Read West Ambae EVESAS 3 Bible Online

EVESAS 3 - West Ambae bible

EVESAS 3

¹Huri na kinau vano hi i nau i Pol nu tiutangaroa lakwai God. Hikani nu hugu lolo ingwa na gwarugwaru huri i nau a tangaloi noi Jisas Kraes*, vunu vake huri nu tuku boloki hurikamu a tangaloi tavalavarea tina gwaloana noi Isrel*.

²Nu domi kwara tulu va rongo te ba kwara i God lo nona domi tabetabe lakua mo beteau kina boloki hika kwara na hago maikamu.

³I God u matangwasaraki na nona domidomi lakweau hinea tomua u tavunikiana. Nu uli na leo gwanugwanu huria ba.

⁴Diko tulu ne valuki na leo vano hi nomo ulira, vae tulu ne kikilai na nogu domidomi lo domiana tavuniki hi noi God huri Kraes.

⁵Lo taro hinea rau vano ba i God he viti na nona domiana tavuniki te hi lakwa na tangaloi. Vae hikani u matangwasarakinia kina nona Tanungwe lakwa na nona kaihora* kokona hinea u mataira, mana nona tangaloi* duruduruki.

⁶A domiana hika hinea tuai u tavunikiana. A tangaloi tavalavarea tina gwaloana noi Isrel ramo bulu mana gwaloana noi Isrel lalahi na Roro Karea kwara rana lavi na karekarea hinea i God u bete. Aira vunu a duvi na tarabehi rusa lo tarabehi katukwale, rau bulu lo tulikileo hinea i God mo vaia lalahi Jisas Kraes.

⁷I God u boloki kina nona huirana sibona mo hago maiau kina nona domi tabetabe lakua. Lo hala hi mo vaiau nomo kwareki a tangaloi boloki na Roro Karea noi Kraes.

⁸I nau hete tangaloi vitivitihuri, nu evina sileti na tangaloi noi God savira. Vae lo domi tabetabe lakua noi God mo hago maiau kwara na vai na bolokiana karea hi. Mo rivukiau kwara na vano vaki mana tangaloi tavalavarea tina gwaloana noi Isrel na heretuvaki na Roro Karea huri na karekarea noi Kraes hinea rau rusa haburu, tanahe valu lavira tea.

⁹Vunu vake u bete na bolokiana hika lakweau, kwara na vai na tangaloi savia rana kikilai na hala hinea i God ne vai na nona domiana hinea tomua u tavunikiana, vae ne mule luna. I God hinea u tau na kinau savia, u tavuniki na nona domiana hi lo hukao u rusa hinea rau vano ba, vae rovonaki hika.

¹⁰Mo vai kwehi kwara vae lo taro hika lalahi na nona kwarelua* ne matangwasaraki lakwa na kaihora lalakua lolo taetae, mana noga kaitomuaki hinea a noga huirana eia, kwara a lolorani na kikikila noi God u lakua haburu, a gwatuki u rusa.

¹¹Aia hi u taritarisa mana domiana noi God hinea u domikinia tuai, a varamana he tauana te radu. Vae hikani mo vai na nona domiana mo mule luna lalahi Jisas Kraes a noda Hugwe*.

¹²I kita hinea tau hariki lui Kraes tanahe mataku tea, huri tau hauhuri luna, vae tana tu lai koro na nako i God, a domida nehe kilukilu tea.

¹³Huri na kinau hi nu lengaikamu kwara a domimiu ne hatu sovi kina nogu rongoana hati hurikamu. A kinau hi savia u vaiana huri na nomiu karekarea kwara ne tabe hakekikamu.

¹⁴Huri na kinau vano hi nomo vitira, nu sovi hivo koro na nako i Tamada nu tiutangaroa lakwae.

¹⁵Aia kehekeheki a gwataki na bohiana na tama, vae savi na ratama mai raranatuga lolo taetae maira hi lo varamana rau lavi na bohiana na tama tiua.

¹⁶Nu uduhuri ki God hinea a nona huirana na taetae u lakua haburu, kwara ne betekamu kina nona huirana hi lalahi na nona Tanungwe kwara tulu ne tu ne madi tigwaravu.

¹⁷Nu uduhuri kinia kwara i Kraes* ne toka lolo domimiu huri tulu hauhuri luna u madi. Vunu vake nu uduhuri kinia kwara tulu ne tu ne madi lo lagwaana hoki na vikai hinea a kakwarina u vano u bua tilolo tano, diko hoki na ingwa u tu madi lo tano.

¹⁸Nu tiutangaroa kwara i kamu haragoki mana tangaloi noi God savia tulu ne lavi na huirana kwara tulu ne kikilai na lagwaana noi Kraes. Nu lengaia kwara tulu ne kikilai na nona lagwaana kwara u lakua hoki na havakinau, u gwaravu hoki na havakinau, u aulu hoki na havakinau, u bua hoki na havakinau.

¹⁹I Kraes a nona lagwaana u karea haburu, tahe taritarisa te kwara tana kikilai vunuhia. Vae nu tiutangaroa kwara tulu ne kikilai ne karea kwara i Kraes u lagwa haburu maikamu, vae hokinia i God ne vakakukwere na mamaurianamiu kwara tulu ne kukwere kina nona bohiana savia.

²⁰Ta tabe hakeki na hina i God. Kina nona huirana hinea u tuku boloki luda, u vai lavi na kinau hinea rau lalakua haburu sileti na kinau savia tamo uduhuri, diko sileti na kinau hinea tamo domiki.

²¹I kita vunu a nona kwarelua* hinea tau hariki lui Jisas Kraes, vae tana tabe hakeki na hina i God tigwaravu vaki tuai a gwereki tikei. Amen.