Read West Ambae GALESIA 3 Bible Online

GALESIA 3 - West Ambae bible

GALESIA 3

¹I kamu a ngwera Galesia tulu reraka vohoki. I kami keu matangwasaraki na Roro Karea lakwakamu hokinia kwara tulu tagai Jisas Kraes* kareaki kina matamiu mo mate lo kaibetu. ?Ihe u vaikamu kina kinau hati tulu mo reraka hokinia hi?

²Na viti na leo katukwale lakwakamu tulu ne darakinia lakweau. ?Tulu lavi na Tanungwe noi God tomuaki huri tulu mo huri na Tangwata*, diko tulu lavia huri tulu mo rongo na Roro Karea vunu tulu mo hauhuri luna?

³?Kworohokinia tulu mo reraka hokinia hi? Tulu tinakaki kina Tanungwe noi God. ?Vunu hika tulu lengaia kwara tulu ne gweregwerekinia kina nomiu huirana sibomiu? !Hete vohoki! Tulu nehe vai lai tea.

⁴?Kworohokinia mana kinau rusa ramo vanamai vovohi na mamaurianamiu? ?Aira a kinau vuroki? ?Tulu he huhui te luga? Nahe domi te kwehi.

⁵?I God u bete na nona Tanungwe lakwakamu, mo vai na vaisea lo livukamiu, huri tulu mo huri na Tangwata, diko huri tulu mo rongo na Roro Karea vunu tulu mo hauhuri luna?

⁶Tulu domidomi lui Evraham. A Uliuli* Kokona u viti kwara, “U hauhuri lui God, vae huri mo hauhuri hokinia hi, i God mo tagaia kwara u bakoto lo nakona.”

⁷Vae i kamu tulu ne kikilai kwara a tangaloi hinea rau hauhuri aira rau gwalo vanamai lui Evraham bakotoki.

⁸A Uliuli Kokona u viti terekaki kwara i God ne vai na tangaloi tavalavarea tina gwaloana noi Isrel* rana bakoto lo nakona kina hauhuriana. Hokinia a Uliuli Kokona u viti terekaki na Roro Karea lakwai Evraham tomuaki, mo viti “Lalahiko i God ne vai tabetabeki na tangaloi doluaki na vanua lo varamana.”

⁹I Evraham u hauhuri lui God, vae i God mo vai tabetabekinia. Hikani savi na tangaloi hinea rau hauhuri lui God, i God ne vai tabetabekinira hokinia mo vai tabetabeki Evraham.

¹⁰A tangaroa hati u eno luga hinea rau domi kwara rana ahi huri rau huri na Tangwata*, vae rana mate, huri a Uliuli Kokona u viti kwara, “A tangaloi hinea rahe huri savi na leo te tigwaravu hinea rau uliana lo buku* na Tangwata, a tangaroa hati u eno luga, vae rana mate.”

¹¹Hikani u matangwasara kwara hete tangaloi kwara ne bakoto lo nako i God kina Tangwata, huri a Uliuli Kokona u viti kwara, “A tangaloi hinea u mulemai kina tangaloi bakoto lo nako i God huri u hauhuri, vae aia ne ahi.”

¹²Vae a tutu na Tangwata aia hete hauhuriana. U dolua tiua, huri a Uliuli Kokona u viti kwara, “A tangaloi hinea u vai savi na kinau hinea a Tangwata mo viti, vae ne ahi kinia.”

¹³A tangaroa hati u eno luda kwara tana mate kinia huri tau vakasile lo Tangwata. Vae i Kraes* u kasatukuhikita tiua ba, huri a tangaroa hati hi kwara ne va eno luda, vae va eno luna. A Uliuli Kokona u viti kwara, “A tangaloi hinea rau duletakinia lo vikai, hi a tangaroa hati noi God u eno luna.”

¹⁴Vae hika a tangaloi tavalavarea tina gwaloana noi Isrel i God ne vai tabetabekinira lalahi Jisas Kraes hokinia mo vai tabetabeki Evraham tuai. I kita tau hauhuri lui Kraes, vae huri hi tana lai lavi na Tanungwe hinea i God u tulikinia ba kwara ne bete lakwakita.

¹⁵Rabela. Na dumudumu lakwakamu lo kinau hinea tau tuku vai tigwaravu. Diko te tangaloi kairua raru hariki na leo na kinau tea, vunu raru masinge luna i rarua vunu, hete kwara te tangaloi ne viti magaraki na leoki diko ne obo na leo te tiluna vake.

