Read West Ambae GALESIA 2 Bible Online

GALESIA 2 - West Ambae bible

GALESIA 2

¹A hukao hangavulu dongwana kaivati koro, vunu keru mo galo hake taliku mai Banabas vaki Serusalem. Nomo lavi Taetas mo hurikamirua vake.

²Nu vano huri i God u vosangiau kwara na vano. Kemo vileki tabulutaki mana kaitomuaki na kwarelua*, i kami kahekami, nomo viti huri lakwara huri na Roro Karea hinea i nau nomo heretuvakinia lakwa na tangaloi tavalavarea tina gwaloana noi Isrel*. Nu vai kwehi huri nohe lengaia tea kwara a nogu bolokiana hinea nu vaira ba, diko aira hi nu tuku vaira radu nga, ramai mulemai kina kinau vuroki.

³I buluigu i Taetas aia a ngwera Gris, vae rahe bibiria tea kwara ne lai a kaimatai* lo siosio.

⁴Kwara vae a domiki nehe maraka tea, vae huri na tangaloi aira hi ramo kura kwara aira a tangaloi noi Jisas, ramo soro tavuniki tilo nomai bulubulu hika, ramo lengaia kwara ne lai a kaimatai lo siosio. A tangaloi aira hi ramo soro maikami vae a tangaloi rahe taga kikilakinira tea. Ramo toko taga-balubaluki kwara rana kikilai kwara i Jisas Kraes* u vai kworohokikami kemo materi, huri rau lengaia kwara rana gwarukami taliku kina doridoriga.

⁵Vae kehe tirakikami te vohoki kwara kena huri na doridoriga, huri keu lengaia kwara kena kwiribibi na Roro Karea hurikamu kwara tulu ne lai bakotoki na vitikareaki luna.

⁶A tangaloi ratuaki takwa-hi aira hoki na kaitomuaki. Nu viti kwehi huri nohe domi huri tea kwara ramo kwareki a kaitomuaki diko aira te hava tangaloi. I God he taga viviloki te tangaloi lo tarabehiga. Vae a kaitomuaki vano hi rahe viti te kinau vake lakweau kwara na heretuvakinia.

⁷Rau taga kwara i God u hile na bolokiana lakweau kwara na heretuvaki na Roro Karea lakwa na tangaloi tavalavarea tina gwaloana noi Isrel, u taritarisa hokinia hi mo bete na bolokiana lakwai Pita kwara ne heretuvaki na Roro Karea lakwa na gwaloana noi Isrel.

⁸I God u rivukiau kina nona huirana kwara na kwareki a kaihora* kokona nona tangaloi tavalavarea tina gwaloana noi Isrel, hokinia mo rivuki Pita kwara ne kwareki a kaihora kokona nona gwaloana noi Isrel.

⁹I Semis, i Pita, i Sione aira hoki na kaitomuaki lalakua, rau kikilai kwara i God u bete na bolokiana hika lakweau, vae ramo dule kabamaru mai Banabas, ramo vosangi kwara i kamirua keru taritarisa maira. Kemo daraki tabulutaki kwara i kamirua keru ne boloki mana tangaloi tavalavarea tina gwaloana noi Isrel, aira rana boloki mana gwaloana noi Isrel.

¹⁰A kinau katukwale ramo viti huri, kwara vae kena domihagwe na kakaravi maira hinea lo noga bulubulu. A domidomi aia hi i nau nu lengaia haburu vake kwara na vai hokinia.

¹¹Vae i Pita mo vanamai vaki lo gwatuivanua Antiok nomo kwaha luna taga na nakona, huri u matangwasara kwara aia u vai vakasile.

¹²Tomua, i Pita u tuku kanikani harago mana tangaloi tavalavarea tina gwaloana noi Isrel*. Vae vaki takuni i Semis mo horai i rabuluina vanamai vaki maikami. Lolona a tangaloi vano hi ramo maravuti, i Pita mo susuraki tiura, huri u mataku kinira hinea rau lengaia kwara a tangaloi tavalavarea tina gwaloana noi Isrel rana lai a kaimatai* lo siosio.

¹³Vunu a ratua, aira hi a gwaloana noi Isrel, ramo huria vake lo doridorina hi lo bohiana kurakura. Vunu i Banabas vake a gwatuna mo reraka kinira mo hurira lo doridori hi vake.

¹⁴Vae nomo tagaira rau bohi he taritarisa tea lo hala na Roro Karea bakotoki, i nau nomo viti lakwai Pita koro na nakoga aira vunu, nu viti “I nigo a gwaloana noi Isrel, vae ku bohibohi hoki na tangaloi tavalavarea tina gwaloana noi Isrel, kohe bohi te hoki na gwaloana noi Isrel. ?Vae kworoho komo vai kwara kona bibiri na tangaloi tavalavarea tina gwaloana noi Isrel kwara rana bohibohi hoki na gwaloana noi Isrel?”

¹⁵Kareaki i kami a gwaloana noi Isrel*. I kami hete a tangaloi tavalavarea hinea a gwaloana noi Isrel rau tuku vitira kwara aira a tangaloi vaivai hati.

¹⁶Vae i kami keu kikilai ba kwara a tangaloi hinea rau kwiribibi na Tangwata* nona gwaloana noi Isrel, vae ranahe bakoto tea kinia vohoki lo nako i God. A tangaloi hinea u hauhuri lui Jisas Kraes, aia kehekeheki i God ne viti kwara aia u bakoto. I kami a gwaloana noi Isrel, vae i kami vake keu hauhuri lui Jisas Kraes* kwara kena bakoto lo nako i God. Keu kwiribibi na Tangwata, vae kehe bakoto te kinia, vae keu bakoto huri keu hauhuri lui Kraes kehekeheki. Aia hokinia hi ramo uli lo Uliuli* Kokona, mo viti “A tangaloi hinea rau kwiribibi na Tangwata, vae hete katukwale tiura kwara u bakoto kinia lo nako i God.”

¹⁷I kami keu hariki lui Kraes kwara kena bakoto lo nako i God. ?Vae diko a tangaloi rau domi kwara i kami a tangaloi vaivai hati hoki na tangaloi tavalavarea tina gwaloana noi Isrel, vae kworohokinia? ?I Kraes u vaikami keu mulemai kina tangaloi vaivai hati? !Hete vohoki!

¹⁸Diko nate tabe taliku a kinau hinea nu vai surisurira ba, hi u vosangi kwara nu galo lo Tangwata.

¹⁹Vae hika lo hala na Tangwata nu mate ba. A Tangwata u vai mateiau. Nu mate ba kina Tangwata huri kwara vae nana toka, nana vai a havakinau i God u lagwa luna. Aia hokinia rau duruau tilo kaibetu mai Kraes nu mate haragoki maia.

²⁰Vae hika hete i nau kwara nu toka, vae i Kraes aia u toka lugu. A tokaana hi nu toka luna hika, nu toka luna huri nu hauhuri lui Natu i God hinea u lagwa maiau mo tiraki na mamaurianana mo mate huriau.

²¹Nohe domi bulakiki na domi tabetabe lakua noi God tea. Kwara vae diko a tangaloi ne bakoto lo nako i God lalahi na Tangwata, i Kraes u mate haro vurokinia vohoki.