Read West Ambae 1 TESALONAEKA 1 Bible Online

1 TESALONAEKA 1 - West Ambae bible

1 TESALONAEKA 1

¹I nau i Pol, mai Saelas mai Timoti, i kami keu uli na leta hika lakwakamu hi a kwarelua* noi Kraes* lo gwatuivanua lakua Tesalonaeka. I kamu a tangaloi noi God a Tamaki mana Hugwe* i Jisas Kraes. A tangaroa karea hika lakwakamu. I God ne hago maikamu kina nona domi tabetabe lakua, ne bete na magemuana ne eno maikamu.

²Tigwaravu keu lagwaki God hurikamu doluaki, vunu tigwaravu keu tiutangaroa hurikamu.

³Lo nako na noda God hinea i Tamada, keu domihagwe kwara a bohibohianamiu u vosangi na nomiu hauhuriana lui Kraes*. Vunu keu domihagwe kwara a nomiu lagwaana mo vaikamu tulu mo boloki mo madi, vake tulu tu madi huri tulu tau na domimiu u madi lo noda Hugwe* i Jisas Kraes.

⁴Rabela. Keu kikilai kwara i God u lagwa maikamu, mo mataikamu kwara tulu ne kwareki a bulana tangaloi.

⁵Lolona hi kemo lavi na Roro Karea huri Jisas Kraes vaki maikamu, he vanamai te kina leo kehekeheki, vae kina huirana mana Tanungwe Kokona. Vae kemo vosangi kwara keu hauhuri luna kareaki, kemo kikilai kwara aia a vitikareaki. Vunu tulu kikilai vake kwara lolona kemo hugu maikamu keu bohibohi kworohokinia kwara kena hago maikamu.

⁶Hikani tulu tuku huri na tanoi-garumai mana tanoigaru na noda Hugwe. Lolona tulu mo kwali na leo na Roro Karea, kareaki tulu hagwe na rongoana hati rusa, vae a Tanungwe Kokona u vaikamu mo havutikamu haburu.

⁷Vae lo bohiana hi tulu vosangi na hala lakwa na tangaloi hauhuri savia lolo vanua Masetonia maia Gris [1] kwara rana huria.

⁸Tulu mo talahaki na leo huri na noda Hugwe vataha na mahagweki lo vanua Masetonia maia Gris, vae siletia hi a roromiu kwara tulu hauhuri lui God u vano vataha na vanua. Vae kenahe viti na kinau tea huri a tangaloi rau rongoa ba.

⁹Savi na tangaloi vano hi rau viti huri kwara lolona kemo tirokikamu tulu mo lai tabetabekikami, tulu mo bohi tina takaro vuroki maira kwara tulu ne huri i God Tatoka hinea u kareaki.

¹⁰Vake rau viti huri kwara tulu hugu tara i Natuna hinea ne hivo vanamai tina taetae. Aia hi i Jisas hinea i God mo rakatia tina mateana, vae lo taroki hinea i God ne lologute kina tangaloi huri na noga vaivai hati, ne magarakinira, vae i Jisas ne vakahikikita.