¹⁶Vae lo hala hokinia hi i God mo vai na tulikileo lakwai Evraham mana nona gwaloana. A leo hi, a gwaloana, he viti tea huri na nona gwaloana savia, vae u viti huri na tangaloi katukwale tina nona gwaloana, aia hi i Kraes.

¹⁷Na matangwasaraki na leogu hokinia hika. I God mo vai na leo harikiana mai Evraham tomua halaradu, mo tuliki lakwae kwara ne kwiribibi na nona leo. Vunu a hukao vidolua vakaivati eviki ngavu kaitolu [1] koro, i God mo tau na Tangwata. Vae a Tangwata hi nehe magaraki lavi na leo harikiana noi God tea, vake nehe tau na nona tulikileo te letiu.

¹⁸Kwara vae diko a hilehile noi God u tu lo Tangwata, vunu ne matangwasara kwara a hilehile hi he tu te lo tulikileo noi God. Hi kwara vae a tulikileo hi ne rovo. Vae hetea, hokinia i God u betea lakwai Evraham huri u tuliki terekakinia lakwae.

¹⁹Karea. ?Vae diko kwehi, i God u bete na Tangwata* huri aha? U bete na Tangwata kwara ne hoke na tulikileo kwara vae ne matangwasaraki na vaivai hati. Mo rivukia kwara ne tu tarisaki a tangaloi hi lo gwaloana lui Evraham ne maravuti, aia hi i God mo vai na tulikileo huria tuai. I God mo lalahi na kaihora tina taetae, mo bete na Tangwata hinea a leo harikiana tuai, lakwa na kaikao hinea i Mosis, kwara ne kwalia vanamai ne betea lakwa na tangaloi doluaki.

²⁰Vae hika i God u bete bakotoki na leo harikiana karagwa lakwakita lalahi i Kraes. A kaikao tikei, huri i Kraes aia hete a kaikao hoki i Mosis tuai. I Kraes aia i God, i rarua katukwale vohoki.

²¹?Vae kworohokinia? ?A Tangwata u vai vuro mana tulikileo noi God? Hete vohoki. Kwara vae diko i God u bete a Tangwata hinea ne hile lavi na ahiana lakwakita, kwara vae tana bakoto kina Tangwata hi.

²²Vae a Uliuli* Kokona u viti kwara i kita vunu tau hugu tavuti na huirana na vaivai hati. Huri hi, a hilehile hini i God mo tuliki lakwakita hinea tau hauhuri lui Jisas Kraes, ne betea lakwakita huri na noda hauhuriana kehekeheki.

²³Tomua ba, vunu vari a hauhuriana mo vanamai, a Tangwata* u gwarubibikami hokinia keu hugu lolo ingwa na gwarugwaru. Keu hugu kwehi vae rovonaki lo taro hi i God mo vosangi na hala na hauhuriana.

²⁴A Tangwata aia hoki na tangaloi tagahuri, u tagahurikami mo turukikami, vae tarisaki lo taroki hinea i Kraes* mo maravuti, kwara vae kena toka ne bakoto lo nako i God lalahi na hauhuriana lui Kraes.

²⁵Vae hika a taro na hauhuriana u maravuti ba, a Tangwata hi nehe tagahurikami tea taliku.

²⁶I kamu doluaki i raranatu i God, huri tulu hauhuri lui Jisas Kraes.

²⁷I kamu hinea tulu lai bavtaes ba kwara tulu ne hariki lui Kraes, tulu lavi na doridori i Kraes, vae a tangaloi rana tagai na doridorina lumiu.

²⁸Hikani a kinau tikei kwara ne vaikamu tulu ne makwahe. Tulu he doludolua te tikamu kwara tuaki tikamu a gwaloana noi Isrel*, ratuaki a tangaloi tavalavarea, vake diko tuaki a tangaloi hinea rau boloki vuroki tavuti na masi, ratuaki a noga masi tikei, vunu vake diko tuaki a ngwera, ratuaki a ravavine. I kamu vunu tulu hariki lui Jisas Kraes, vae huri hi i kamu vunu a tangaloi katukwale.

²⁹Vae diko i kamu a tangaloi noi Kraes, vunu tulu kwareki a gwaloana lui Evraham, vae tulu ne lai savi na kinau hinea i God mo tuliki lakwa na gwaloana lui Evraham.