Read West Ambae VILIVAE 2 Bible Online

VILIVAE 2 - West Ambae bible

VILIVAE 2

¹A nomiu tokaana lui Kraes* u vaikamu tulu mo huira, a nona lagwaana u amohikamu. Tulu bulu katukwale mana Tanungwe Kokona. Tulu vaivai karea maikamu, vake a hahakavimiu eia hurikamu katukwale kehe.

²Karea, huri hi nu kwahabibikamu kwara tulu ne vaiau na lagwalagwa ne havutiau luna hi kwara a domidomimiu ne katukwale, tulu ne lagwalagwa maikamu, vae tulu ne hariki katukwale lo domi katukwale.

³He karea te kwara katukwale tikamu ne vai na kinau tea kwara ne tabe hakekinia sibona diko ne domidomia luna. Vae tulu hivokikamu, i kamu vunu, tulu ne domi huri na tangaloi dolua kwara aira rau karea siletikamu.

⁴Tulu hatu domi hurikamu kehekeheki lo kinau hinea tulu lengaia sibomiu, vae tulu domi huri a havakinau hinea a tangaloi dolua rau lengaia.

⁵A domidomimiu ne hoki na domidomi i Jisas Kraes.

⁶Tuai lo tinatinakakiki aia hoki i God vohoki. Vae he madimadi te haburu luna kwara ne taritarisa mai God.

⁷Aia sibona mo tiraki na kinau vano hi mo mulemai hoki na tangaloi boloki vohoki. Mo vora tilo varamana mo mulemai hoki na tangaloi. Mo lavi na bohiana nona tangaloi,

⁸vae mo hivokinia kwara ne rongohuri God rovonaki mo mate. Ramo duletakinia lo kaibetu vunu mo mate.

⁹Huri na kinau hi, i God mo rakatia tina mateana mo tabe hakekinia vaki lo tanotano aulu karakara, mo bete na hina lakwae hinea u lakua karakara sileti na hina doluaki.

¹⁰Vae a tangaloi savia lolo taetae, maira hinea lo varamana, maira hinea lo tanotano na tangaloi hinea rau mate, rana sovi hivo rana vai mavaki na hina i Jisas.

¹¹Vae aira vunu rana matangwasaraki kwara i Jisas Kraes aia a noga Hugwe*, vae rana tabe hakeki na hina i God a Tamaki.

¹²Rabelagu. Lolona hinea i nau maikamu, i kamu tulu rongohuriau tigwaravu, vae u karea karakara kwara tulu ne rongohuriau lo taro hika i nau nu vakahao tikamu. Tulu boloki, tulu seseaka luna kina matakuta mana huiruruana lo nako i God, kwara tulu ne gweregwerei na boloki hinea i God u vai kwara ne vakahikikamu,

¹³huri i God u boloki tigwaravu lumiu. Ne vaikamu tulu ne masinge kwara tulu ne rongohuria, vake ne bete na huirana lakwakamu kwara tulu ne vai lai a havakinau hinea mo domiki.

¹⁴Lo hava bolokiana tulu mo vai, tulu hatu vai ruturutu luga, tulu hatu viroro mulekikamu luga.

¹⁵Hokinia tulu ne ngwasara, a tangaloi ranahe hagwe lavi na hatiki te lumiu. Tulu ne kwareki raranatu i God hinea tulu bakoto vohoki. Vunu tulu ne betebete rongohi na leo na ahiana lakwa na tangaloi na hatiki hinea a gwatuga rau madi, rau tuku vai doridori rahe karea tea lo kinau savia. Vae tulu ne kwaka lolo livukaga hoki na vitu mo vavarama vakahaki na mahaleki. Diko tulu ne vai kwehini, vunu lo Rani noi Kraes, [2] vae na domidomiau maikamu, huri tulu vosangi tivarea kwara i nau nahe kwalao te haro vuroki, diko nahe boloki te haro vuroki.

¹⁷A nomiu hauhuriana aia u kwareki a nomiu hilehile hinea tulu mo toko bete lakwai God, kwara tulu ne lai nomiu mavakiana lakwae. Vae diko na abe, a daigu ne huki, ne bulu mana nomiu hilehile hi, vae nana lagwa ne havutiau tabulutaki maikamu vunuhia.

¹⁸Vae i kamu vake tulu ne lagwa ne havutikamu tabulutaki maiau.

¹⁹Nu domidomi tilo noda Hugwe* i Jisas kwara na vai lai na hora i Timoti vake maikamu te lai nga, kwara nana rongo te roromiu ne rakati na domigu.

²⁰Aia hi katukwale vohoki u bulu maiau lo nogu domidomi, vake u domidomi haburu hurikamu.

²¹Aira ratuaki rau domi huri na noga bolokiana siboga, hete huri na bolokiana noi Jisas Kraes.

²²I kamu tulu kikilai ba, kwara i Timoti a doridorina u taritarisa huri u boloki haragoki maiau lo bolokiana na Roro Karea, hoki na natu mo boloki mai tamana.

²³Hikani nu domidomi kwara na kikilai kihokua hi kwara rana vai a havakinau maiau, vae nari hokakinia vaki maikamu.

²⁴Nu domidomi tilo noda Hugwe kwara i nau sibogu vake, na vai lai na venatu te lai nga vaki maikamu.

²⁵Nu domi kwara u taritarisa kwara na hora i belada i Evavrotaetas ne muleatu vaki maikamu taliku. U boloki, u vai vuro tavaluki maiau. Aia a nomiu kaihora hinea tulu mo hokakinia kwara ne hago maiau.

²⁶U lengaia haburu kwara ne taga vunuhikamu, vae u rongo hati haburu huri tulu mo rongo kwara u lenga.

²⁷U lenga kareaki, kelekele mo eno kwara ne mate. Vae i God u hakavia. He hakavia te kehekeheki, vae u hakaviau vake, vae hi mo tu koro na rongoana hati mana hahakavi lakua hi tiau kwara na hatu rongo hati haburu.

²⁸A domigu u huira kwara na horae vaki maikamu, hokinia kwara tulu ne tagaia ne havutikamu taliku, vae a nogu hahakaviana ne tikei tiau.

²⁹Tulu ne lai tabetabekinia kina lagwalagwa, huri aia u hariki lo noda Hugwe vae aia i belada. Tulu ne domi mavaki na tangaloi aira vunu hokinia hi.

³⁰U garagarani kwara ne mate lo bolokiana noi Kraes*, vae he mataku tea kwara ne mate. U huiratakinia kwara ne gweregwerei na bolokiana hini tulu mo taua tilo kabana kwara ne vai, vae mo hago maiau.