Read West Ambae 1 TESALONAEKA 5 Bible Online

1 TESALONAEKA 5 - West Ambae bible

1 TESALONAEKA 5

¹Rabela. He taritarisa tea kwara kena uli lakwakamu huri na rani mana taro lolona hinea a kinau aira vano hi rana mule luna,

²huri i kamu sibomiu tulu kikilai kareaki kwara a Rani nona Hugwe* [4] ne maravuti ne vai na tangaloi rana maruti hoki na tangaloi na babalua mo vanamai lolo bongi.

³Lolona a tangaloi ramo toko viti kwara, “Doluaki na kinau rau eno butu, vake rau eno karea,” lo taro hi vae a magarakiana lakua ne kihira ne magarakinira. Vae a rongoana hati hi ne kihira vakatukwale hoki na kakadia hi mo vai na vavine kwara ne hago natu, vae ranahe ahi te tiua.

⁴Rabela. I kamu, tulu he hugu te lolo dodokaki, vae a Rani hi nehe vaikamu tea kwara tulu ne maruti kinia kwara hoki na tangaloi na babalua mo vaikamu tulu mo maruti kinia.

⁵I kamu vunu a tangaloi na leleha, a tangaloi na rani. I kita hete tangaloi na bongi diko a tangaloi na dodokaki.

⁶Vae huri hi he taritarisa tea kwara tana maturu hoki na tangaloi ratuaki, u taritarisa kwara tana rada a gwatuda ne karea.

⁷Lolo bongi a tangaloi rau maturu, vunu vake lolo bongi a tangaloi rau inuinu rau reraka kinia.

⁸Vae i kita a tangaloi na rani, u taritarisa kwara a gwatuda ne karea. U taritarisa kwara tana kwiribibi na hauhuriana mana lagwaana. Raru ne hoki na kaititiba na gwagwa hinea u tu koro na venevene. Vake tana tau na domida lui God kwara ne vakahikikita. Aia hoki na kaikwokwori na gwatu hinea a tangaloi rau huni lo taro na vuro.

⁹I God he mataikita tea kwara tana rongo hati kina nona lologute. Vae u mataikita kwara ne vakahikikita lalahi na noda Hugwe i Jisas Kraes*.

¹⁰I Jisas aia u mate hurikita kwara ne vakahikikita kwara lolona ne mulemai taliku, diko tau ahi diko tau mate ba, vae tana hugu haragoki maia.

¹¹Huri na kinau aira vano hi tulu kwahakwaha maikamu kwara tulu ne vai na domimiu ne madi, tulu ne hagohago maikamu hokinia hini tulu mo toko vai hika.

¹²Rabela. Keu kwahabibikamu kwara tulu ne domi mavakinira hinea ramo toko boloki maikamu, aira hinea a noda Hugwe* u mataira kwara rana tomuakikamu rana huhuikamu.

¹³Tulu domi mavakinira karakara tulu lagwa maira, huri na bolokiana hinea ramo toko vai. Tigwaravu tulu bulubulu maikamu ne karea, tulu hatu viroviroro.

¹⁴Rabela. Keu seseaka hurikamu kwara tulu ne kwaha luga hinea rau huguhugu vuroki, tulu rakati na domi na tangaloi hinea rau matamataku rana huira, tulu hago maira hinea rau keokeo, a domimiu ne bua mana tangaloi doluaki.

¹⁵Tulu tagahuri ne karea diko te tangaloi u vai kinau he karea tea vovohikamu, hete kwara te katukwale ne gele lakwae taliku. Tulu vai na domimiu ne madi kwara tulu ne vaivai karea maikamu mana tangaloi doluaki.

¹⁶Tulu ne lagwalagwa ne havutikamu tigwaravu.

¹⁷Tulu tiutangaroa tigwaravu.

¹⁸A kinau savia hinea ramo toko vanamai vaki maikamu vae tulu ne lagwaki God luna, huri i God u lengaia kwara i kamu hinea tulu hariki lui Jisas Kraes* tulu ne toko vai kwehi.

¹⁹Tulu hatu vai kwara tulu ne vakamate na Tanungwe Kokona.

²⁰Tulu hatu domi bulakiki na leo na tangaloi hinea rau duruki na leo rau viti kwara aia a leo durukiana ti God.

²¹Vae tulu tagataga ne karea lo kinau savia tomua, tulu ne hagobibi na kinau hinea rau karea,

²²vae a kinau vatahae hinea rau hati tulu ne hatu masinge luga.

²³A tangaroa karea hika lakwakamu. I God hinea a gwataki na noda magemuana ne vaikamu tulu ne bakoto tulu ne kokona. Aia ne kwiribibikamu ne karea kwara a tanungwemiu mana domimiu mana tarabehimiu rana eno ne karea, a hatiki ne tikei lumiu lo taro hinea a noda Hugwe i Jisas Kraes ne mulemai taliku.

²⁴Tulu ne hauhuri lai lui God hinea u kwarekamu, vae aia ne vai luna.

²⁵Rabela. Tulu tiutangaroa hurikami vake.

²⁶Tulu hahavaki savi na tangaloi hauhuri kina boboniana [5] hokinia tulu vituatua.

²⁷Nu seseaka hurikamu lo hina na noda Hugwe kwara tulu ne valuki na leta hika lakwa na tangaloi hauhuri savia.

²⁸A tangaroa karea hika lakwakamu. A noda Hugwe i Jisas Kraes ne hago maikamu kina nona domi tabetabe lakua.