Read West Ambae VILIVAE 3 Bible Online

VILIVAE 3 - West Ambae bible

VILIVAE 3

¹Rabela. A nogu leo rovonaki hika. I kamu hinea tulu hariki lo noda Hugwe*, vae ne havutikamu. He madi te lakweau kwara na viti na leo hika lakwakamu taliku hinea nomo ulia lakwakamu tuai. Vae a leo hi ne kwiribibikamu tulu ne toka ne karea.

²Tulu tagahurikamu ne karea tina tangaloi hinea aira hoki na kwiriu ovi. Tulu tagahurikamu tiura hi rau vai kinau rau hati. Tulu likoki na tangaloi hinea rau huirataki kwara rana toko vai a kaimatai* lo siosio lo tangaloi.

³I kita hi tau lai a kaimatai lo siosio kareaki, luna hi tau kaluhaki God kina domi mavakiana lalahi na huirana na Tanungwe Kokona, vake u havutikita huri lo noda mauriana tau hariki lui Jisas Kraes*. I kita tahe tau na noda domidomi te lo kaimatai na tarabehi.

⁴Kareaki i nau na vai lai kwara na tau na nogu domidomi lo kinau aira kwehini. Diko te katukwale u domi kwara ne vai lai ne tau na nona domidomi tilo kaimatai lo tarabehi, vae i nau na vai lai silesiletia hi.

⁵I nau a gwaloana noi Isrel*, nu gwalo vanamai lo gwatuidamu lui Bensamen. I tamagu mai retahigu i rarua vunu a gwaloana noi Isrel, vae nomo vora, i nau a gwaloana noi Isrel bakotoki. Lolona a bongigu mo kaibitu nomo lai a kaimatai lo siosio. Lo hala na Tangwata* nona gwaloana noi Isrel, i nau a Varisi.

⁶Lo hala na nomai sekulu*, nu huirataki na huhuiana hi, vae hi nomo toko vai bulakiki na kwarelua* noi Jisas. Lo hala na bakotoana lalahi na Tangwata, i nau a nogu vakasileana tikei.

⁷Vae huri nu lengaia kwara na tau i Kraes tomua lo mamaurianagu, a kinau savira hinea tuai na tagaira kwara aira a kinau karekarea hinea na kwiribibira, vae hika nu tagaira hokinia kwara aira a kinau vuroki hinea rana vaiau nana sala.

⁸Vae hete a kinau aira vano hi kehekeheki. Hikani na taga kwara savi na kinau hinea nomo toko vai tuai, aira vunu a kinau vuroki hinea rana vaiau nana sala. Vae nu tirakinira savira kwara vae na lavi na kinau karea karakara, aia hi kwara na kikilai Jisas Kraes a nogu Hugwe. Vae huri nu lengai Kraes, nomo taga savi na kinau vano hi kwara aira hoki na hogo vohoki, vae nu tau leletiukinira kwara vae na lavi Kraes,

⁹na hariki luna kareaki. Hikani nohe bakoto te lo nako i God lo nogu huirana sibogu. Diko na rongohuri na Tangwata, vae nehe vaiau te kwara na bakoto lo nako i God. Vae nu bakoto lo nakona huri nu hauhuri lui Kraes. A bakotoana hi i God u betea, vae u tu lo hauhuriana kehekeheki.

¹⁰Vae kehekeheki nu lengaia karakara kwara na kikilai Kraes, nana kikilai na huirana na nona marakaana tina mateana, vunu vake kwara na bulu maia lo nona rongoana hati. Vunu nu lengaia kwara lo nogu tokaana na huri na bohibohianana lolona hi mo mate,

¹¹huri nu domidomi tiluna kwara nana maraka taliku tina mateana.

¹²Nahe viti lai tea kwara nu kwalao nu maravuti mana maki ba, diko kwara nu bakoto ba. Vae huri i Kraes* u vaiau nu kwareki a nona tangaloi, i nau nu huira vakevake kwara na huri na bohibohianana.

¹³Rabela. Kareaki nahe viti tea kwara nu huri savi na bohibohianana ba, diko kwara nu maravuti mana maki hi ba. Aia hi hete radu nga. Vae a kinau katukwale vohoki hi nomo vai. A lologu bongi kina kinau takuni tiau, nu huira vakevake kwara na lavi na kinau hinea tomua tiau.

¹⁴Aia hokinia kwara nu kwalao bakotoki vovohi na maki hi hinea a kaitakweki eia. A kaitakwe aia hi, i God u kwarekita kwara tana hariki lui Jisas Kraes, tana va hugu maia aulu lolo taetae.

¹⁵U taritarisa kwara i kita vunu hinea tau ngwarasea u madi ba lo hala noi Kraes, kwara a domida ne katukwale lo kinau hi. Vae diko ratuaki tikamu a domiga rau dolua, i God ne matangwasarakinia lakwara.

¹⁶Vae hikani tana vano vakevake lo hala hini tamo huria, rovonaki na hika.

¹⁷Rabela. U karea kwara tulu ne huri na tanoi-garugu. I kami keu tau na tanoigaru bakoto lakwakamu ba. Tulu huri na bohibohiana na tangaloi hinea rau huri na tanoigaru hi.

¹⁸Nu viti vakarusa ba lakwakamu, vae hika nu viti taliku kina domi mava, a megu tinangi u huki huri a tangaloi rusa a noga tokaana u vaira ramo tavalui vuro kina mateana noi Kraes lo kaibetu.

¹⁹Aira hini vae lo gweregwereki rana vano vaki lo tanotano na magarakiana vaki tuai, huri a noga god hi, a lengalengaiana na tarabehiga. Rau domidomira mana kinau hini u taritarisa kwara rana maemae luna, rau domi huri na kinau na varamana kehe nga.

²⁰Vae luda u dolua. I kita a tangaloi na taetae, tau hugu tavuti na gwatuivanua na taetae. Tau hugu tara na noda kaivakahi, i Jisas Kraes a noda Hugwe* hinea ne vanamai tina taetae.

²¹Ne kwani na tarabehida hinea a tarabehi na varamana rau keokeo, ne vaira rana hoki na tarabehina hinea a tarabehi na taetae u karea. Ne vai kwehini kina huirana hinea mo vai lavi na kinau savia ramo hugu tavuti na nona tangwata.