Read West Ambae EVESAS 6 Bible Online

EVESAS 6 - West Ambae bible

EVESAS 6

¹Sakwarigi. Huri i kamu a tangaloi noi Kraes* u taritarisa kwara tulu ne rongohuri i ratamamiu mai raretahimiu. Aia hi a doridori karea kwara tulu ne vai.

²A tangwata hinea u viti kwara, “Ko domi mavaki i tamamu mai retahimu,” aia hi a tangwata tomuaki, hinea i God u hokea vake kina tulikileo,

³hinea mo viti kwara, “Vae vatavataha na kinau ne karea maiko lo mamaurianamu, vae a nomu tokaana ne gwaravu lo varamana.”

⁴I kamu a tama mana retahi tulu hatu vai tarataraki raranatumiu. A doridori hi ne vaira rana lologute. Vae tulu ne tagahurira ne karea, tulu ne haharara, tulu ne huhuira kina huhuiana noi Kraes kwara vae rana bakoto.

⁵I kamu a tangaloi boloki. [5] Tulu rongohuri na nomiu masi hinea tulu boloki lakwara hike lo varamana. Tulu ne domi mavakinira hokinia kwara tulu mataku kinira a huimiu u rururu kinira. Tulu ne rongohurira kina domi karea hokinia kwara tulu boloki lakwai Kraes*.

⁶Tulu hatu vai kwara tulu ne rongohurira kehekeheki lo taro hinea rau tagataga maikamu. Hokinia hi tulu vai kwara tulu ne vai na tangaloi kehekeheki rana lagwa maikamu. Vae tulu ne vai a havakinau hinea i God u lengaia, kina domimiu savia, huri i kamu a tangaloi boloki noi Kraes.

⁷Tulu ne vai nomiu bolokiana kina lagwalagwa hokinia kwara tulu boloki lakwa na noda Hugwe*, hete lakwa na tangaloi kehekeheki.

⁸Tulu domi hagwe kwara a noda Hugwe ne bete a kaitakwe lakwa na tangaloi vunuhia huri a bolokiana karea hinea ramo vai, lakwa na tangaloi hinea rau boloki vuroki tavuti na masi, vunu vake lakwa na tangaloi hinea a noga masi tikei.

⁹I kamu hinea a masi, tulu ne vai hokinia vake lakwa na nomiu tangaloi boloki. Tulu hatu vaira kina leo madi. Tulu domi hagwe kwara i kamu mana nomiu tangaloi boloki, a nomiu Masi katukwale lolo taetae hinea u kwaheki na doridori na tangaloi doluaki lo hala katukwale.

¹⁰A nogu leo rovonaki aia hika. Tulu hariki lo noda Hugwe* vae tulu ne lavi na nona huirana, tulu ne huira vakevake kina nona huirana lakua.

¹¹Tulu vulavulaki savi na vulavula na vuro lumiu hinea i God mo bete lakwakamu kwara tulu ne tu ne madi koro na sinasina hati noi Setano*.

¹²I kita tahe vai vuro tea vovohi na tangaloi na varamana, vae tau vai vuro vovohi na huirana na tanungwe hati hinea rau hugu laliki lo varamana hika, a noga kaitomuaki, maira hi a noga huirana eia, mana noga hugwe na varamana hinea rau hugwe koro na dodoki lo taro hika.

¹³Huri na kinau hi, tulu vulavulaki na vulavula na vuro noi God hika lai nga. Vunu diko a rani ne maravuti kwara tulu ne vai vuro mai Setano, vae tulu ne tu lai vovohia. Vae hokinia hi tulu ne vai vuro mana tavaluivuro rovonaki lo gwereki, vae lo gwereki tulu ne tu madi radu nga.

¹⁴Vae hokinia hi tulu tu rarai huri vuro. Tulu viti a vitikareaki, aia hini hoki na kwahi lo tagemiu hinea tulu kwetibibi na lugwamiu kinia. Tulu bohibohi lo bakotoana, aia hini hoki na lugwa na vuro hinea a kaitukoro na venevene lo gwagwamiu.

¹⁵Tulu rarai tigwaravu kwara tulu ne viti huri na Roro Karea na magemuana, aia hini hoki na kaikwokwori na garu hinea tulu mo tavu lo taro na vuro.

¹⁶Tulu hauhuri lui God tigwaravu, aia hini hoki na kaititiba hinea u tu koro na venevene noi Setano, u vai matei na kabuki luga.

¹⁷Tulu lavi na ahiana hinea i God u bete lakwakamu, aia hini hoki na kaikwokwori na gwatu hinea tulu huni lo taro na vuro. Vunu vake tulu kwiribibi ne leo noi God. A leo hi aia hoki na bue na vuro hinea a Tanungwe Kokona u bete lakwakamu.

¹⁸A kinau vano hi savia tulu vaira lo tiutangaroa, tulu ne uduhuri ki God kwara ne hago maikamu. Tulu ne tiutangaroa tigwaravu kina huirana na Tanungwe Kokona. Tulu ne tiutangaroa tigwaravu huri na tangaloi noi God savia, tulu hatu keokeo, a matamiu ne hatu maturuturu.

¹⁹Vunu vake, tulu tiutangaroa huriau kwara i God ne bete na leo karea lakweau, vunu na kwahakwaha a huigu ne hatu rururu, vae na matangwasaraki na Roro Karea hinea tomua u eno tavuniki.

²⁰I nau a tangaloi noi God kwara na talahaki na Roro Karea, vae hika i nau lolo ingwa na gwarugwaru. Tulu tiutangaroa kwara vae na hatu mataku, vae na matangwasaraki na Roro Karea ne taritarisa.

²¹I belada karea i Tikikas, a tangaloi boloki hinea u karohuri lo bolokiana na noda Hugwe*, ne bete savi na roro huriau lakwakamu kwara tulu ne kikilai kwara nu toka kworohokinia.

²²Vae huri hi nomo horae vaki maikamu kwara ne viti hurikami lakwakamu kwara keu toka kworohokinia, vae tulu ne rongo ne rakati na domimiu.

²³A tangaroa karea hika lakwakamu. I God i Tamada mai Jisas Kraes* a noda Hugwe raru ne bete na magemuana ne eno maikamu i rabelagu lui Kraes, raru ne betekamu kina lagwaana mana hauhuriana.

²⁴Aira vunu hinea rau lagwa haburu mai Jisas Kraes a noda Hugwe kina lagwaana hinea toko he rovo tea, vae i God ne hago maira kina nona domi tabetabe lakua.