Read West Ambae 2 TESALONAEKA 3 Bible Online

2 TESALONAEKA 3 - West Ambae bible

2 TESALONAEKA 3

¹Rabela. Na gweregwereki na nogu leo kina leo aira hika. Tulu tiutangaroa hurikami kwara a leo na noda Hugwe* ne kwalao heheri vataha na mahagweki, vunu vake kwara a tangaloi rana domi mavakinia hokinia hi i kamu tulu mo domi mavakinia.

²Vunu vake tulu tiutangaroa kwara i God ne tu korokami kwara a tangaloi hinea rau hati haburu ranahe vai bulakikikami tea, huri hete tangaloi savia kwara rau hauhuri lui Kraes*.

³Vae i kita tau hauhuri lai lo noda Hugwe kwara ne kwiribibikita tigwaravu. Aia ne vai na domimiu rana huira, ne kwiribibikamu ti Setano*.

⁴Vae a Hugwe u vaikami keu hauhuri lumiu. Keu hauhuri kwara hikani tulu vai a havakinau hinea keu viti lakwakamu, vunu vake kwara tulu ne vano nga luna.

⁵A tangaroa karea hika vake lakwakamu. A Hugwe ne tomuakikamu kwara tulu ne rongo kikilaki na lagwaana noi God, vunu vake kwara i kamu tulu ne tu ne madi a domimiu ne bua, hokinia i Kraes u tu madi a domina u bua.

⁶Rabela. Keu seseaka hurikamu lo hina na noda Hugwe i Jisas Kraes* kwara tulu hatu bulu mana tangaloi savia lo nomiu bulubulu hinea rau tuku huguhugu vuroki rahe boloki tea. Aira hi rahe huri na nomai leo tea hinea keu vitia lakwakamu ba.

⁷I kamu tulu kikilai ba kwara u taritarisa kwara tulu ne huri na tanoi-garumai. Lolona keu hugu maikamu kehe huguhugu vuroki tea.

⁸Kehe tiraki na tangaloi tea kwara rana tagahurikami hinea kehe volira tea, vae keu boloki ki kabamai u rahakikami haburu. Keu boloki rani bongi, huri kehe lengaia tea kwara kena tau na hagohago mava luna kwara te katukwale.

⁹Keu vai kwehi, hete huri kwara kehe taritarisa te kwara kena viti lakwakamu kwara tulu ne tagahurikami, vae huri keu lengaia kwara kena vosangi na hala lakwakamu kwara tulu ne huria.

¹⁰Lolona keu hugu maikamu keu tuku viti lakwakamu kwara “Ihe hi u bena kwara ne boloki ne hatu kanikani.”

¹¹Keu viti kwehi huri keu rongo kwara a tangaloi tuaki tikamu rau huguhugu vuroki, vake rau tuku kwali hahara na boloki nona tangaloi, vae aira rahe vai na kinau te vohoki.

¹²Lo hina na Hugwe i Jisas Kraes keu viti na leo hika lakwara, keu kwahabibira kwara rana toka ne taritarisa, vake ne rahakinira huri na noga tokaana.

¹³Vae i kamu rabela, tulu hatu keokeo lo nomiu bolokiana karea.

¹⁴Diko te tangaloi eia lo vanuamiu hinea he rongohuri na leo te hinea keu hokakinia lakwakamu lo leta hika, tulu tagaia tulu domidomi-bibia, tulu hatu bulubulu maia, vae ne maemae.

¹⁵Vae tulu hatu vaia hokinia kwara aia a nomiu tavaluivuro, aia tulu kwahabibia huri aia i belamiu lui Kraes.

¹⁶A tangaroa karea hika lakwakamu. Tigwaravu a Hugwe hinea a gwataki na magemuana ne betekamu kina magemuana lo hala savia, vake a Hugwe hi ne toka maikamu doluaki.

¹⁷A leo hika nu ulia kina kabagu. I nau i Pol nu hokaki nogu lagwaana lakwakamu. Tigwaravu lo leta savia hinea nomo ulira nu uli na hinagu luga hokinia hi. Hika a bihugu.

¹⁸A tangaroa karea hika lakwakamu. A noda Hugwe* i Jisas Kraes* ne hago maikamu doluaki kina nona domi tabetabe lakua.