Read West Ambae 1 TIMOTI 3 Bible Online

1 TIMOTI 3 - West Ambae bible

1 TIMOTI 3

¹A leo hika a leo kareaki. Diko te tangaloi u lengaia haburu kwara rana rivukia ne kwareki a kaitomuaki lo kwarelua* aia u lengai na bolokiana karea lengalenga.

²U taritarisa kwara a kaitomuaki lo kwarelua ne kwareki a tangaloi hinea u loliloli u taritarisa, a tangaloi ranahe hagwe na hatiki te luna. I vavinehina ne katukwale vohoki. [2] A kaitomuaki hi ne hatu inu haburuki na inuinu hati, ne kwiribibia sibona, a bohibohianana ne taritarisa. Ne lagwa kwara ne lai a vanamaiana vaki tatana, vake ne vai lai kwara ne huhui na tangaloi.

³A tangaloi na inuinu, diko a tangaloi na vikwali, nehe kwali lavi na bolokiana te hi. A tangaloi hinea ne kwalia ne kwareki aia a tangaloi magemu, he tuku viroviroro tea, vake he domi huri na mane* te haburu.

⁴U taritarisa kwara a tangaloi hi ne kwareki a tangaloi hinea u hugwe koro i vavinehina mai raranatugaru u karea, hinea u vai lai kwara ne vai raranatuna rana rongohuria, rana domi mavakinia tigwaravu.

⁵?Diko a tangaloi he vai lai tea kwara ne hugwe koro i vavinehina mai raranatugaru ne karea, vae ne tagahuri kworohoki na kwarelua noi God?

⁶A tangaloi hinea mori mulemai ki tangaloi noi Kraes* hi nga nehe kwali na bolokiana te hi, huri vae ne mai domidomia, vae i God ne arekinia hokinia mo areki i Setano*.

⁷Vunu vake a tangaloi hinea ne kwali na bolokiana hi aia ne kwareki a tangaloi hinea a tangaloi tavalavarea tina kwarelua rau domi mavakinia. Lo hala hokinia hi a tangaloi ranahe kwahakwaha hati te vovohia, ranahe vai na maemaeana te lakwae, vae nehe sovi tea tilo vuna noi Setano.

⁸Lo hala hokinia hi vake, a kaihago lo kwarelua* ne kwareki a tangaloi bakoto hinea a leona u kareaki tigwaravu. A tangaloi hinea u inu haburuki na inuinu hati, diko a tangaloi hinea u domidomi haburu lo mane, nehe kwali lavi na bolokiana te hi.

⁹U taritarisa kwara a tangaloi hinea ne kwalia, ne hauhuri ne madi lo vitikareaki hinea tomua u eno tavuniki, vae hikani i God u matangwasarakinia ba lakwakita, vae tau hauhuri luna, vake ne rongo lo tarabehina kwara u vai u bakoto.

¹⁰A tangaloi hinea ne vai na bolokiana hi, a tangaloi lo kwarelua rana kahi haro na doridorina tomua, vunu diko u taritarisa ne rivukiana.

¹¹I vavinehina vake a doridorina ne taritarisa, ne hatu vitiviti huri tangaloi, vake ne hatu inu haburuki na inuinu hati. [3] A vavine hi ne kwareki a tangaloi hinea tau hauhuri lai luna tigwaravu.

¹²A kaihago lo kwarelua, i vavinehina ne katukwale vohoki. [4] Vake u taritarisa kwara a kaihago hi ne kwareki a tangaloi hinea u vai lai u hugwe koro raranatuna u karea, mana tangaloi savia lo nona tokakivanua.

¹³A kaihago hinea rau boloboloki karea, a tangaloi rana domi mavakinira, vunu vake aira rana vai lai rana viti huri na noga hauhuriana lui Jisas Kraes* lakwa na tangaloi, vae ranahe mataku tea.

¹⁴Hikani nu uli na leo hi lakwako, nu domidomi luna kwara nana venatu vaki maiko nehe tuai tea.

¹⁵Vae diko nahe venatu lai te heheri, a leta hika nu ulia kwara nana viti a hava hala u taritarisa kwara tana huria hinea i kita i raranatu i God. I raranatuna hi aira a kwarelua noi God Tatoka hinea nehe mate lai tea. A kwarelua* hi aia u kwareki a kaitura na vitikareaki, u kwiribibia u karea kwara nehe sovi tea.

¹⁶Kareaki, a gwataki na noda hala na hauhuriana u haburu vohoki, vae hikani i God u matangwasarakinia lakwakita. A gwataki hi u viti kwara, “I Kraes* hi, i God mo vaia mo mulemai kina tangaloi hokikita kwara tana kikilaia. A Tanungwe Kokona u hago leo luna u viti kwara, ‘A tangaloi hi a tangaloi bakoto,’ vake a kaihora tina taetae rau tagaia. A tangaloi tavalavarea tina gwaloana noi Isrel* rau rongo na Roro Karea huria. A tangaloi laliki lo varamana rau hauhuri luna. Vae i God mo lavia tagaulu vaki maia lolo hahaviada na taetae.”