Read West Ambae KOLOSI 1 Bible Online

KOLOSI 1 - West Ambae bible

KOLOSI 1

¹I nau i Pol hinea lo domikiana noi God mo rivukiau kwara na kwareki a kaihora* kokona noi Jisas Kraes*. I kamirua mai tuada i Timoti

²keru uli na leta hika lakwakamu a tangaloi noi God lo gwatuivanua Kolosi. I kamu hi tulu hariki lui Jisas Kraes vae i kamu i ratuamaru, tulu karohuri lo nomiu hauhuriana. A tangaroa karea hika lakwakamu. I God i Tamada ne hago maikamu kina nona domi tabetabe lakua, vake ne bete na magemuana ne eno maikamu.

³I kamirua tigwaravu keru tiutangaroa hurikamu, keru mo lagwaki God a Tama na noda Hugwe* i Jisas Kraes*,

⁴huri keru rongo kwara tulu hauhuri lui Jisas Kraes, vunu vake kwara tulu lagwa mana tangaloi noi God savia.

⁵Tulu tuku vai kwehi huri tulu tau na nomiu domidomi u madi lo nomiu kinau hinea i God u tau rarai hurikamu ba lolo taetae. A kinau vano hi tulu rongo na roroki tuai lolona hinea tulu mo rongo na leo na vitikareaki na Roro Karea noi Kraes tomua halaradu.

⁶A Roro Karea hi u maravuti maikamu ba, vae u tuku matala lo varamana doluaki, u lavi na karekarea lakwa na tangaloi savia. A Roro Karea hi u vai kwehi lakwakamu vake, u tinakaki tuai lolona hi tulu mo rongo kwara i God a nona domi tabetabe u lakua kwara ne hago maikamu, vae tulu mo kikilai matangwasarakinia.

⁷Tulu huhui na kinau hi ti Evavras hinea u boloki haragoki maikamirua, vae keru lagwa haburu maia. Aia a tangaloi boloki noi Kraes hinea u karohuri lo bolokiana hi, vae u lai tanotanomaru.

⁸U viti lakwakamirua kwara tulu hariki lo Tanungwe Kokona, vae a Tanungwe hi mo vaikamu tulu mo lagwa haburu mai God mana tangaloi.

⁹Vae huri hi, keru tiutangaroa hurikamu tigwaravu, u tinakaki lo taro hi keru mo rongo na roromiu tomua halaradu. Keru uduhuri ki God kwara a Tanungwe Kokona ne betekamu kina lolorani na kikikila mana domidomi sea kwara i kamu tulu ne kikilai ne karea a havakinau hinea i God u lengaia.

¹⁰Vunu tulu ne toka hokinia a noda Hugwe u lengaia, vae tigwaravu tulu ne vai a havakinau hinea u lagwa luna. Vunu a kwaimiu ne eia lo mamaurianamiu, tulu ne vai a boloki rau karekarea, vae tulu ne ngwarasea hake lo nomiu tokaana ngwasara, tulu ne kikilai God vakevake.

¹¹Keru lengaia kwara i God ne vaikamu tulu ne huira kina nona huirana na taetae hinea u lakua haburu. Vae a domimiu ne bua ne hatu sovi lo taro na rongoana hati, vae tulu ne tu ne madi, ne havutikamu.

¹²Vunu tulu ne lagwaki Tamada hinea mo vaikita tamo taritarisa kwara tana bulu mana bulana tangaloi doluaki. Vae tulu ne vai lai tulu ne lavi na kinau vano hi mo tau rarai huri na bulana tangaloi kokona lolo taetae lo vanua hinea u vavarama tigwaravu.

¹³Aia u lavikita tina huirana na dodoki, mo tau tabetabekikita lo huirana noi Natuna hinea u lagwa maia haburu. Vae hikani tau kware i Natuna ki noda Hugwe Lakua.

¹⁴Lalahia i God mo kasatukuhikita tina hatiki, mo domidomi koro na noda vaivai hati rusa.

¹⁵I Kraes* hi, tamo tagaia, aia hoki na nunu i God, vae i God tahe taga lavia tea. Aia a natu ngwera u vora tomua halaradu, u aulu sileti na kinau savia hinea i God mo taura,

¹⁶huri lalahia i God mo tau na kinau savia, a kinau lolo taetae, maira hi lolo varamana, a kinau hinea tau tagaira ki matada, mana kinau hinea tahe tagaira tea. I God u lalahia lolona mo tau na kinau savia maira hinea a noga huirana eia, a hugwe lalakua mana hugwe ratuaki, a noga kaitomuaki mana noga kaituruki. I God u lalahia mo tau na kinau savia lo varamana hi, mo tau savi na kinau vano hi, a noi Kraes kehekeheki.

