Read West Ambae EVESAS 2 Bible Online

EVESAS 2 - West Ambae bible

EVESAS 2

¹Tuai i kamu a tangaloi tavalavarea tina gwaloana noi Isrel*, aia hokinia kwara tulu mate huri tulu galo lo leo noi God, tulu mo vai na vaivai hati.

²Lo taroki hini tulu mo huri na hala na hatiki hinea lo varamana, tulu mo rongohuri Setano* hinea u hugwe koro na tanungwe hati savira laliki lo varamana. Aia hi a tanungwe hinea lo taro hika u tuku vai na nona bolokiana lo tangaloi hinea rahe rongohuri God tea.

³Vae tuai, i kami a gwaloana noi Isrel vake keu tuku vai na kinau hinea a domidomimai rau lengaia. Kemo toko huri na domidomimai kehekeheki, kemo vai na kinau hinea keu lagwa luga. Vae hokinia i kami keu taritarisa mana tangaloi ratuaki, vae u taritarisa kwara i kami vake kena rongo hati kina lologute noi God. I kita vunu a tangaloi na varamana hinea a tangaloi vaivai hati.

⁴Vae i God a nona hahakavi u lakua haburu, vake u lagwa maikita vohoki.

⁵I kita hokinia kwara tau mate ba huri tau galo lo leo noi God, vae lo taro hika vohoki i God mo harikikita lui Kraes* mo vaikita tamo ahi maia. U vakahikikamu kina nona domi tabetabe lakua.

⁶Vae huri mo harikikita lui Jisas Kraes mo rakatikita maia mo vaikita tamo hugu maia lo hagehagelena lolo taetae.

⁷I God mo vai hokinia hi kwara ne vosangi na nona domi tabetabe lakua lakwa na tangaloi savia vaki tuai. Lo nona lagwaana lakwakita hinea tau hariki lui Jisas Kraes, u vosangi na nona domi tabetabe lakua tivarea hinea u lakua lengalenga, tanahe dumu lavia tea.

⁸Kina domi tabetabe lakua hi noi God i kamu tulu mo ahi huri tulu hauhuri lui Kraes. Hete nomiu boloboloki sibomiu, vae aia a hilehile noi God lakwakamu, vae huri hi hete tangaloi kwara ne kwaha domidomia luna.

¹⁰I kita a kihikihi noi God hinea mo boloki luda. Mo harikikita lui Kraes, mo vaikita tamo mulemai ki tangaloi karagwa kwara tana vai lavi na boloboloki karekarea tigwaravu lo mamaurianada. Aira hi a boloboloki hinea u mataira ba tuai kwara tana vaira.

¹¹I kamu hi hinea tomua i kamu a tangaloi tavalavarea tina gwaloana noi Isrel*, a lolomiu ne hatu bongi kina kinau hika. Nu tuku kwahakwaha maikamu a tangaloi tavalavarea tina gwaloana noi Isrel hinea a gwaloana noi Isrel rau tuku kwahakwaha hati vovohikamu, rau tuku viti kwara “I kami keu lai a kaimatai* lo siosio vae i kamu hetea.” Vae a leoga hi u viti huri na kinau hinea a tangaloi rau vai lo tarabehiga vohoki.

¹²A lolomiu ne hatu bongi kwara lo taro hi tomua tulu vakahao ti Kraes*, i kamu a taureure, hete gwira na gwaloana noi Isrel. I kamu tulu he taritarisa te mana leo harikiana noi God, aira hi rau tu lo leo hinea mo tulikinira lakwa na bulana tangaloi tuai. Tulu mo toka lo varamana hika, vae tulu he kikilai na tulikileo noi God tea vohoki kwara te katukwale, kwara tulu ne tau na nomiu domidomi tiluna. Vunu vake tulu he kikilai i God te vohoki.

¹³Tomua tulu hugu vakahao tikami. Vae hikani, i Kraes a daina mo huki, mo mate, vae aia hi mo reveikamu tulu mo vanamai garagarani vaki maikami, huri tulu hariki lui Jisas Kraes.

¹⁴I Kraes sibona u lavi na magemuana vaki maikita, mo vai na gwaloana noi Isrel mana tangaloi tavalavarea ramo mulemai kina tangaloi katukwale. Aia kehekeheki mo kwali kwakati na titiba lakua hinea mo kwahekikita tamo tavatavalui vuro. U vaia kwehi kina tarabehina.

¹⁵U vai letiuki na Tangwata nona gwaloana noi Isrel mana noga korokoro mana vitivitiki ratuaki vake. I Kraes mo vai kwehi kwara i kita hinea a tangaloi gwatu kairua, vae taru ne hariki luna, taru ne mulemai ki tangaloi katukwale hinea a tangaloi karagwa vohoki. Lo hala hi mo vaikita mo tangwatahakikita.

¹⁶I Kraes mo mate lo kaibetu vae huri hi mo vai letiuki na doridorida hinea tamo toko tavatavalui vuro kikita. Vae huri mo mate lo kaibetu mo bulutakikita a tangaloi gwatu kairua, tamo mulemai kina tarabehi katukwale vohoki hinea a tarabehina, vae mo lavikita tamo bulu katukwale mai God.

¹⁷Hokinia i Kraes u vanamai mo heretuvaki na Roro Karea na magemuana lakwa na tangaloi savia, lakwakamu a tangaloi tavalavarea tina gwaloana noi Isrel hinea tuai tulu vakahao ti God, vake lakwakami a gwaloana noi Isrel hinea tuai keu garagarani maia.

¹⁸Lalahi Kraes, i kita savikita tamo vanamai lai vaki garagarani mana Tamaki kina Tanungwe Kokona hinea aia katukwale vohoki.

¹⁹Vae hokinia, tuai i kamu a tangaloi tavalavarea tina gwaloana noi Isrel, a taureure, a hala vanovano, vae hikani hetea. Hikani i kamu a gwira na tangaloi noi God, i kamu vake i raranatu i God.

²⁰I kamu hoki na beru na ingwa, vae a kaihora* kokona mana tangaloi* duruduruki aira hoki na ngwahukui-beru. Lolo ingwa hi i Jisas Kraes aia hoki na beruberu aulu,

²¹vae a beru vano hi savira rau hariki luna. Vae huri rau hariki luna, u kwiribibira rau tu madi, vae a ingwa hi u tuku hake u kwareki a ingwa noi God hinea u kokona, u ngwasara.

²²Tulu mo hariki lui Kraes vae i Kraes mo vaikamu vake tulu mo hariki mana tangaloi ratuaki, tulu mo mulemai kina ingwa katukwale vohoki hinea i God u toka lolona lalahi na nona Tanungwe.