keu vosangi kwara i kami a tangaloi boloki noi God. A domidomimai rau ngwasara, keu kikikila, a domimai rau bua, keu vai tabetabeki na tangaloi. A Tanungwe Kokona u toka lumai, vae keu lagwa mana tangaloi kareaki.

⁷Keu viti na leo na vitikareaki, vake a huirana noi God u eno lumai. Keu huri na bakotoana kehekeheki, vae aia u kwareki a nomai bue na vuro mana nomai kaititiba vake.

⁸Lo vanua tuaki rau domi mavakikami, vunu lo vanua tuaki rau vaikami keu maemae. Lo vanua tuaki rau kwahakwaha hati vovohikami, vunu lo vanua tuaki rau kalukikami. Lo vanua tuaki rau viti kwara keu kurakura, vae kehe kurakura tea, keu viti a leo na vitikareaki.

⁹A tangaloi rusa rau vai hokinia kwara rahe kikilaikami tea, vae doluaki na tangaloi rau kikilaikami. Rau viti vake kwara keu mate ba, vae tulu kikilai keu ahi radu nga. A tangaloi rusa rau sangunikami, vae rahe kwohi mateikami tea.

¹⁰A rongoana hati u kihikami, vae tigwaravu u havutikami. Keu kakaravika, vae keu vai na tangaloi rusa rau mulemai ki tangaloi hugwe. A nomai kinau tikei vohoki, vae kareaki a kinau savira a nomai.

¹¹Rabela karea lo gwatuivanua Korin, keu viti bakotoki vohoki lakwakamu, keu vosangi na nomai lagwaana lakwakamu, vae keu matangwasaraki na domidomimai savia lakwakamu.

¹²I kami kehe tavuniki na domidomimai te kikamu, vae i kamu tulu he lagwa te maikami, tulu tavuniki na domidomimiu kikami.

¹³Nu kwaha maikamu hokinia kwara i kamu i raranatugu. Tulu ne matangwasaraki na domidomimiu lakwakami hokinia hinea i kami kemo matangwasaraki na domidomimai lakwakamu. Tulu ne vosangi na nomiu lagwaana lakwakami, tulu ne viti bakotoki savi na nomiu domidomi lakwakami.

¹⁴Tulu hatu bulubulu haragoki lo boloki mana tangaloi hinea rahe hauhuri tea, tulu mo bulu harago hokinia kwara aira rau taritarisa maikamu. Vae a boloki nehe tu lai te kwehi. A doridori karea mana doridori hati vae raru nehe bulu lai tea, hokinia a leleha mana dodoki raru nehe bulu lai tea katukwale.

¹⁵I Kraes* mai Setano* raru nehe domidomi katukwale tea. Vunu vake a tangaloi hinea u hauhuri mana tangaloi hinea he hauhuri tea raru nehe bulu lai tea lo domi katukwale.

¹⁶A Ingwa Kokona noi God, tulu nehe kwaheki lavi na tanotano tea lolona, kwara ne eno huri na takaro vuroki maira. Vae i kita hoki na Ingwa Kokona noi God Tatoka. I God aia u viti kwara, “Na vai na tatagu mana bulagu tangaloi, na toka lo livukaga. Na kwareki a noga God, vunu aira rana kwareki a bulagu tangaloi.”

¹⁷Vae hokinia a Hugwe i God mo viti taliku kwara, “Tulu vano tiura, tulu hugu kahekamu, aira rana hugu kahera. Tulu hatu vano tulu mo bulu lo kinau hinea rahe ngwasara tea, vunu i nau ne havutiau kwara na lavikamu.

¹⁸I nau nari kwareki Tamamiu, vunu i kamu tulu neri kwareki raranatugu, a raranatu ngwera mana raranatu vavine. I nau a Hugwe i God, nu hago huirana lo kinau savia vae a leogu aia hi.”