Read West Ambae KOLOSI 2 Bible Online

KOLOSI 2 - West Ambae bible

KOLOSI 2

¹Nu lengaia kwara tulu ne kikilai kwara u bolokiau haburu kwara na hago maikamu mana ngwera Laotisia, maira hi ratuaki vake hinea rahe tagaiau tea, rahe kikilaiau tea.

²Nu vai kwehi kwara a domiga ne huira, vunu kwara rana bulu katukwale lo lagwaana. Nu lengaia kwara a domiga ne hatu kilukilu, ne hatu sovi, huri rau rongo kikilaki na leo noi God ba hinea tuai mo tavunikiana, vake rau lai bakotoki na leo hi. A leo hi aia i Kraes* sibona.

³I God u tavuniki savi na nona domidomi sea mana nona kikikila lui Kraes. A kinau vano hi aira a nona kinau karekarea, vae a tangaloi rana hagwera lui Kraes kehekeheki.

⁴Nu viti kwehi lakwakamu kwara na tu koro na tangaloi hinea ramai vai kwara rana sinakamu kina noga leo hinea rau lulumu, a kurakura luga.

⁵A tarabehigu u tikei maikamu, vae a domigu aia maikamu. Vae nu lagwa hi nomo rongo kwara tulu tu madi lo domi katukwale lo nomiu hauhuriana lui Kraes.

⁶Tigwaravu tulu ne hariki lui Jisas Kraes lo nomiu tokaana, huri tulu lavia ba mo kwareki a nomiu Hugwe*.

⁷Hoki na vikai a kakwarina mo vano u bua tilolo tano, vae i kamu tulu ne hokinia, tulu ne tu ne madi lui Kraes. A nomiu tokaana lui Kraes ne tu ne madi hoki na ingwa mo tu lo tano, vake a nomiu hauhuriana luna ne huira vakevake tigwaravu hokinia ramo huhuikamu luna. Vunu vake tulu ne lagwakinia tigwaravu.

⁸Tulu tagahuri ne karea kwara vae a tangaloi ramai vaikamu tulu mo mulemai hoki na tangaloi gwarugwaru kina leo vuroki hinea u huri na kikikila na tangaloi na varamana. A leo vano hi aira a leo kurakura vohoki hinea a tangaloi rau tuku viti hurira tuai ba, rau vanamai tina tanungwe hati hinea rau hugu laliki lo varamana tomua halaradu, vae rahe vanamai te ti Kraes.

⁹I Kraes aia u mulemai kina tangaloi na varamana, vae savisavi na karekarea noi God rau eno vunu luna ba, aia u taritarisa mai God vohoki.

¹⁰Vae i kamu hinea tulu hariki lui Kraes, i God u bete savi na kinau lakwakamu ba kwara ne vakakukwere na mamaurianamiu. I Kraes u hugwe koro na kinau doluaki, aia aulu sileti na kaihora lolo taetae mana tanungwe doluakinira, u huira sileti na huirana savia.

¹¹Hikani, huri tulu hariki lui Kraes aia hokinia tulu lai a kaimatai* lo siosio u rovo ba. Aia hete kaimatai lo siosio hinea a tangaloi rau tuku vai lo tarabehiga. Vae aia a kaimatai lo siosio dolua hinea i Kraes u sio utuutuhi na lengalengaiana hati na domidomimiu.

¹²Lolona tulu mo lai bavtaes, aia hokinia i God u tanomikamu haragoki mai Kraes. Vake lo bavtaes hi aia hokinia i God u rakatikamu tina mateana haragoki mai Kraes. Mo mule hokinia hi lakwakamu huri tulu mo hauhuri lo huirana noi God, hinea mo rakatia tina mateana.

