Read West Ambae 1 TIMOTI 5 Bible Online

1 TIMOTI 5 - West Ambae bible

1 TIMOTI 5

¹A ngwera hinea u ngwarasea kona hatu kwaha luna haburu, vae kona kwaha tabetabeki maia hokinia kwara aia i tamamu vohoki. A ngwalagelo ngwera kona kwaha maira hokinia kwara aira i ratuamu vohoki.

²Vunu a ravavine ngwarasea kona kwaha maira hokinia kwara aira i raretahimu. A ngwalagelo vavine kona kwaha maira hokinia kwara aira i rahagwemu vohoki, vake kona bohibohi maira ne taritarisa lo hala ngwasara.

³Kona domi mavaki na gwati vavine hinea u hugu aia kahea, a nona vakabela tikei kwara ne tagahuria.

⁴Vae diko a gwati i raranatuna eia, diko i ravakabuina eia, u taritarisa kwara aira rana huhui kwara a bolokiana hinea a tangaloi noi Kraes* rana vai tomua sea aia hika, kwara rana tagahuri i rabelaga. Rana vai kwehi hokinia kwara rau vai bukuga lakwai raretahiga mai ratamaga mai ratubuga, huri a doridori hi i God u lagwa luna.

⁵Vae a gwati hinea u hugu aia kahea, i belana tikei kwara ne tagahuria, aia u tau na nona domidomi u madi lui God. Vunu rani, bongi, u tuku tiutangaroa kwara i God ne hago maia.

⁶Vae a gwati hinea u domidomi tigwaravu lo kinau kehekeheki hinea rana vaia ne rongo karea ne lagwalagwa, aia u ahi radu nga vae aia hokinia kwara u mate ba.

⁷Kona viti na leo aira vano hi lakwara, kona huhuira kinira kwara rana vai luna, vunu a tangaloi ranahe hagwe lavi na hatiki te luga.

⁸Vae a tangaloi hinea u bena kwara ne tagahuri rabelana, vake silesiletia hi u bena kwara ne tagahurira hinea rau toka tatana, aia u vosangi tivarea kwara u tiraki na hala na hauhuriana, he kwiribibia tea, vae a doridorina u hati sileti na doridori na tangaloi hinea rahe hauhuri te lui God.

⁹Diko a gwati a hukaona he maravuti te ngavu kaiono radu nga, kona hatu uli na hinana tilo buku* hinea rau uli na hina na gwati luna. A gwati hinea kona ulibibi na hinana, i tuana ngwarasea katukwale vohoki,

¹⁰vake a hinana vae ne karea huri u tuku vai a boloki rau karea. [6] Aia u kwareki a vavine karea hinea u hakweki i raranatuna u karea tarisaki ramo ngwarasea, vake u lagwa mo lai tabetabeki na vanamaiana vaki tatana. Aia u tuku kwasu a garu [7] na tangaloi noi God, u hago maira hinea rau rongo hati, vake u tau na domina u madi lo bolokiana karea savia.

¹¹Kona hatu ulibibi na hina na gwati hinea rau ngwalagelo, huri rana domidomi haburu lo lakiana, vunu ranahe domidomi haburu te lui Kraes*, vae rana lengai na lakiana.

¹²Vunu a tangaloi rana arekinira huri rahe kwiribibi na noga tulikileo te tomua.

¹³Vunu vake rana lavi na bohiana hinea rana mahuki a taro rana vano vatavataha na matakihala, vae silesiletia hi rana vitiviti huri tangaloi, rana kahi haro na kinau hinea he taritarisa tea kwara rana viti huri, vae rana vitira tivarea.

¹⁴Nu domi kwara u karea siletia hi kwara a gwati hinea rau ngwalagelo rana laki taliku, rana hago natu, rana tagahuri na noga tokakivanua. Vae lo hala hi a tangaloi hinea rau bega kikita ranahe vai lai tea kwara rana hagwe na hatiki te luda kwara rana viti hurikita.

¹⁵Nu viti kwehi huri a gwati tuaki rau halebohi ba tina hala karea, ramo huri i Setano*.

¹⁶Vae diko a vavine hinea aia a tangaloi noi Kraes a nona vakabela tuaki aira a gwati, u taritarisa kwara ne tagahurira, vae nehe tau na hagohago mava te lo kwarelua* maira. Vunu a kwarelua rana tagahuri na gwati hinea i rabelaga tikei.

¹⁷A ngwarasea* lo kwarelua* hinea rau boloki u madi ramo tomuaki na tangaloi, u taritarisa kwara a kwarelua rana domidomi luna hika kwara a ngwarasea hokinira hi rana lai kaivoliga vakairua. A leo hi u taritarisa vohoki mana tangaloi hinea u rahakinira lo bolokiana na heretuva mana huhuiana,

¹⁸huri a Uliuli* Kokona u viti kwara, “Diko tulu ne lavi na buluki kwara ne bile rasurasuki na biu na uit* tina viuki hinea tulu tai surisurira ba, tulu hatu gunu na kwakwana. Tulu tirakinia ne kanikani.” Vunu vake u viti kwara, “A tangaloi hinea u boloki, u taritarisa kwara ne lai kaivolina huri.”

¹⁹Diko te tangaloi katukwale u viti na leo te vovohi na ngwarasea te katukwale lo kwarelua kona hatu rongohuria. Vae diko kairua kaitolu rau hago leo luna, a leo hi ne tu.

²⁰Aira hinea rau tuku vai na hatiki kareaki, kona kwaha luga lo nako na tangaloi savia kwara a ngwarasea ratuaki rana mataku.

²¹Lo nako i God, vake lo nako i Jisas Kraes* mana kaihora na taetae hinea i God u mataira, nu haharako kwara kona rongohuri na leo aira vano hi, kona hurira lo hala bakoto. He karea tea kwara kona bohibohi ne dolua mana tangaloi tuaki, vunu kona bohibohi ne dolua vake mana tangaloi ratuaki. Kona bohibohi ne taritarisa maira aira vunu.

²²Ko hatu vaivai heheri kwara kona tatagao lo tangaloi kwara kona rivukia ne boloki noi God. Vake kona hatu bulubulu mana tangaloi lo doridoriga hinea rau hati. Kona kwiribibiko ne karea kwara a bohibohianamu ne ngwasara.

²³Ko hatu inu kwai kehekeheki. I nigo ku lenga tigwaravu, vae huri hi u karea kwara kona inu te waen kelekele kwara ne hago mana tagwangimu.

²⁴A vaivai hati nona tangaloi tuaki rau eno na ngwasara vohoki. Venaha diko i God he arekinira te radu nga, vae a tangaloi rau kikilai ba kwara rau vai na hatiki. Vae a vaivai hati nona tangaloi ratuaki rau eno tavuniki radu nga, vae vaki takuni rana vosangiana tivarea.

²⁵Lo hala hokinia hi, vakarusa a boloboloki karea rau eno na ngwasara vohoki. Vae diko tomua rahe eno te na ngwasara, vae rana vosangiana tivarea.