Read West Ambae EVESAS 5 Bible Online

EVESAS 5 - West Ambae bible

EVESAS 5

¹I kamu i raranatu i God hinea u lagwa haburu maikamu. Vae huri hi tulu huira vakevake kwara tulu ne bohibohi hokinia.

²Tulu toka lo lagwaana, tulu lagwa mana tangaloi hokinia i Kraes* mo lagwa maikita mo tiraki na mamaurianana hurikita. A mamaurianana u hile lakwai God hoki na hilehile hinea a bonina u karea haburu, vake hoki na kairoroi* hinea i God u lagwa maia haburu.

³I kamu a tangaloi kokona noi God vae huri hi he taritarisa tea kwara tulu ne vitiviti huri na doridori hati. A doridori hati hinea a ngwera u soro vavine, mana doridori hati savia nona ngwera mana vavine, mana doridori hi a tangaloi u lengai na kinau vatahae, tulu hatu vitiviti huri.

⁴He taritarisa tea kwara tulu ne viti na leo hinea rau hogora, diko tulu ne hahaviri, diko tulu ne hahariki lo hina i God, diko tulu ne heveheve lo leo rau hati. Vae tulu ne lagwaki God.

⁵Nu viti lakwakamu u karea kwara tulu ne kikilai na leo aira hika. A tangaloi hinea u vai na doridori hati, a ngwera hinea u soro vavine, diko a tangaloi hinea u vai na doridori hati savia nona ngwera mana vavine, diko a tangaloi hinea u lengai na kinau vatahae, vae ne sala. A tangaloi hinea u lengai na kinau vatahae aia u taritarisa maira hinea rau lai noga mavakiana lakwa na takaro vuroki maira. Hete kwara te katukwale tiura ne soro tilolo Vanua Karagwa hinea i Kraes mai God raru mo hugwe koroa.

⁶Tulu hatu tiraki na tangaloi te katukwale ne sinakamu kina leo hinea rau hati kwara rana vaikamu a gwatumiu rana reraka. I God u lologute butubutu kina tangaloi hinea rahe rongohuria tea huri na kinau vano hi vohoki, vae ne vai kadira huri.

⁷Vae tulu hatu bulubulu mana tangaloi hokinira hi.

⁸I kamu, tomua tulu toka lo dodoki, vae hikani tulu kwareki a tangaloi na noda Hugwe*, tulu toka lo leleha. Vae huri hi tulu ne bohi tigwaravu hoki na tangaloi hinea rau toka lo leleha.

⁹A tangaloi hinea u bohibohi lo leleha a kwaina u rusa. A tangaloi rau bohibohi hokinia hi rau tuku vai na doridori hinea rau karea, rau taritarisa, rau bakoto.

¹⁰Tulu huira kwara tulu ne kikilai a havakinau hinea a noda Hugwe u lagwa luna.

¹¹Tulu hatu bulu mana tangaloi lo doridoriga hinea rau hati. A doridori vano hi a doridori na dodoki hinea a kwaiki u karea tikei luga. Vae tulu ne lavi na doridori vano hi vaki lo leleha.

¹²A maemaeana haburu kwara tana viti huri na doridori hinea rau vai tavuniki.

¹³Vae diko i God ne lai vunuhi na kinau vaki lo leleha, a leleha hi ne vosangi bakotoki na doridoriga vaki na ngwasara.

¹⁴Diko a leleha ne vosangi bakotoki na kinau vaki na ngwasara, a kinau hi ne mulemai kina leleha. Vae huri hi a bolo katukwale u viti kwara, “I kamu hinea tulu maturu, tulu rada, tulu maraka tina mateana, vae i Kraes ne kwaka vakahakikamu.”

¹⁵Tulu tagahuri ne karea lo nomiu tokaana. Tulu hatu toka hoki na tangaloi hinea rau vonovonoka, vae tulu toka hokinira hi rau kikikila.

¹⁶Tulu boloki ne karea lo taro hi u karea lakwakamu, huri lo taro hika a huirana na hatiki u huira.

¹⁷Tulu hatu reraka, aia tulu ne vai kwara tulu ne kikilai a havakinau hinea a noda Hugwe u lengaia kwara tulu ne vai.

¹⁸Tulu hatu inumi na waen tulu mo reraka kinia, huri ne vai hatihatikikamu. Vae tulu kukwere kina Tanungwe Kokona tigwaravu.

¹⁹Tulu kwahakwaha maikamu lo leo na bolo lo Sam mana bolo na kaluhakiana mana bolo kokona hinea a Tanungwe Kokona u betekamu kinira. Tulu kaho kaluhaki God lolo domimiu kina bolo na kaluhakiana mana bolo na Sam.

²⁰Tulu lagwaki God a Tamaki tigwaravu huri na kinau savia, lo hina na noda Hugwe i Jisas Kraes.

²¹Tulu domi mavaki Kraes, vae huri hi tulu ne domidomi mavakikamu.

²²I kamu a ravavine hinea tulu laki ba, tulu domi mavaki ratuamiu ngwarasea hokinia tulu domi mavaki na noda Hugwe*,

²³huri a ngwera u hago huirana koro i vavinehina hokinia i Kraes u hago huirana koro na kwarelua*. Vae i Kraes aia a Kaivakahi na kwarelua, hini a tarabehina.

²⁴Vae huri hi, a ravavine rana domi mavaki ratuaga ngwarasea rana rongohurira lo kinau savia, hokinia a kwarelua mo domi mavaki Kraes, mo rongohuria.

²⁵I kamu a ngwera hinea tulu laki ba, tulu lagwa mai ravavinehimiu hokinia i Kraes mo lagwa mana kwarelua, mo tiraki na mamaurianana huria

²⁶kwara ne vai na kwarelua hi ne kokona, ne kwareki a noi God. I Kraes mo vai na kwarelua mo ngwasara, aia hokinia u kwasukia kina kwai mana leona.

²⁷Mo vai hokinia hini kwara ne lavi na kwarelua vaki maia hinea u hahaburuka, u kokona, a hatiki u tikei luna, u ngwasara, a kinau he tigelia tea, diko te kinau vake hinea he taritarisa tea u tikei luna.

²⁸A ngwera rana lagwa mai ravavinehiga hokinia hini ramo lagwa mana tarabehiga siboga. A tangaloi hinea u lagwa mai vavinehina u lagwa maia sibona.

²⁹Hete kwara te katukwale hinea u bena kina tarabehina sibona, vae u vanga tabetabekinia mo tagahuria, hokinia hi i Kraes mo vai lakwa na kwarelua, mo tagahuri tabetabekinia.

³⁰A kwarelua hi aia a tarabehi i Kraes, vae i kita a duvi na tarabehi rusa na tarabehina.

³¹A Uliuli* Kokona u viti “Huri hini, a ngwera ne tiraki i tamana mai retahina, ne bulu mai vavinehina, raru ne mulemai ki tarabehi katukwale.”

³²A leo hi tina Uliuli Kokona u matangwasaraki na leo haburu hinea u eno tavuniki. Vae nu kikilai kwara u viti huri Kraes mana kwarelua.

³³Vae vake u viti hurikamu vatavatahakikamu. A ngwera vae ne lagwa mai vavinehina, ne tagahuria hokinia mo tagahuria sibona. Vunu vake a vavine vae ne domi mavaki i tuana ngwarasea.