Read West Ambae KOLOSI 3 Bible Online

KOLOSI 3 - West Ambae bible

KOLOSI 3

¹I kamu tulu maraka tina mateana haragoki mai Kraes tulu ahi, vae huri hi tulu vai na domimiu ne tu lo kinau vano hi aulu lolo taetae lo tanotano hinea i Kraes mo hugu lo matuai God.

²Tulu tau na domimiu ne madi lo kinau takwa-hi, hete lo kinau hike lo varamana,

³huri i kamu tulu mate ba. Tulu hariki lui Kraes ba, vae a nomiu ahiana i God u tavunikinia haragoki mai Kraes, vae u eno lui God.

⁴A nomiu ahiana kareaki, aia hi i Kraes. Vae lo taro hinea i Kraes ne maravuti kina tangaloi, vae rana tagaikamu haragoki maia, vae tulu ne bulu maia lo nona hahaviada na taetae.

⁵Tulu kwohi letiuki na lengalengahuri hati na varamana hi lumiu, hoki na doridori aira hika. A ngwera rau vai a doridori hati mana ravavine, a ravavine rau vai a doridori hati mana ngwera, a tangaloi rau vai a doridori rahe karea tea, a maemaeana luga. A ngwera rau lengai na ravavine haburu, a ravavine rau lengai na ngwera haburu, a tangaloi rau lengai na vaivai hati haburu. Vunu vake rau lengai na kinau vatahae, vae a doridori hi a tangaloi rau lengai na kinau vatahae u taritarisa mana doridori hi a tangaloi rau lai noga mavakiana lakwa na takaro vuroki.

⁶Huri na kinau aira vano hi i God u lologute butubutu kina tangaloi hinea rahe rongohuria tea, vae ne vai kadira.

⁷Tuai, lolona a doridori vano hi ramo hugwe korokamu radu, i kamu vake tulu bohibohi lo doridori aira hi.

⁸Vae hikani tulu tau letiuki na doridori aira vano hi tina mamaurianamiu. Tulu hatu lolo, tulu hatu vai nakara, tulu hatu tavalui vuro mulekikamu. Tulu hatu vaivai leo, tulu hatu hahaviri.

⁹Tulu hatu kurakura mulekikamu, huri tulu tau letiuki na nomiu tokaana tuai mana doridoriki ba,

¹⁰tulu lugwaki na bohiana na tokaana karagwa ba, hoki na lugwamiu hinea rau karagwa. A tokaana karagwa hi, i God aia a gwatakiki, vae u vaia u karagwa tigwaravu kwara ne vaikamu tulu ne mulemai hoki na nununa vohoki tulu ne kikilai God kareaki.

¹¹Vae huri na kinau vano hi, hikani tanahe viti lai tea kwara tuaki tikita a tangaloi tavalavarea tina gwaloana noi Isrel*, ratuaki a gwaloana noi Isrel*, tuaki rau lai a kaimatai* lo siosio, ratuaki hetea. Tanahe viti lai tea kwara ratuaki rahe sekulu uliuli tea, ratuaki rau vonovonoka, ratuaki a tangaloi hinea rau boloki vuroki tavuti na masi, ratuaki a noga masi tikei. Vae lo tokaana karagwa hi i Kraes* kehekeheki aia hoki na kinau savia nona tangaloi doluaki, aia u toka lo tangaloi vunuhira.

¹²I kamu a tangaloi kokona noi God. U lagwa maikamu mo mataikamu kwara tulu ne kwareki a nona. Karea, tulu lugwaki na bohiana na tokaana karagwa hoki na lugwamiu hinea rau karagwa. Tulu ne hakavi na tangaloi, tulu vaivai karea mana tangaloi, tulu ne hivokikamu, tulu ne mulemai kina tangaloi magemu, a domimiu ne bua.

¹³Tulu hagohago maikamu, vae diko te katukwale tikamu u viti na kinau rau hati vovohikamu te katukwale, vae raru ne domidomi koro lakwararua hoki na noda Hugwe* mo domidomi koro lakwakita.

¹⁴Vunu hivoulu karakara lo kinau vano hi, tulu ne lagwalagwa maikamu, huri a lagwaana u bulutaki na kinau vano hi savira rau katukwale vohoki.

¹⁵Tulu tiraki na magemuana hinea i Kraes* mo bete lakwakamu, ne kwiribibi na domimiu, ne tomuakikamu lo hala noi Kraes, huri i God u kwarekamu ba kwara a magemuana hi ne eno lolo domimiu tigwaravu, vae hikani tulu bulu katukwale hoki na tarabehi katukwale. Vae tigwaravu tulu ne lai nomiu lagwaana lakwai God.

¹⁶U taritarisa kwara a leo noi Kraes hinea rau kukwere kina karekarea savia, rana va eno lolo domimiu tigwaravu. Tulu ne huhuhuikamu, tulu ne hahaharakamu kina leo na lolorani savia. Tulu ne kaho a bolo lo Sam, mana bolo na kaluhakiana, mana bolo kokona hinea a Tanungwe Kokona u betekamu kinira. Tulu kaho lakwai God kina lagwaana lolo domimiu.

¹⁷Vataha na kinau tulu ne vai diko tulu ne viti, tulu ne vai lo hina na Hugwe i Jisas. Tigwaravu tulu ne hariki luna kwara tulu ne lagwaki i God i Tamada.

¹⁸I kamu a ravavine hinea tulu laki ba. Tulu rongohuri ratuamiu ngwarasea tulu hugu tavutiga. U taritarisa kwara tulu ne vai kwehi huri i kamu a tangaloi noi Kraes*.

¹⁹I kamu a ngwera hinea tulu laki ba, tulu lagwa mai ravavinehimiu. Tulu hatu vai taratarakinira.

²⁰I kamu a sakwarigi, tulu rongohuri ratamamiu mai raretahimiu tigwaravu, huri i God u lagwa kwehi.

²¹I kamu a tama mana retahi, tulu hatu vai kwara i raranatumiu rana lologute, huri diko tulu ne vai kwehi, a domiga rana sovi.

²²I kamu a tangaloi boloki [1], tigwaravu tulu rongohuri na nomiu masi hinea tulu boloki lakwara hike lo varamana. Tulu hatu vai kwara tulu ne rongohurira kehekeheki lo taro hinea rau tagataga maikamu. Hokinia hi tulu vai kwara tulu ne vai na tangaloi kehekeheki rana lagwa maikamu. Vae tulu ne boloki kina domi karea huri tulu domi mavaki na noda Hugwe*.

²³Te hava boloki te hinea tulu ne vai, tulu vai kina domi vunuhia, hokinia kwara tulu boloki lakwai God, hete lakwa na tangaloi.

²⁴Tulu domihagwe kwara a noda Hugwe ne betekamu kina kaitakwe hinea u tau raraia ba huri na nona tangaloi. A nomiu Masi kareaki hinea tulu boloki lakwae aia i Kraes* vohoki.

²⁵Vae a tangaloi hinea u tuku vai kinau he taritarisa tea, aia ne lai a kaitakwe huri, ne taritarisa mana kinau hinea mo vai, huri i God u kwaheki na doridori na tangaloi doluaki lo hala katukwale.