Read West Ambae 2 TESALONAEKA 1 Bible Online

2 TESALONAEKA 1 - West Ambae bible

2 TESALONAEKA 1

¹I nau i Pol, mai Saelas mai Timoti, i kami keu uli na leta hika lakwakamu hi a kwarelua* noi Kraes* lo gwatuivanua lakua Tesalonaeka. I kamu a tangaloi noi God i Tamada mana Hugwe* i Jisas Kraes.

²A tangaroa karea hika lakwakamu. I God i Tamada mana Hugwe i Jisas Kraes raru ne hago maikamu kina nogaru domi tabetabe lakua, vake raru ne bete na magemuana ne eno maikamu.

³Rabela. Tigwaravu keu rongo kwara u taritarisa kwara kena lagwaki God hurikamu. U taritarisa vohoki kwara kena vai hokinia hi huri tigwaravu a nomiu hauhuriana u tuku huira vakevake, vunu vake a nomiu lagwaana hurikamu muleki u tuku lakua vakevake.

⁴Vae huri hi lolona kemo kwaha mana kwarelua* noi God laliki, keu tuku kwaha domidomikami maikamu. Keu viti lakwara kwara a tangaloi rau tuku vai bulakikikamu, tulu hagwe na rongoana hati rusa, vae tulu tu madi, a nomiu hauhuriana he sovi tea.

⁵Savi na kinau vano hi rau vosangi kwara i God u tiro haro na doridori na tangaloi savia lo hala bakoto. Hikani a tangaloi rau tuku vai bulakikikamu huri i God u kwareki a nomiu Hugwe Lakua, vae lalahi na nomiu rongoana hati hi, ne vaikamu tulu ne taritarisa kwara aia ne hugwe korokamu.

⁶I God ne vai ne bakoto, ne gele lakwara hinea rau vai bulakikikamu,

⁷vae ne vaikamu hinea tulu rongo hati hikani tulu ne mabu haragoki maikami tina rongoana hati. Ne vai kwehi lo taro hinea a Hugwe* i Jisas ne vanamai tina taetae ne maravuti kikita mana nona kaihora maira tina taetae hinea rau huira, vae tana tagaira.

⁸Ne vanamai mana kabu sea, vae ne vai kadi na tangaloi hinea rau bega ki God, vake rahe rongohuri na Roro Karea te hinea u viti huri na noda Hugwe i Jisas.

⁹I God ne vai kadira lo Rani hi, [1] ne magarakinira vaki tuai a gwereki tikei. A noda Hugwe ne taura letiu ranahe tu koro na nakona te taliku, vake ranahe tagai na hahaviada na nona huirana tea.

¹⁰Lo Rani hi i Jisas ne mulemai kwara a nona tangaloi savia hinea rau hauhuri luna, rana vosangi na nona karekarea tivarea, rana domi mavakinia. Lo Rani hi i kamu vake tulu ne bulu maira huri tulu hauhuri ba lo leo hinea kemo vitia lakwakamu.

¹¹Vae huri hi tigwaravu keu tiutangaroa hurikamu, keu uduhuri kina noda God kwara ne vaikamu tulu ne taritarisa kwara tulu ne huri na bohiana hinea u kwarekamu kwara tulu ne toka luna. Keu uduhuri kinia kwara ne hago maikamu kina nona huirana kwara tulu ne vai vatavataha na kinau karekarea hinea tulu lengaia kwara tulu ne vai, vunu vake kwara tulu ne vai rovonaki na bolokiana savia hinea tulu mo toko vai, huri tulu hauhuri luna.

¹²Hikani huri a noda God mai Jisas Kraes* a noda Hugwe* raru tuku hago maikamu kina nogaru domi tabetabe lakua, i kamu tulu ne tabe hakeki na hina i Jisas, vae aia ne tabe hakekikamu.