Read West Ambae KOLOSI 4 Bible Online

KOLOSI 4 - West Ambae bible

KOLOSI 4

¹I kamu hi a masi, tulu ne vai ne taritarisa lo hala katukwale lakwa na nomiu tangaloi boloki. Tulu domihagwe kwara i kamu vake a nomiu Masi eia lolo taetae.

²Tulu huira lo tiutangaroa, a domimiu ne hatu maturu, tulu tataro kina lagwaana vaki mai God.

³Vake tulu tiutangaroa hurikami kwara i God ne bete a taro karea lakwakami kwara kena heretuvaki na leona, vake kwara kena viti huri na kinau huri Kraes* hinea tomua u eno tavuniki. Hikani nu hugu lolo ingwa na gwarugwaru, vae huri na kinau hi vohoki.

⁴Tulu tiutangaroa kwara nana kwaha lo hala hinea u taritarisa kwara na kwaha luna, kwara vae a leo hi ne matangwasara.

⁵Tulu bohibohi lo hala karea hinea u taritarisa lo nako na tangaloi hinea rahe hauhuri te lui Kraes. Tulu tagahuri, vae a taro ne eia lakwakamu kwara tulu ne kwahakwaha maira, tulu ne hago maira kina Roro Karea.

⁶Tulu ne kwahakwaha ne karea maira kina leo hinea kwara rana lagwa luna. Vae tulu ne kikilai na halaki kwara tulu ne bete a kaidaraki lakwara aira vunu, ne taritarisa mana noga leo.

⁷I belada i Tikikas, aia a bela karea u hago maiau lo bolokiana na noda Hugwe*, u karohuri luna, vae neri viti huriau lakwakamu.

⁸Vae huri hi, nomo horae vaki maikamu kwara ne viti hurikami lakwakamu kwara keu toka kworohokinia, vae tulu ne rongo, ne rakati na domimiu.

⁹I buluimiu i Onesimas ne huria. Aia i belada hinea nu lagwa maia haburu, vae aia u karohuri tigwaravu. I rarua hi raru ne viti huri vunuhi na kinau hinea ramo vaiana hike.

¹⁰I Aristakas, aia hi u hugu maiau lolo ingwa na gwarugwaru, u hokaki a nona lagwaana lakwakamu. I Mak, i tua i Banabas katukwale, u hokaki nona lagwaana vake lakwakamu. I kamu tulu rongo na rorona ba kwara vae diko ne vanamai, vae tulu ne lai tabetabekinia.

¹¹I Sosua vake hinea a hinana kairuaki i Sastas, u hokaki nona lagwaana lakwakamu. Vae aira hi kaitolu vohoki tina gwaloana noi Isrel* savira hinea rau mulemai kina tangaloi noi Kraes*, ramo hago maiau, kemo matangwasaraki lakwa na tangaloi kwara i God aia a Hugwe Lakua, a tangaloi vunuhia rana vai mavakinia rana hugu tavutina. Vae aira hi kaitolu rau hago maiau haburu ramo rakati na domigu.

¹²I Evavras i buluimiu katukwale vake, u hokaki nona lagwaana lakwakamu. Aia a tangaloi boloki noi Jisas Kraes hinea tigwaravu u tiutangaroa u huira hurikamu. Mo uduhuri ki God kwara vae i kamu tulu ne tu ne madi, tulu ne ngwarasea ne madi lo nomiu hauhuriana, vunu kwara tulu ne kikilai kareaki savi na domikiana noi God, vae tulu ne vai luna.

¹³I nau sibogu na viti lai kwara u bolokinia haburu maikamu mana tangaloi lo gwatuivanua Laotisia, maira hi lo gwatuivanua Hieravolis.

¹⁴I Luk a noda tokita karea hinea tau lagwa maia, mai Demas, raru hokaki nogaru lagwaana vaki maikamu.

¹⁵Tulu viti nomai lagwaana lakwai rabelada lo gwatuivanua Laotisia, vunu vake lakwai hagweda hi i Nimva mana kwarelua hinea rau vileki tabulutaki lolo ingwana.

¹⁶Tulu mo valuki na leta hika mo rovo, vunu tulu mo hokakinia vaki mana kwarelua Laotisia kwara rana valukia takwa-hi. Vunu lo hala hokinia hi vake, tulu valuki na leta hinea a kwarelua Laotisia rana hokakinia vaki maikamu.

¹⁷Tulu viti lakwai Akivas kwara, “Ko tagahuri ne karea kwara kona vai vunuhi na bolokiana hinea a noda Hugwe* mo bete lakwako kwara kona vai.”

¹⁸A leo hika nu ulia kina kabagu. I nau i Pol nu hokaki nogu lagwaana lakwakamu. A lolomiu ne hatu bongi kiau kwara i nau lolo ingwa na gwarugwaru, rau gwarubibiau. A tangaroa karea hika lakwakamu. I God ne hago maikamu kina nona domi tabetabe lakua.