Read West Ambae VILIVAE 4 Bible Online

VILIVAE 4 - West Ambae bible

VILIVAE 4

¹Karea rabela. Nu lagwa haburu maikamu, nu lengaia haburu kwara na tagaikamu. Tulu vaiau nu lagwa u havutiau vohoki, nu domidomiau maikamu. Rabela karea, tulu hariki ba lo noda Hugwe, vae tulu tu ne madi hokinia hi lo nona huirana.

²I kamurua hi, i Iuotia mai Sintike, nu lengai haburu kwara a domimiru ne katukwale taliku huri i kamurua kuru vituatua lo noda Hugwe*.

³I nigo vake a tangaloi karohuri, a buluigu i nigo hinea taru boloki haragoki tuai, nu lengaia kwara kona hago mana vavine kairua hi. Kona vai kwehi huri u rahaki haburukirarua maiau raru mo talahaki na Roro Karea, aira harago mai Klemen mana tangaloi ratuaki hinea rau boloki haragoki maiau vae a hinaga rau eno lo buku na ahiana noi God.

⁴I kamu hinea tulu hariki lo noda Hugwe tulu ne lagwalagwa ne havutikamu tigwaravu. Na vitia taliku, vae ne havutikamu.

⁵Tulu vosangi a bohiana magemu lakwa na tangaloi savia. A noda Hugwe ne mulemai lai nga.

⁶A domimiu ne hatu kwalao laliki te huri na kinau, vae lo nomiu tiutangaroa vunuhia tulu ne uduhuri ki God huri a havakinau hini tulu lengaia, vae tigwaravu lolona tulu ne uduhuri kinia tulu ne lagwakinia huri vake.

⁷Vunu a magemuana noi God hinea u lakua haburu a tangaloi rau viti lengalengakinia, vae ne kwiribibi na domimiu mana domidomimiu, ne tagahurikamu hinea tulu hariki lui Jisas Kraes*.

⁸Rabela. Nu lengaia kwara na viti na kinau katukwale vake lakwakamu. A bohiana karea eia hinea rau bakoto vohoki, vae u taritarisa kwara tana kaluhaki na tangaloi hinea rau bohibohi hokinia. A kinau aira hi rau kareaki, rau lalakua, rau bakoto, rau ngwasara, tau lagwa luga, vae a tangaloi rau domi mavaki na tangaloi hinea rau bohibohi karea hokinia hi. Vae tulu ne vakakukwereki na domidomimiu kina kinau hokinira hi tigwaravu.

⁹Tulu vai a havakinau hinea tulu mo huhui tulu mo lai tiau tina nogu leo mana bohibohianagu. Vae i God hinea mo bete na magemuana lakwakita ne bulu maikamu.

¹⁰Nu lagwa, u havutiau, vae nu kaluhaki na noda Hugwe, huri hikani tulu vosangi taliku kwara tulu hakaviau. U tuai vohoki tulu he vai na kinau tea kwara tulu ne hago maiau kinia, hete huri kwara tulu he domihagweau tea, vae a hala tikei kwara tulu ne hago maiau.

¹¹Nu viti kwehi, hete kwara a nogu kinau tikei. Nu kikilai ba kwara a hava hala nu vano luna vae nu toka u karea kehe nga.

¹²Diko a nogu kinau tikei, vae nu kikilai na kinau hi ba. Diko a nogu kinau u rusa, vae nu kikilai na kinau hi vake. A hava hala nu vano luga, vae nu kikilaira ba. Lolona nu kugwa, diko u marakatiau, lolona a nogu konata u rusa diko a nogu konata tikei, vae nu rongo u karea kehe nga.

¹³Nu vai lai vataha na kinau lalahi na huirana noi Kraes* hinea u vaiau nomo huira.

¹⁴Vae i kamu tulu karea maiau haburu vohoki, tulu mo hago maiau lo nogu rongoana hati.

¹⁵I kamu a ngwera Vilivae, tulu kikilai kareaki kwara lo taro hinea nomo heretuvaki na Roro Karea lo vanua Masetonia lo tinatinakakiki, lolona nomo tiraki na vanua hi, vae i kamu kehekeheki tulu mo hago maiau. Tulu mo bulu maiau lo bolokiana hi, tulu mo lai tiau hokinia kwara a bukumiu eia maiau, tulu mo betebete lakweau taliku. A kwarelua* ratuaki hetea, vae i kamu kehekeheki tulu mo hago maiau.

¹⁶Lolona nomo hugu lo gwatuivanua Tesalonaeka tulu hokaki a mane* vaki maiau, vae hete kwara vakatukwale vohoki.

¹⁷Vae tulu mai domi kwara nu lengaia kwara na lai a hokohoko tikamu kehekeheki. Hetea. Nu lengaia kwara a kwaimiu ne eno lo mamaurianamiu ne tabekamu.

¹⁸Hikani a nogu uliuli huri na kinau vunuhia hini tulu mo bete lakweau, vae u siletia hi nomo lengaia. Hikani i Evavrotaetas u lai savi na nomiu hokohoko lakweau vae nu lai savi na kinau hinea nu lengaia. Hikani aira hoki na hilehile lakwai God hinea a boniki u karea haburu, aia hoki na kairoroi* hinea u taritarisa, i God u lagwa haburu maia.

¹⁹Vae a nogu God hinea a nona huirana eia lolo taetae, vunu vake a nona kinau karekarea rau rusa lengalenga, ne tagahurikamu hinea tulu hariki lui Jisas Kraes, ne hiletikamu kina kinau savia hinea diko tulu mo gwanugwanu luga.

²⁰I God aia a noda God i Tamada, vae tana tabe hakeki na hinana vaki tuai a gwereki tikei. Amen*.

²¹Nu hokaki nogu lagwaana lakwakamu vunu, i kamu a tangaloi noi God hinea tulu hariki lui Jisas Kraes. A ratua hike maiau rau hokaki noga lagwaana lakwakamu vake.

²²A tangaloi noi God savia hike rau hokaki noga lagwaana lakwakamu, vae siletira hi, aira hini rau hugu lolo ingwa na hugwe lakua nona ngwera Rom.

²³A tangaroa karea hika lakwakamu. A noda Hugwe* i Jisas Kraes ne hago maikamu kina nona domi tabetabe lakua.