Read West Ambae 1 TESALONAEKA 4 Bible Online

1 TESALONAEKA 4 - West Ambae bible

1 TESALONAEKA 4

¹Rabela. I kamu tulu huhui ba tikami kwara tulu ne loliloli kworohokinia kwara vae i God ne lagwa maikamu. Tulu tuku loliloli hokinia hi vaki na hika. Vae hikani lo hina na noda Hugwe* i Jisas keu kwaha maikamu keu seseaka hurikamu kwara tulu ne vano nga lo doridori hika.

²Tulu kikilai vunu ba kwara a leo vano hika keu huhuikamu kinira ba lo hina na noda Hugwe i Jisas.

³I God u lengaia kwara tulu ne kokona, tulu ne kwareki a bulana tangaloi hinea tulu he vai na doridori hati te mana vavine.

⁴I kamu a ngwera, vatavatahakikamu tulu ne kikilai na hala kwara tulu ne toka kworohokinia mai ravavinehimiu lo tokaana ngwasara hinea a tangaloi rana domi mavakikamu luna. [3]

⁵Tulu ne hatu huri na doridori hati hinea tulu mo lengai na ravavine hoki na tangaloi hinea rahe kikilai God tea ramo toko vai.

⁶Lo bohiana vano hi i God he lengaia te vohoki kwara te katukwale tikamu ne vai bulakiki tuana lui Kraes* ne balu tiua, huri a noda Hugwe ne vai kadi na tangaloi hinea rau vai kwehini, hokinia keu viti lakwakamu ba kemo surikamu kwara tulu ne hatu vai hokinia hi.

⁷I God u kwarekita kwara tana kokona tana kwareki a bulana tangaloi, hete kwara tana vai a doridori hati.

⁸Huri na kinau vano hi a tangaloi hinea rau bega rongohuri na leo vano hi, rahe bega te kina tangaloi kehekeheki, vae rau bega ki God aia hinea mo toko hileki na nona Tanungwe Kokona lakwakamu.

⁹He taritarisa tea kwara na uli lakwakamu kwara tulu ne lagwa mai rabelamiu a tangaloi hauhuri, huri i kamu sibomiu tulu huhui ti God ba kwara tulu ne lagwalagwa maikamu.

¹⁰I kamu tulu vosangi na doridori hokinia hi lakwa na rabela savia laliki lolo vanua Masetonia. U karea rabela. Hikani keu seseaka hurikamu kwara tulu ne vano hokinia, te vakevake.

¹¹Tulu vai na domimiu ne madi kwara tulu ne toka lo magemuana, tulu ne tagahuri na nomiu bolokiana kehekeheki, vake tulu ne boloki karakara huri na nomiu tokaana, hokinia keu viti vunu ba lakwakamu tuai.

¹²Lo halaki hini aira hinea rahe hauhuri te lui Jisas, vae rana tagaikamu kwara i kamu a tangaloi bakoto vohoki. Vunu tulu nehe domi tea tilo tangaloi dolua kwara tulu ne lai te kinau tiura hinea tulu mo gwanugwanu luga.

¹³Rabela. Keu lengaia kwara tulu ne kikilai tabetabeki na leo na vitikareaki hurira hinea rau mate ba. Kehe lengaia tea kwara vae tulu ne rongo hati hurira hoki na tangaloi ratuaki, hinea rahe tau na domiga te tilui God kwara a tangaloi rana ahi taliku, vae rau rongo hati huri na noga tangaloi hinea rau mate.

¹⁴I kita tau hauhuri kwara i Jisas u mate vae u maraka taliku, vae huri hi tau hauhuri vake kwara vae aira hinea rau mate ba rau hauhuri luna, vae i God ne lavira mulemai taliku haragoki mai Jisas.

¹⁵A huhuiana na noda Hugwe* aia hika kemo toko huhuikamu kinia. I kita hi tau ahi radu nga lo rani hinea a Hugwe ne mulemai taliku, vae tanahe vano lai tea tomuakinira hinea rau mate ba.

¹⁶I God ne kwaha, a tangaloi rana rongo na dilao na kaitomuaki na kaihora lolo taetae, a tavui lakua bulai God ne tangi, vunu a Hugwe ne hivo tina taetae. Vae a tangaloi hinea rau hauhuri lui Kraes* vunu ramo mate, rana maraka tomua.

¹⁷Vunu vaki takuni, i kita hinea tau ahi tarisaki lo rani hi, i God neri lavikita tagaulu haragoki maira. Tana vano vaki lolo taenalangi kwara tana bulu mana Hugwe lo mahaleki. Vae hokinia tana hugu mana Hugwe vaki tuai.

¹⁸Vae huri hi u taritarisa kwara tulu ne hagohago maikamu kina leo aira vano hi.