Read West Ambae GALESIA 6 Bible Online

GALESIA 6 - West Ambae bible

GALESIA 6

¹Rabela. Diko te katukwale tikamu u vai vakasile lo vaivai hati, i kamu hi tuaki tulu toka u karea lo Tanungwe noi God, tulu haharae kwara ne vano ne karea taliku. Tulu vai kina domi karea, vunu i kamu vake tulu tagahuri. Tulu ne kikilai kwara i kamu vunu hokinia, vae a sinasina ne mai sinakamu vake.

²Tulu hagohago maikamu lo nomiu rongoana hati. Tulu ne vai hokinia hi, vae tulu ne tabe na tangwata hinea i Kraes* mo viti. [2]

³Vae diko te tangaloi katukwale ne domi hakehakekinia kwara, “I nau hika i nau a tangaloi lakua,” vae aia hete tangaloi vitivitihuri, hokinia hi a domina u tuku sinae.

⁴Vatahaki na tangaloi katukwale kehe ne tagai na nona bolokiana sibona, kwara u karea diko hetea. Diko u karea ne domidomia luna, vae nehe domi tea kwara ne taga tilo bolokiana nona tangaloi dolua,

⁵huri a tangaloi aira vunu a noga hagohago eia kwara rana kwali siboga.

⁶A tangaloi hinea u lai a huhuiana radu nga lo leo noi Kraes, te nona hava vivilagoki karekarea te eia, ne hileki duviki lakwa na tangaloi hi mo toko huhuia.

⁷Tulu hatu sinakamu sibomiu. A tangaloi nehe sina lavi God tea. A tangaloi hinea u rivuki na hava rivurivu tea lolo bulana agoago*, vae ne makuriki vohokinia ne kania.

⁸Lo halaki hokinia hi a tangaloi hinea ne vai na doridori rau hati hinea a domina mo lengaia, a nona doridori hati hini, vae ne bete na hinakaki lakwae, aia hi a mateana. Vae diko ne vai na doridori karea hini a Tanungwe Kokona mo lengaia, a Tanungwe hi, vae ne bete na hinakaki lakwae, aia hi a ahiana vaki tuai.

⁹Vae i kita tana hatu keokeo lo noda bolokiana karea. Diko nehe ngwahikita tea, vae lo taroki bakotoki tanari lavi na kwaiki tina noda bolokiana karea.

¹⁰Vae huri hi, tigwaravu diko a taro ne eia lakwakita, tana vaivai karea lakwa na tangaloi savia, vae siletia karakara tana vai kwehi lakwara hinea i rabelada, huri i kita vunu tau hauhuri lui Kraes.

¹¹Tulu tagai na uliuli lalakua hika i nau sibogu nu ulia lakwakamu.

¹²Aira hi rau lengaia kwara rana bibirikamu kwara tulu ne lai a kaimatai* lo siosio, a tangaloi aira hi rau domidomira lo kinau rau vai lo tarabehi vohoki. Vae rau vai kwehi kehekeheki kwara a tangaloi ranahe vai bulakikinira tea huri ramo toko heretuvaki na mateana noi Kraes* lo kaibetu.

¹³A tangaloi aira hi rau lai a kaimatai lo siosio ba, rahe toko vai na kinau te hinea a Tangwata* mo viti. Vae rau lengaia kwara tulu ne lai a kaimatai lo siosio, huri kwara vae rana kwaha domidomira huri na kaimatai hi lo tarabehimiu tulu mo lavia.

¹⁴Vae i nau sibogu, na kwaha domidomiau huri na kinau katukwale vohoki, aia hi a leo huri na mateana noi Jisas Kraes a noda Hugwe* hinea mo mate lo kaibetu. Kina mateana noi Kraes hi lo kaibetu i God u vai magaraki na huirana na doridori na varamana aira hi lugu, vake u vaiau nomo ahi tina doridori aira vano hi.

¹⁵Diko a tangaloi u lai a kaimatai lo siosio diko he lai tea aia a kinau vuroki. A kinau haburu aia hika kwara i God ne vaia ne mulemai kina tangaloi karagwa.

¹⁶Nu tiutangaroa hurira hini rau huri na domiana hika kwara a magemuana ne eno lolo domiga, vake kwara i God ne hakavira. Nu tiutangaroa kwehini vake huri na gwaloana noi Isrel* hinea i God mo mataira.

¹⁷A leogu rovonaki hika. Nahe lengaia tea kwara te tangaloi ne vai te rongohati lakweau taliku, huri a mataikagu lo tarabehigu u vosangi kwara i nau a tangaloi boloki noi Jisas.

¹⁸Rabela. A tangaroa karea hika lakwakamu. A domi tabetabe lakua nona noda Hugwe i Jisas Kraes ne eno maikamu doluaki lolo tanungwemiu. Amen*.