Read West Ambae EVESAS 4 Bible Online

EVESAS 4 - West Ambae bible

EVESAS 4

¹I nau nu hugu lolo ingwa na gwarugwaru, huri i nau a tangaloi boloki na noda Hugwe*. Nu madimadi hurikamu kwara tulu ne bohibohi ne taritarisa lo mamaurianamiu lo bohiana noi God, hokinia u kwarekamu ba kwara tulu ne vai luna.

²Tigwaravu lo kinau savia tulu ne hivokikamu, tulu ne mulemai kina tangaloi magemu, tulu ne lagwalagwa maikamu, vae a domimiu ne bua, tulu ne hatu lologutekikamu muleki.

³A Tanungwe Kokona u bulutakikamu tulu mo bulu katukwale, mo betekamu kina magemuana. Tulu huirataki kwara tulu ne kwiribibi na magemuana hi ne eno maikamu kwara tulu ne bulubulu katukwale tigwaravu.

⁴I kamu tulu kwareki a tarabehi katukwale vohoki. A Tanungwe noi God aia katukwale vohoki, u toka lumiu. Vae lo hala hokinia hi i God u kware vunuhikamu kwara tulu ne tau na nomiu domidomi lo tulikileo katukwale vohoki.

⁵A nomiu Hugwe katukwale vohoki, a nomiu hauhuriana katukwale vohoki, vake a nomiu bavtaes katukwale vohoki.

⁶I God aia katukwale vohoki hinea aia a Tama na tangaloi savia, u hugwe koro na tangaloi savia, u tuku boloki lalahi na tangaloi savia, vake a mamaurianana u bulu mana mamauriana na tangaloi savia.

⁷I Kraes* u betekita kina hilehile na huirana vatavatahakikita u taritarisa mana nona domi tabetabe lakua, kwara tana vai na nona bolokiana.

⁸Aia hoki na Uliuli* Kokona mo viti kwara, “Lolona hi mo mule tagaulu vaki lolo taetae, aia hoki na hugwe lakua hinea u gui na nona tavaluivuro, mo gwarubibira ramo huria takuni, vae mo bete na hilehile lakwa na tangaloi.”

⁹?A leo hi “Mo mule tagaulu” a domianaki kworohokinia? A domianaki aia hika kwara tomua u hivo vanamai tegetano, u hivoki haburukinia tilo varamana hika.

¹⁰A tangaloi hi mo hivo vaki lo varamana hika, aia hi vohoki hinea mo mule tagaulu vaki lolo taetae, vunu mo vano tagaulu sileti na taetae, mo vano tagaulu vakevake kwara ne vakakukwere na varamana savia.

¹¹Aia hini u bete na hilehile maira lakwa na tangaloi. Tuaki u mataira rau kwareki a kaihora* kokona, tuaki rau kwareki a tangaloi* duruduruki, tuaki rau kwareki a tangaloi na kwalahaki Roro Karea, vunu tuaki rau kwareki a kaitagahuri mana tangaloi huhui lo kwarelua*.

¹²I Kraes mo vai kwehi kwara a nona tangaloi vano hi rana vai na tangaloi noi God savia rana rarai, rana vai na nona bolokiana, kwara aira vunu hi hinea rau kwareki a tarabehi i Kraes rana huira vakevake.

¹³Lo halaki hokinia hi i kita vunu tana bulu katukwale lo noda hauhuriana lo natu i God, tana kikilaia ne karea. Vae hokinia tana mulemai hoki na tangaloi hinea rau ngwarasea madi, a domidomiga u sea. Tana mulemai hoki Kraes vohoki hinea u ngwarasea u taritarisa.

¹⁴Vae hokinia hi, tanahe hoki na sakwarigi te taliku. A tangaloi kurakura hinea rau tuku sinasina na tangaloi ramo turukinira lo hala hati ramo vaira a gwatuga mo hati, vae a noga huhuiana ranahe sina lavikita tea kwara tana kilu. Tanahe hoki na aga tea hinea a navo mo toko kwaeki lalikinia, vake a langi mo toko kwali lalikinia.