¹⁷Tuai lolona a kinau tikei radu nga, vae i Kraes aia eia ba. Vae a kinau savia rau hariki luna kwara rana eno lo tanotanoga.

¹⁸I Kraes u kwareki a gwatu na tarabehi, a tarabehi hi a kwarelua*. Aia a gwataki na kwarelua, vae a kwarelua hi u vanamai tiua. Aia vake hinea u maraka tina mateana tomua halaradu, kwara vae aia kehekeheki ne tu tomua lo kinau savia.

¹⁹I Kraes ne tu tomua hokinia hi, huri a domi i God sibona kwara vae i Natuna hi ne taritarisa maia vohoki lo kinau savia.

²⁰Hokinia lalahi i Natuna mo reve savi na kinau ramo mulemai vaki maia taliku. I God mo vai na magemuana lalahi na mateana noi Natuna huri a daina mo huki lo bala tangwata. Vae hikani mo reve vunuhi na kinau vaki maia sibona, aira hi lolo varamana maira hi lolo taetae.

²¹Vakatukwale i kamu tulu vakahao ti God vohoki, i kamu a nona tavaluivuro lo kinau hinea rau hati tulu mo vai, maira hinea tulu mo domiki.

²²Vae hikani huri i Kraes* mo mulemai hoki na tangaloi na varamana, vae mo mate, i God mo vaikamu tulu mo kwareki a nona buluana taliku lalahi na mateana noi Natuna. Mo vai hokinia hi kwara vae ne lavikamu tulu ne tu lo nakona vae i kamu tulu ne kokona, tulu ne ngwasara lo nakona, a hatiki ne tikei lumiu.

²³Vae i kamu tulu ne karohuri tulu ne hauhuri lui Kraes hinea aia a gwatakiki, u tu madi he kilukilu tea. Lolona hinea tulu mo rongo na Roro Karea, tulu mo tau na nomiu domidomi u madi luna. Vae tulu hatu tirakinia. A Roro Karea hi, rau talahakinia laliki lakwa na tangaloi na varamana doluaki, vae i nau i Pol nu kwareki a tangaloi boloki na Roro Karea hi.

²⁴Hikani nu tuku rongo hati lo tarabehigu, vae nu lagwa, huri aia hi vae ne hago maikamu. I Kraes* mo rongo hati lo tarabehina kwara ne vai na nona bolokiana. Vae lo hala hokinia hi, i nau vake nu rongo hati lo tarabehigu kwara na vakakukwere na boloki hinea u eno radu nga. A bolokiki aia hi, kwara a kwarelua hinea a tarabehi i Kraes, ne huira.

²⁵Lo taro hinea i God mo tau na bolokiana tilo kabagu kwara na vai, mo vaiau nomo kwareki a tangaloi boloki na kwarelua kwara na hago maikamu. A nogu bolokiana aia hika kwara na viti matangwasaraki na leona kwara ne karea.

²⁶A leo hi, i God u tavunikinia tina tangaloi vunuhira tuai vohoki, a hukao u rusa rau vano ba. Vae hikani u matangwasarakinia lakwa na bulana tangaloi.

²⁷I God a nona domidomi kwara ne vosangi lakwa na bulana tangaloi kwara a leo hi u kukwere kina kinau karekarea na mauriana noi God, vae u lengaia kwara ne matangwasarakinia lakwa na tangaloi tavalavarea tina gwaloana noi Isrel* savia. A leo tavunikiana hi aia hika, kwara i Kraes u toka lumiu, vae huri hi tulu ne hauhuri lai kwara tulu ne lavi na ahiana karea noi God lolo taetae.

²⁸Hikani keu matangwasaraki i Kraes lakwa na tangaloi. Keu kwahabibira keu huhuira kina kikikila savia kwara kena vaira rana mulemai hoki na tangaloi hinea rau ngwarasea madi, a domidomiga u sea lo hala noi Kraes.

²⁹Nu boloki kareakiau kina huirana lakua hinea i Kraes mo beteau kinia, mo boloki lalahiau kwara na vai na bolokiana hi.