Read West Ambae 1 TIMOTI 1 Bible Online

1 TIMOTI 1 - West Ambae bible

1 TIMOTI 1

¹I nau i Pol, a kaihora* kokona noi Jisas Kraes* huri i God a noda Kaivakahi, mai Jisas Kraes hinea tau tau na noda domidomi tiluna, i rarua raru horeau kwara na kwali na hina hi.

²Nu uli na leta hika lakwako Timoti, hinea lo hala na hauhuriana i nigo i natugu bakotoki. A tangaroa karea hika lakwako. I God a Tamaki mai Jisas Kraes a noda Hugwe*, raru ne hago maiko kina nogaru domi tabetabe lakua, raru ne hakaviko, vake raru ne bete na magemuana ne eno maiko.

³Hokinia nu kwaha maiko ba tomua, nomo seseaka huriko, kwahaia hinea i nau lo halagu vaki lo vanua Masetonia, nu lengaia kwara kona hugu lo gwatuivanua Evesas. A tangaloi tuaki lo gwatuivanua hi rau tuku huhui na tangaloi lo huhuiana hinea rahe bakoto tea, vae kona surira kwara rana hatu vai hokinia hi taliku.

⁴Kona viti lakwara kwara rana tiraki na dekudekuni tuai, vake rana hatu liuki huri na tubutubu vanamai evina kinia. A kinau aira vano hi rau vai na tangaloi ramo viroro, rahe hago te mana domidomi noi God. A hauhuriana kehekeheki ne vaikita tana kikilai na domidomi hi.

⁵Nu kwaha maiko kwehi huri kwara a noga lagwaana huri na tangaloi ne lakua vakevake. A lagwaana hi u vanamai tina domi ngwasara lolona hi a tangaloi mo rongo lo tarabehina kwara u vai u bakoto, vake u hauhuri kareaki.

⁶A tangaloi tuaki rau habea tina hala bakoto hi, ramo oda ramo toko kwahakwaha lo kinau vuroki vohoki.

⁷Rau lengaia kwara rana huhui a tangaloi kina Tangwata* noi God, vae rahe kikilai na kinau tea hinea rau tuku vitira. Vake a kinau hinea rau vitira kwara rau kikilaira karea, vae rahe kikilaira te vohoki.

⁸I kita tau kikilai kwara a Tangwata u karea diko a tangaloi u boloki luna lo halaki.

⁹Vae u taritarisa kwara tana kikilai kwara a tangwata rahe rivuana tea huri na tangaloi hinea rau bakoto, aia rau rivuana huri na tangaloi hinea rau galogalo leo mana tangaloi hinea rau rongo bulabula. Rau rivuana huri na tangaloi hinea rahe hauhuri te lui God, maira hinea rau tuku vai na hatiki, maira hinea rahe toko tiutangaroa tea, maira hinea rau domi bulakiki God. A tangwata rau rivuana huri na tangaloi hinea rau kwohi matei ratamaga diko i raretahiga, maira hinea rau ua mate tangaloi.

¹⁰Rau rivuana huri na ngwera mana vavine hinea raru tiutokakivanua vae raru he laki tea lo halaki, mana ngwera hinea u maturu mana ngwera. Rau rivuana huri na tangaloi hinea rau balu tangaloi kwara rana hokakinira rana lai mane* luga, maira hinea rau kurakura, maira hinea rau kurakuraki leo lo tanotano na arekiana, maira hinea rau vai na kinau te dolua vake, vovohi na huhuiana na vitikareaki.

¹¹A huhuiana na vitikareaki hi u vanamai tina Roro Karea na huirana lakua noi God, hinea aia a God na huirana u toka u taritarisa, u lagwa tigwaravu. A Roro Karea aia hi i God u taua lo kabagu kwara na kwalahakinia tivarea.

¹²I nau nu lagwaki i Jisas Kraes* a noda Hugwe* hinea u bete huirana lakweau huri na nogu bolokiana hika. U tagaiau hokinia nu taritarisa kwara na boloki nona, vae mo rivukiau kwara na vai na bolokiana hi,

¹³venaha diko tomua nu kwahakwaha hati vovohia, nu vai bulakikinia, nu kwaha bulakikinia vake. Vae i God u hakaviau huri lolona nahe hauhuri te luna radu, vae nahe kikilai na kinau te hinea nomo toko vai.

¹⁴Vae hikani a noda Hugwe u hago maiau haburu kina nona domi tabetabe lakua hinea u lakua lengalenga, mo hago maiau kwara na hauhuri luna, vake kwara nana lagwa maia, vunu nana lagwa mana tangaloi ratuaki. Aia hi a bohianada hinea tau hariki lui Jisas Kraes.

¹⁵A leo hika u kareaki vae u taritarisa kwara tana hauhuri luna tigwaravu. I Jisas Kraes u vanamai vaki lo varamana kwara ne vakahiki na tangaloi vaivai hati. I nau nu hati siletira aira vunu,

¹⁶vae i God u hakaviau mo vai tabetabekiau kwara i Jisas Kraes ne vosangi kwara a domina u bua vohoki vovohiau mo boloki lugu. Vae huri hi u vosangi na doridorina lakwa na tangaloi savia hinea rana hauhuri luna takuni tiau, rana lavi na ahiana noi God vaki tuai.

¹⁷I God aia a Hugwe Lakua hinea u hugwe koro na tangaloi, vae ne hugwe korora vaki tuai a gwereki tikei. Aia i Tatoka hinea nehe mate lai tea. I kita tahe taga lavia tea vae aia kehekeheki i God, a takaro tikei vake. Tana domi mavakinia, tana tabe hakeki na hinana vaki tuai a gwereki tikei. Amen*.

¹⁸Natugu Timoti. Hika nogu leo na viti lakwako hinea u taritarisa mana leo durukiana hinea a tangaloi mo durukinia huriko tuai. Kona kwiribibi na leo aira vano hi vae rana hago maiko kwara kona huira, kona vai vuro vovohi na hatiki vae kona guia.

¹⁹Kona vai vuro ne karea kwara a nomu hauhuriana nehe sovi tea, vake kona rongo lo tarabehimu kwara kohe vakasile tea. A tangaloi tuaki rau rongo lo tarabehiga kwara rahe bakoto tea vae rahe domi huri tea, vae huri hi a noga hauhuriana u sovi.

²⁰I Haemenaeas mai Aleksada i rarua kairua tiura hi, vae nomo taurarua tilo kaba i Setano* kwara ne vai kadirarua. Nomo vai kwehi kwara na huhuirarua, vae raru ne taga, raru ne kikilai, raru ne tiraki na doridorigaru hi, raru mo toko kwahakwaha hati vovohi God.