Read West Ambae 1 TESALONAEKA 2 Bible Online

1 TESALONAEKA 2 - West Ambae bible

1 TESALONAEKA 2

¹Rabela. I kamu sibomiu tulu kikilai kwara a nomai tirotiroki vaki maikamu he vanovano vuroki tea, vae a kwaiki eia.

²Tulu kikilai kwara lo gwatuivanua lakua Vilivae rau vai bulakikikami, rau kwaha bulakikikami ba, vunu keri vanamai vaki maikamu lo gwatuivanua Tesalonaeka. Vae a noda God u rakati na domimai kwara kena viti na Roro Karea, hinea mo vanamai tiua lakwakamu lo nako na tangaloi aira vano hi, hinea rau kwaha vovohi na leo hika.

³A nomai leo hinea kemo kwarekamu kinia hete kurakura luga, kehe viti tea kina domidomi hinea rahe taritarisa tea, vake kehe vai tea kwara diko kena sinasina na tangaloi.

⁴I God u kahi haro na domimai ba, vae u tagaikami kwara keu taritarisa kwara kena kwalahaki na Roro Karea hi. Vae huri hi, lolona kemo kwaha, kehe domi tea kwara kena vai na tangaloi rana lagwa maikami. Keu lengaia kwara kena vai kwara i God hinea u kikilai na domimai tigwaravu ne lagwa maikami.

⁵Tulu kikilai tabetabeki u rovo ba kwara keu vanamai vaki maikamu hete kina leo lulumu, vake kehe viti na Roro Karea te lakwakamu kwara kena vai na hala te kwara kena tavuniki na nomai lengalengaiana hati. I God aia a nomai hagoleo.

⁶Kehe vai te kwara kena vai na tangaloi rana kalukikami. Kehe vai te lakwakamu, vake kehe vai te lakwa na tangaloi dolua.

⁷Vunu vake huri i kami a kaihora* kokona noi Kraes*, keu taritarisa kwara kena longi na kinau rusa tikamu, vae hetea. Lolona kemo hugu maikamu keu vai u magemuhakikamu hoki na retahi mo tagahuri raranatuna.

⁸Kehe rarai te kehekeheki kwara kena viti na Roro Karea lakwakamu hinea u vanamai ti God, vae vake keu rarai kwara kena tiraki na mamaurianamai hurikamu, huri keu lagwa haburu maikamu keu domidomi haburu hurikamu.

⁹Rabela. Keu domi kwara a lolomiu he bongi tea kwara u rahaki kworohokikami lo nomai bolokiana. Lolona kemo heretuvaki na Roro Karea ti God lakwakamu keu boloki u rani u bongi kwara kenahe tau na hagohago mava te lumiu kwara te katukwale.

¹⁰I kamu a nomai hagoleo vunu i God vake, kwara a bohibohianamai maikamu hinea tulu hauhuri lui Kraes, u ngwasara, u bakoto, vunu a hatiki tikei luna.

¹¹Tulu kikilai tabetabeki kwara keu vaivai karea maikamu vatavatahakikamu u taritarisa hoki na tama u vaivai karea mai raranatuna.

¹²Keu kwahabibikamu, keu rakati na domimiu, vunu keu seseaka hurikamu kwara tulu ne toka hokinia hi i God u lagwa luna. Aia u kwarekamu kwara tulu ne rongohuria hinea aia kehekeheki a nomiu Hugwe Lakua kwara vae i kamu tulu ne lavi na nona karekarea maia lolo taetae.

¹³Hikani huri na kinau katukwale vake, tigwaravu keu lai nomai lagwaana lakwai God hurikamu. Lolona hi kemo kwali na leo noi God vaki maikamu tulu mo rongoa, tulu mo lai tabetabekinia, hete hoki na leo nona tangaloi, vae tulu mo lavia hokinia aia a leo noi God bakotoki. Vae aia kwehi kareaki. Vake i God aia u boloki lumiu hinea tulu hauhuri luna. [2]

¹⁴Rabela. I kamu tulu hagwe na rongoana hati u taritarisa hoki na kwarelua* noi God lo vanua Sutia ramo hagwea, aira hinea a tangaloi noi Jisas Kraes. A tangaloi tatamiu rau vai bulakikikamu hokinia hi a gwaloana noi Isrel* ramo vai bulakiki na tangaloi noi Kraes lo vanua Sutia.

¹⁵Aira hi vohoki ramo kwohi matei na Hugwe* i Jisas, vake aira hi hinea tuai ramo kwohi matei na tangaloi* duruduruki maira, vae hikani rau tuku vai bulakikikami. A tangaloi aira hi rau tuku vai kinau i God he rongo karea te kinira. Vae rau bohibohi he karea tea mana tangaloi savia.

¹⁶Vake rau vai kwara rana tu korokami kwara kena hatu heretuvaki na leo lakwa na tangaloi tavalavarea tina gwaloana noi Isrel kwara i God ne vakahikinira. Vae aia hi a vaivai hati ki rovonaki tiura hi doluaki hinea ramo toko vai tigwaravu. Vae hikani u rovo ba, a lologute noi God u vanamai tiluga.

¹⁷Rabela. Lolona i kami keu hugu vakahao tikamu lo taro gwanugwanu vohoki, vae keu rongo hati huri kehe tagaikamu tea. Io kareaki, keu tikei maikamu lo tarabehi kehekeheki, vae a domimai aira maikamu. Vae keu lengaia haburu kemo seseaka hurikamu kwara tana tagatagaikita taliku ki nakoda.

¹⁸Keu lengaia haburu kwara kena muleatu harokamu. I nau sibogu nu vai kwara na muleatu vakarusa, vae i Setano* u tu korokami.

¹⁹Vae tulu taga. Keu tau na domimai u madi luna hika kwara lolona a noda Hugwe* i Jisas ne maravuti ne lagwa maikami. ?Vae keu tau na domimai u madi luna hi huri aha? Hurikamu hi maira ratuaki. Lo rani hi hinea tana tu koro na nakona, tulu ne vaikami ne havutikami. I kamu hi, tulu ne kwareki a nomai kaimalai kwara ne havutikami, vae kena kwaha domidomikami hurikamu.

²⁰I kamu tulu kwareki a angiangihimai, tulu vaikami mo havutikami.