Read West Ambae 2 TESALONAEKA 2 Bible Online

2 TESALONAEKA 2 - West Ambae bible

2 TESALONAEKA 2

¹Rabela. U karea kwara tulu ne domidomi lo mulemaiana na noda Hugwe* i Jisas Kraes*, vake tulu ne domidomi luna hika kwara ne mulemai ne lavikita tana bulu haragoki maia.

²Nu kwahabibikamu kwara tulu hatu malamalaruru, a domimiu mo sala, vake tulu hatu tiraki na tangaloi ramo vai na domimiu mo kilukilu kina leo hinea ramo vitia kwara a Rani nona Hugwe [2] u maravuti ba. Diko tulu rongoa te lo leo hinea a tangaloi rau viti kwara a leo durukiana ti God, diko tulu rongoa te lo heretuva, diko te lo leta hinea rau viti kwara i kami keu ulia, vae tulu hatu mataku.

³Tulu hatu tiraki na tangaloi ramo sinakamu hokinia hi, huri a Rani hi nehe vanamai te tomua. Vae tomuaki a tangaloi rana maraka rana bega ki God rana tu vovohia. Aia hi a taro ki rovonaki hinea a tangaloi rana vai kwehi. Vunu vake a Tangaloi hinea u Galo lo Tangwata* noi God vae ne vosangia tivarea. Aia hi vae ne sala lolo kabu na magarakiana.

⁴Aia ne bena kina kinau savia hinea a tangaloi rau lai noga mavakiana lakwara, mana kinau hinea a tangaloi rau kwarekinira kwara a noga takaro, vae ne tu vovohira. Aia ne tabe hakekinia sibona kwara aia ne aulu sileti na kinau doluaki, vunu vake ne vano ne hugu lolo Ingwa Kokona noi God, ne viti kwara aia i God kareaki.

⁵?Tulu he domihagwe tea? Lolona nomo hugu maikamu nu viti savi na kinau vano hi lakwakamu.

⁶Vae a kinau katukwale u tu koro na kinau vano hi kwara ranahe vanamai te hikani, vae tulu kikilai na kinau hi ba. Karea, lo taro bakotoki a Tangaloi hi hinea u Galo lo Tangwata noi God ne vosangia tivarea.

⁷Hikani a bohiana hinea a tangaloi rau galo lo Tangwata noi God u tuku vano nga mo toko huira vakevake, vae u eno tavuniki, vae i kita tau kikilaia kehekeheki huri i God mo matangwasarakinia lakwakita. Vae a kinau vano hi ranahe mule te luna tarisaki lo taro hinea aia hi u tu korora, i God ne lavia letiu.

⁸Vunu a Tangaloi hi hinea u Galo lo Tangwata noi God ne vosangia tivarea. Vae lolona a Hugwe i Jisas ne vanamai ne horo tiluna ne mate. Lolona a hahaviada nona Hugwe ne maravuti hinea ne kwaka karakara ne magaraki na tangaloi hi.

⁹Vae lolona hi a Tangaloi hi hinea u Galo lo Tangwata noi God ne vosangia tivarea, ne vanamai lo huirana noi Setano*, vae ne vai na vaisea gwatu na rusa mana kaivosangi kurakura mana idilakiana.

¹⁰Aia ne sina na tangaloi hinea vae rana sala, kina sinasina hati vatahae. A tangaloi vano hi rana sala huri rau bega kina vitikareaki rahe lagwa te maia. Vae a vitikareaki aia hi vohoki a hala kwara i God ne vakahikinira kinia.

¹¹Vae huri na bohianaga hi, i God u vaira ramo vano rerera vakevake kwara rana hauhuri lo leo kurakura rana domi kwara rau kareaki.

¹²Vae a tangaloi savia hinea rahe hauhuri tea lo vitikareaki rau lagwa mana hatiki, i God ne arekinira huri, kwara vae rana sala.

¹³Rabela. A noda Hugwe* u lagwa maikamu haburu, vae i kami keu rongo kwara u taritarisa kwara kena lagwaki God tigwaravu hurikamu. Lo vanuamiu i kamu a tangaloi tomua halaradu hinea i God u mataikamu kwara tulu ne hauhuri luna kwara ne vakahikikamu. [3] Mo vakahikikamu kina huirana na nona Tanungwe hinea u vaikamu tulu mo kokona tulu mo kwareki a nona, vunu vake mo vakahikikamu huri tulu hauhuri lo vitikareaki.

¹⁴Lalahi na Roro Karea hinea keu heretuvakinia lakwakamu, i God mo kwarekamu kwara ne vakahikikamu tulu ne kwareki a nona. Vake u kwarekamu kwara tulu ne bulu mana noda Hugwe i Jisas Kraes* lo nona karekarea na taetae, vae a karekarea hi ne kwareki a nomiu vake.

¹⁵Karea rabela, tulu ne tu ne madi tulu ne kwiribibi na vitikareaki hinea keu huhuikamu kinira lo nomai heretuva, vunu vake lo leta keu ulia lakwakamu hinea tulu lavia ba.

¹⁶I God i Tamada u lagwa maikita haburu. Aia u hago maikita kina nona domi tabetabe lakua vae tigwaravu u vai na domida rau huira, rahe sovi tea, vake u vaikita tau rongo karea huri tau tau na domida u madi luna. Vae a tangaroa karea hika lakwakamu. A noda Hugwe i Jisas Kraes, aia mai Tamada i God

¹⁷raru ne rakati na domimiu rana huira vakevake, raru ne vaikamu tulu ne huira kwara a nomiu bolokiana savia mana nomiu leo savia rana karea tigwaravu.