¹³Tuai, a tanungwemiu rau mate lo nako i God huri na nomiu vaivai hati, vunu vake, huri tulu he kikilai na Tangwata* te noi God, tulu he lavi na kaimatai te lo siosio. Vae hikani i God u vaikamu tulu mo ahi haragoki mai Kraes. Mo domidomi koro na noda vaivai hati savia,

¹⁴mo bari na bukuda letiu hinea rau uliana lo buku, vake mo bari leletiuki na tangwata hinea ramo toko gwarubibikita. Mo lai vunuhira leletiu hokinia mo durubibira tilo kaibetu haragoki mai Kraes.

¹⁵Lo kaibetu hi i Kraes u magaraki na huirana na tanungwe hati hinea a noga huirana eia, mana noga kaitomuaki. I Kraes u guira u rovo ba, mo vai lakwara hokinia hi a hugwe lakua mo toko vai lakwa na nona tavaluivuro hinea u guira ba, mo vaira ramo maemae, a tangaloi rau mana kinira.

¹⁶Vae huri hi, tulu hatu tiraki na tangaloi ramo tau na tangwata lumiu kwara tulu ne kani a havakinau diko tulu ne inu a havakinau. Tulu hatu tirakinira ramo viti kwara tulu ne kwiribibi na rani hinea rau kokona vake hinea tulu ne vai kanikani huri na vula tavidiri, diko kwara tulu ne kwiribibi na Rani* na Mabuana hokinia hika.

¹⁷A kinau vano hi tuai aira a nunu na kinau hinea kwara vae rana vanamai lo taroki, vae a kinau kareaki rau vanamai ba, aira lui Kraes*.

¹⁸A tangaloi ratuaki rau domi kwara aira rau hahaburuka huri rau tagai na vakatabobo hinea rau doludolua. Rau domidomira kwara rau hivokinira vae hetea, vunu vake rau lai noga mavakiana lakwa na kaihora lolo taetae. Vae tulu hatu tirakinira ramo viti kwara i kamu tulu hati huri tulu he vai te hokinira. A tangaloi vano hi rau huri na domidomi na tangaloi vohoki lo kinau vano hi, rau domidomira haro vuroki vohoki.

¹⁹Rahe hariki te lui Kraes kwara ne madi. Vae i Kraes u kwareki a gwatuki lakwa na nona tangaloi, aira rau kwareki a tarabehina. I Kraes u kwiribibi na nona tangaloi, vae aia hokinia kwara savisavi na tarabehina rau lai hinaka tiua. Hikani a tarabehi savira rau hariki katukwale kina hokehoke na tarabehina mana karohukana vake, kwara ne mule kina tarabehi katukwale. Vae hokinia a tarabehi hi ne mauri ne karea, hokinia hi i God u lengaia.

²⁰I kamu hokinia tulu mate haragoki mai Kraes*. I Kraes u lavikamu ba tina huirana na tanungwe hati hinea rau hugwe koro na tangaloi laliki lo varamana, vae ranahe gwarukamu te taliku. ?Vae kworohokinia tulu mo huri na doridori na tangaloi na varamana hokinia kwara i kamu a tangaloi na varamana radu? ?Kworohokinia tulu mo kwiribibi na korokoro aira hika ramo viti kwara,

²¹“Hatu kwiribibia hika,” “Hatu kanikani rongohia hika,” “Hatu kihia hika”?

²²A kinau vano hi a korokoro mo viti hurira, lolona tulu mo vaira vae rava titikeiki. Aira a korokoro mana huhuiana nona tangaloi kehekeheki.

²³Kareaki nu domi kwara a tangaloi ratuaki rau tuku domi kwara a korokoro aira vano hi aira a domisea huri rau vai na tangaloi kwara rana lai noga mavakiana lakwa na kaihora lolo taetae, vake rau vai na tangaloi rau lailai hivokinira, vunu rau vai kwara rana suri na tangaloi tina kinau hinea rau lengaia kwara rana vai. Vae a korokoro vano hi a noga huirana tikei kwara rana tu koro na lengalengahuri hati hinea a tangaloi rau lengaira.