Read West Ambae VILIVAE 1 Bible Online

VILIVAE 1 - West Ambae bible

VILIVAE 1

¹I nau i Pol, i kamirua mai Timoti, i kamirua a tangaloi boloki noi Jisas Kraes*. Keru uli na leta hika lakwakamu i kamu vunu a ngwera Vilivae hinea tulu hariki lui Jisas Kraes, i kamu a tangaloi kokona noi God, vae silesiletia hi lakwakamu a kaituruki mana kaihago na kwarelua*.

²A tangaroa karea hika lakwakamu. I God i Tamada mai Jisas Kraes a noda Hugwe* raru ne hago maikamu kina nogaru domi tabetabe lakua, vake raru ne bete na magemuana ne eno maikamu.

³Lolona hi nomo domihagwekamu, tigwaravu nu lagwaki na nogu God hurikamu.

⁴Vataha na taroki nu tiutangaroa hurikamu doluaki, nu tiutangaroa kina hahavutiana,

⁵huri na doridori aia hika tulu mo hago maiau lo bolokiana na Roro Karea, u tinakaki lo tinatinakakiki tarisaki hikani.

⁶Hokinia nu kikilai kareaki kwara i God hinea mo tinakaki na boloki karea hi lumiu tomua halaradu, vae ne vano maia tarisaki a boloki hi ne rovo lo Rani noi Jisas Kraes*. [1]

⁷A domidomigu aia lumiu tigwaravu, vae u taritarisa kwara na domi hokinia hi hurikamu huri tulu bulu maiau lo bolokiana hini i God u bete lakweau lo nona domi tabetabe lakua kwara na vai. Tuai lolona nomo tu vovohi na tavaluivuro noi Kraes nomo hago leo huri na Roro Karea kwara ne huira ne vano ne karea, vunu vake lo taro hika hinea nu hugu lolo ingwa na gwarugwaru, vae tigwaravu tulu bulu maiau lo bolokiana hi.

⁸I God u kikilai kwara nu viti kareaki lolona nomo viti kwara nu lengaia haburu kwara na tagaikamu. A nogu lagwaana hi hurikamu savia u vanamai tina domi i Jisas Kraes sibona.

⁹Nu tiutangaroa kwara a nomiu lagwaana ne mauri vakevake, vae lo hala hi tulu ne lavi na kikikila kareaki mana domidomi sea,

¹⁰vunu tulu ne kwaheki lavi na havakinau hinea rau bakoto. Vae hokinia lo Rani noi Kraes tulu ne bakoto lo nakona, vae a tangaloi ranahe hagwe lavi na hatiki te lumiu.

¹¹Vunu lo mamaurianamiu tulu ne huri na doridori hinea rau bakoto, rau karea. A doridori hi, a kwai na bolokiana noi Jisas Kraes luda kwara tana tabe hakeki na hina i God tigwaravu tana kaluhakinia.

¹²Rabela. Nu lengaia kwara tulu ne kikilai kwara a kinau hini ramo vanamai vovohiau, vae rau hago mana bolokiana na Roro Karea mo matala.

¹³Hokinia hini a kaitagahuri maira na ingwa i Sisa, mana tangaloi ratuaki vake hike, rau kikilai kwara i nau lolo ingwa na gwarugwaru huri i nau a tangaloi boloki noi Kraes*.

¹⁴Hokinia nomo hugu lolo ingwa na gwarugwaru, mo vai na ratua a noga hauhuriana mo madi lo noda Hugwe*, vae hika rahe mataku te vohoki, rau vai na domiga u huira tigwaravu kwara rana heretuvaki na leo noi God.

¹⁵Kareaki, tuaki tiura rau heretuvaki Kraes kwara rana vai kadiau, rau lengaia kwara rana vaiau na rongo hati, vae u rusa rau heretuvakinia kina domi karea.

¹⁶Aira hi rau vai hokinia hi rau vai kina lagwaana huri rau kikilai kwara i God u beteau kina boloki kwara na hago leo huri na Roro Karea kwara u kareaki.

¹⁷Vae ratuaki rau vai hete kina vitikareaki. Rau heretuvaki Kraes kwara rana vai kadiau, rau vai kwara rana tabe hakekinira siboga. Rau domi kwara rana vaiau na rongo hati vakevake lolo ingwa na gwarugwaru.

¹⁸I nau nahe domi huri tea. Diko rau vai kwehi kina domi karea, diko rau vai kina domi hati, vae i nau u havutiau huri rau heretuvaki Kraes. Vae ne havutiau vakevake,

¹⁹huri nu kikilai kwara a kinau hi vae a kwaiki ne eia. I God ne tirakiau tina ingwa na gwarugwaru hika lalahi na nomiu tiutangaroa mana hagoana na Tanungwe noi Jisas Kraes.

²⁰A kinau katukwale vohoki nu lengaia haburu, vae nu tau na nogu domidomi luna kwara na hatu vai na kinau hinea kwara ne vaiau na maemae lo nako i Kraes. Nu lengaia kwara hika a domigu ne huira na hatu mataku, diko nana ahi, diko na mate, vae venaha a mamaurianagu savia ne tabe hakeki na hina i Kraes hokinia nomo toko vai tigwaravu.

²¹Lo nogu domidomi diko na ahi, na hariki lui Kraes na toko va tabe hakekinia, vae diko na mate, vae ne karea siletia hi.

²²Vae diko nu toka radu lo varamana hika, vae nana vai lai te bolokiana hinea a kwaiki ne eia. Hikani a hala u mahangahanga, vae nu lengalengakinia kwara na lakao luna makive. I nau sibogu nu lengaia kwara na tiraki na mamaurianagu hike lo varamana na hugu mai Kraes. Aia hi u karea karakara.

²⁴Vae nu tagaia u taritarisa kwara na hugu maikamu radu lo varamana.

²⁵Hikani nu taga kwara a hala kairuaki hi u karea, vae huri hi, nu kikilai kwara nana hugu maikamu vake, lo varamana. Na hugu maikamu i kamu vunu, vae na hago maikamu tulu ne huira vakevake, vae ne havutikamu lo nomiu hauhuriana.

²⁶Vae lo hala hi, diko na venatu vaki maikamu taliku, vae tulu ne lagwa vohoki, vunu tulu ne kaluhaki i Jisas Kraes huri nomo bulu maikamu taliku.

²⁷Hikani a kinau haburu kwara a doridorimiu ne taritarisa tigwaravu mana Roro Karea noi Kraes*. Vae hokinia lo taroki, diko nomo vai lai nomo venatu nomo tagaikamu, diko na hugu vakahao tikamu, aia kwara nana rongo kwara tulu tu madi lo domi katukwale vohoki, tulu boloki tabulutaki kwara tulu ne vai na tangaloi rana hauhuri lo Roro Karea.

²⁸Na rongo vake kwara tulu he mataku te kina nomiu tavaluivuro, a domimiu u madi tigwaravu. Vae hokinia ne kwareki a kaivosangi lakwara kwara aira hi rana sala, vae i kamu, i God ne vakahikikamu.

²⁹I God u matai na hala karea hurikamu u rovo ba, hete kwara tulu ne hauhuri lui Kraes kehekeheki, vae kwara tulu ne rongo hati vake lo tarabehimiu huria.

³⁰Hikani i kita vunu tana bulu katukwale lo vai vuro. A vuro hi tulu mo toko tagaiau nomo vai vuro luna tuai, vae hika nu vai luna radu hokinia hi tulu mo toko rongo.