Read West Ambae 1 TIMOTI 6 Bible Online

1 TIMOTI 6 - West Ambae bible

1 TIMOTI 6

¹U taritarisa kwara a tangaloi boloki [8] savira rana domidomi luna hika kwara u taritarisa kwara rana domi mavaki na noga masi tigwaravu. Rana vai kwehi kwara a tangaloi ranahe kwahakwaha hati tea vovohi na hina i God mana noda huhuiana.

²A tangaloi boloki hinea a noga masi aira a tangaloi hauhuri, rana hatu domi kwara, “A nomai masi aira hoki i ratuamai, vae kenahe domi mavakinira tea.” Aia huri rau boloki kwara rana hago mana tangaloi hauhuri hinea rau lagwa maira haburu, u taritarisa kwara rana boloki ne karea vakevake lakwara. Kona huhui na tangaloi kona kwahabibira kina leo aira vano hi.

³Diko te tangaloi u huhui na tangaloi kina huhuiana dolua, he lengai na huhuiana bakoto tea hinea i Jisas Kraes* a noda Hugwe* u vitira, mana huhuiana hinea u taritarisa mana noda hala na hauhuriana, a tangaloi hokinia hi a domidomina u hati.

⁴U domidomia haburu vae he kikilai na kinau te vohoki. A tangaloi hokinia hi u lengaia kwara ne uduhuri a leo uduuduhuri tigwaravu, u lengaia kwara ne viroro lo leo, vae aia u reraka vohoki. A doridori hi u tuku vai na tangaloi ramo rongo hati a kinau mo kadikadira, rau viroro, rau kwaha bulakiki na tangaloi, rahe hauhuri te lo tangaloi, ramo domi na hatiki vovohira tigwaravu hinea u hati haburu.

⁵Tigwaravu rau tuku viroro mana tangaloi hinea a domidomiga rahe karea tea, rahe kikilai na kinau te hinea rau tuku viti huria, vake rahe kwiribibi na vitikareaki tea. Rau tuku domi kwara a hala na hauhuriana ne vaira rana mulemai kina tangaloi hugwe, a noga mane* ne lakua.

⁶Io kareaki, a noda hala na hauhuriana ne vai na tangaloi rana lavi na kinau rusa, vae hi u viti huri na tangaloi hinea rau lagwa mana kinau hinea a noga eia ba, rahe lengai na kinau te dolua vake.

⁷Tau vora tilo varamana, tahe lavi na kinau te maikita. Tana mule tina varamana, tanahe lavi na kinau te maikita.

⁸Vae diko a kada hinaka eia mana vulavulada, aia hi u taritarisa maikita, vae tana lagwa luna.

⁹A tangaloi hinea rau lengaia kwara rana mulemai kina tangaloi hugwe, tigwaravu a sinasina hati u vaira ramo sovi. A noga lengalengahuri hinea u reraka, vake u tuku magarakinira, aia hoki na vuna hinea mo tavidiri. Vunu a noga lengalengahuri hi u reveira ramo sovi, vae u magaraki na mamaurianaga vohoki.

¹⁰A doridori hinea a tangaloi rau lagwa mana mane haburu aia a gwataki na hatiana savia. A tangaloi tuaki a noga lengalengahuri hati hi u vaira ramo tiraki na hala na hauhuriana. Vae rau tuku vai na kinau hinea u vaira ramo rongo hati haburu.

¹¹I nigo a tangaloi noi God, kona hatu vai na kinau aira vano hi vohoki. Vae kona vai rongo kwara a lolianamu ne bakoto vohoki, kona huri na hala na tiutangaroa hokinia i God u lengaia. A nomu hauhuriana ne huira, a nomu lagwaana ne bua. Kona karohuri vaki lo gwereki, vunu vake kona vai tabetabeki na tangaloi.

¹²Kona vai na vuro karea huri na noda hauhuriana kona huiratakinia. Vae kona lavi na kaitakwe hinea a ahiana noi God vaki tuai, huri i God u kwareko kwara kona kwali na ahiana hi lo taro hinea tuai komo matangwasaraki na nomu hauhuriana u karea lo nako na tangaloi rusa.

¹³Lo nako i God hinea u bete ahiana lakwa na kinau savia, vake lo nako i Jisas Kraes hinea u matangwasaraki na nona hauhuriana u karea lo nako i Ponses* Paelet, na tuliki na leo hika lakwako.

¹⁴Kona vai savi na kinau hinea i God u viti kwara kona vai, kona hatu vakasile luna, vae a tangaloi ranahe hagwe na hatiki te lumu tarisaki lo Rani[9] hinea i Jisas Kraes* a noda Hugwe* ne maravuti a tangaloi rana tagaia.

¹⁵I Kraes, i God ne vosangia tivarea lo taroki bakotoki hinea mo taua. I God u lagwa tigwaravu, aia kehekeheki u hago huirana lo kinau savia. Aia a Hugwe Lakua u hugwe koro na hugwe lalakua savia. Aia a Hugwe na hugwe savia.

¹⁶Aia kehekeheki i Tatoka he mate lai tea. U toka lo hahaviada huira hinea a tangaloi ranahe vano lai te garagarani maia. A tangaloi tikei kwara u tagaia te lo taroki, vake a tangaloi tikei kwara ne tagaia te lo taroki. Vae i kita tana tabe hakeki na hinana tigwaravu, tana matangwasaraki kwara a nona huirana u eno vaki tuai a gwereki tikei. Io kareaki.

¹⁷Kona kwaha ne madi maira hinea a noga vivilagoki u rusa, kwara rana hatu domidomira. Rana hatu tau na noga domidomi lo mane* huri a mane nehe eno tea kwara ne tuai. Vae rana tau na noga domidomi lui God kehekeheki hinea u tuku hokoraki vatavataha na kinau lakwakita kwara tana lagwalagwa luga.

¹⁸Kona viti lakwara kwara rana vai na kinau hinea rau karea, rana kwareki a tangaloi hugwe lo bolokiana karea. Rana beteki na kinau rusa tina noga vivilagoki lakwa na tangaloi kina lagwalagwa.

¹⁹Lo hala hokinia hi aia hokinia kwara rau tau terekaki na kinau karekarea rusa ne kwareki a tutuga hinea nehe kilu lai tea, huri na taro hinea ne vanamai. Vunu rana lavi na ahiana hinea a ahiana kareaki.

²⁰Timoti, kona kwiribibi na kinau savia ne karea hinea i God u tau lo kabamu ba. Kona hatu bulubulu lo kwahakwaha hinea rau kwahakwaha hati vovohi God, diko mana kwahakwaha hati hinea rau tuku viti kwara a tangaloi ne kikikila kinia, vae rau kura vohoki.

²¹A tangaloi rusa rau viti kwara rau lavi na kikikila hi ba, vae huri hi rau vano vakahao tina hala na hauhuriana. A tangaroa karea hika lakwakamu. I God ne hago maikamu kina nona domi tabetabe lakua.