Read West Ambae 2 KORIN 9 Bible Online

2 KORIN 9 - West Ambae bible

2 KORIN 9

¹I nau nu kikilai vunu ba kwara i kamu tulu lagwa huri kwara tulu ne bulu katukwale, tulu ne bete mane* kwara tulu ne hago mana tangaloi noi God, aira hinea rau rongo hati. Vae huri hi, nahe lengaia te kwara na uli na leta hi lakwakamu huri na kinau hi. I nau nu kwaha domidomiau ba maikamu lo nako na ngwera Masetonia. Nu viti hokinia hi kwara, “I rabelada lolo vanua Gris, rau rarai vunu ba lo hukao nakwaiha huri kwara rana hago, vae rau hugu radu nga.” Vae a doridorimiu hi tulu mo lagwa kwara tulu ne hago, u kiluki na tangaloi u rusa tiura.

³Vae hikani nu hora i rabelada hi kaitolu rana venatu vaki maikamu, huri kwara vae a nomai leo hinea kemo kwaha domidomikami maikamu lo kinau hikani, ne hatu mulemai kina leo vuroki. Vae aira hi kaitolu rana venatu, tulu ne tau rarai savi na nomiu kinau aira hi kwara tulu ne hago mana tangaloi kinira, hokinia nomo viti lakwara kwara tulu ne vai.

⁴Diko tulu he rarai tea, vae na lavi na ngwera Masetonia rana huriau rana hagwekamu kwara tulu he rarai tea, vae i kami kena maemae haburu huri keu hauhuri haburu lumiu ba. Vae i kamu tulu ne maemae siletikami.

⁵Vae huri hi, nu domi kwara na hora i rabelada kaitolu hi rana venatu tomua, i kami kenari hurihuri. Aira hi kaitolu rana hago maikamu, tulu ne vai rarai na hilehile hi tulu mo vitia kwara tulu ne betekia, ne eno rarai taraiau, vae na venatu u saro rarai ba. Hikani ne vosangi kwara tulu bete lo lagwaana, a tangaloi rahe bibirikamu te kwara tulu ne bete.

⁶A lolomiu ne hatu bongi kina kinau hika. A tangaloi hinea u rivu kelekele lo bulana agoago*, vae aia ne lai a kwaiki kelekele vohoki. Vae a tangaloi hinea u rivu u rusa, vae aia ne lai kwaiki u rusa vohoki.

⁷Vae vatavatahakikamu tulu ne bete hokinia hinea tulu domiki. Tulu hatu bete hokinia hi tulu he lagwa te luna, diko hokinia tulu rongo kwara rau bibirikamu kinia, huri i God u lagwa mana tangaloi hinea u bete lo domi lagwalagwa.

⁸I God u vai lai kwara ne bete lakwakamu siletia hini tulu mo lengaia, vae hokinia hi tigwaravu tulu ne lai savi na kinau hinea tulu gwanugwanu luga, vae ne bete siletia hi, kwara tulu ne bete huri na boloki karekarea doluaki.

⁹Hokinia a Uliuli* Kokona u viti kwara, “U bete u lakua haburu lakwa na kakaravi, a nona vaivai karea u eno vaki tuai.”

¹⁰I God u bete na biu na rivurivu lakwa na tangaloi hinea rau vai agoago, vunu u bete hinakaki lakwa na tangaloi kwara rana kani. Aia vae ne bete na biu lakwakamu kwara tulu ne rivukia, vae aia ne vai na rivurivu vano hi rana mauri. Vae hokinia tulu ne lai hinaka lakua tina nomiu boloboloki karea hi tulu mo vai kina domi lagwalagwa.

¹¹Vae hokinia hi a nomiu kinau ne rusa, vunu tigwaravu tulu ne bete lai a hilehile ne lakua vohoki lakwa na tangaloi. Vae huri na nomai bolokiana, a tangaloi rusa rana lai noga lagwaana lakwai God huri na nomiu hilehile vano hi.

¹²A bolokiana karea hi tulu tuku vai, he hago te mana tangaloi noi God kehekeheki lo kinau hinea rau gwanugwanu luga, vae vake, a tangaloi rusa rana rongo karea luna, rana lai noga lagwaana lakwai God huri.

¹³Tulu tuku vai na bolokiana karea hi, tulu vosangi na bohibohianamiu lakwa na tangaloi rusa. Vae a tangaloi vano hi rana tabe hakeki na hina i God huri tulu mo matangwasaraki na Roro Karea noi Jisas Kraes*, tulu mo kwiribibia mo madi. Vunu rana tabe hakeki na hina i God huri tulu lagwa tulu mo kwaheki na nomiu kinau lakwara, vunu vake lakwa na tangaloi ratuaki.

¹⁴Vae a tangaloi vano hi rana tiutangaroa hurikamu mana lagwaana, huri rau taga kwara i God u hago maikamu haburu kina nona domi tabetabe lakua.

¹⁵I kita vunu ta lagwaki God huri na nona hilehile hinea u karea haburu, u lakua lengalenga, tanahe viti lavia tea.