¹⁵Vae tana kwaha lo vitikareaki, tana kwahakwaha lo lagwaana. Vunu lo bohianada savia tana ngwarasea hake, vae tana mulemai hoki na tangaloi hinea a domidomiga u sea, tana hariki lui Kraes. I kita hoki na duvi na tarabehi rusa na tarabehina hinea aia kehekeheki a gwatuki na tarabehi hi, vae aia u vaikita tamo hariki tabulutaki kwara tana mulemai kina tarabehi katukwale vohoki. Vunu a hokehoke na tarabehi hi rau kwiribibi na tarabehi hi kwara ne huira tigwaravu. Vunu lolona i kita hinea a duvi na tarabehi rusa na tarabehina hi, tamo boloki lo hala hinea u taritarisa, a tarabehi hi u mauri lai. Vake lolona tamo toka lo lagwaana, a tarabehi i Kraes hi u huira vakevake.

¹⁷Nu kwahabibikamu lo hina na noda Hugwe* kwara tulu hatu toka hoki na tangaloi hinea rahe kikilai God tea, a domidomiga tikei.

¹⁸A domiga aira lolo dodoki. Rahe hariki te lo mauriana hini i God mo bete, huri rau vonovonoka, a domiga rau madi vohoki.

¹⁹A maemaega tikei, a doridoriga rau hati lo kinau vunuhia, rau tuku livu ravavine, rau vai doridori hati, vae a kinau tikei vohoki kwara ne tu korora.

²⁰A kinau vano hi tulu he huhuira te ti Kraes*.

²¹Tulu rongo na roro i Kraes kareaki, vae a tangaloi rau huhuikamu ba lo vitikareaki lui Kraes huri i kamu a nona tangaloi.

²²Vae tulu tau letiuki na bohiana na nomiu tokaana tuai hinea mo toko vaikamu tulu mo huri na nomiu domidomi kehekeheki. A bohiana tuai hi mo toko vaikamu tulu mo lengai na kinau a sinasina luga, hinea vae rana magarakikamu vohoki.

²³A domimiu mana domidomimiu, vae rana karagwa vunuhia.

²⁴Tulu lugwaki na bohiana na tokaana karagwa hoki na lugwamiu hinea rau karagwa. A tokaana hi i God u taua u taritarisa mana nona tokaana, u bakoto u kokona, huri u vanamai tina vitikareaki kehekeheki.

²⁵Karea, tulu hatu kurakura taliku huri i kita vunu a duvi na tarabehi rusa na tarabehi katukwale. A Uliuli* Kokona u viti kwara, “Tulu ne viti na vitikareaki lakwakamu muleki.”

²⁶Vake a Uliuli Kokona u viti kwara, “Diko tulu lologute tulu hatu tiraki na nomiu lologute mo turukikamu tilo hatiana.” Vae tulu hatu lologute a mataniaho mo soro maia.

²⁷Tulu hatu bete a mahao lakwai Setano*.

²⁸A tangaloi hinea tuai rau tuku babalu rana hatu babalu taliku, vae rana boloki, rana hagwe noga konata ne taritarisa mana noga mauriana, vunu vake rana hago lai mana tangaloi rau kakaravika.

²⁹Tulu mo kwahakwaha tulu hatu viti a leo rau hati hinea rau magaraki na tangaloi. Tulu viti a leo karea rana hago mana tangaloi rau keokeo rana huira. A leo hokinia hi rana taritarisa lo vitivitiki, vae rana hago mana tangaloi hinea rau rongora.

³⁰Tulu hatu vai na Tanungwe Kokona noi God mo rongo hati, huri a Tanungwe hini aia a kaimatai noi God lumiu, aia u vosangi kwara vae lo Raniki [4] ne vanamai i God ne kasatukuhikamu halaradu tina hatiki na varamana.

³¹Tulu tau letiuki na kinau hinea rau vai na domimiu ramo kao kinira. Tulu hatu lologute heheri, vake tulu hatu kwiribibi na lologute lolo domimiu. Tulu hatu viroro, tulu mo kwaha karakara, vake tulu hatu kwaha bulabula. Tulu hatu bebemiu kikamu.

³²Vae tulu vaivai karea maikamu, tulu vai tabetabekikamu muleki kina domi karea. Tulu domidomi koro lakwakamu vatavatahakikamu hokinia i God mo domidomi koro lakwakamu hinea tulu hariki lui Kraes.