Read West Ambae 2 TIMOTI 2 Bible Online

2 TIMOTI 2 - West Ambae bible

2 TIMOTI 2

¹U karea natugu. Kona huira kina huirana hinea i Jisas Kraes* u betea lakwakita kina nona domi tabetabe lakua huri tau hariki luna.

²A huhuiana hinea komo rongora tiau lolona nomo matangwasarakinira lo nako na tangaloi rusa, kona taura lakwa na tangaloi hinea ku hauhuri lai luga, vake rau taritarisa kwara rana huhui na tangaloi ratuaki kinira.

³I nigo kona rarai kwara kona rongo hati huri na Roro Karea hokinia i nigo a tangaloi na vuro bakoto noi Jisas Kraes.

⁴Lo taro na vai vuro a tangaloi na vai vuro nehe vaivai nona tea, vae tigwaravu ne huirataki kwara ne vai na nona kaitomuaki na vuro ne rongo karea kinia.

⁵Diko a tangaloi hinea u kwalao viviseu u galo lo korokoro na kwalakwalao viviseu hi, vae nehe lai lavi na kaitakwe tea.

⁶Vake a tangaloi hinea u rahakinia haburu lo bulana agoago, u taritarisa kwara aia ne kani na kwaiki tomua.

⁷Ko domidomi lo kinau aira vano hi nomori vitira hi nga vae a noda Hugwe* ne hago maiko kwara kona kikilaira.

⁸Lo Roro Karea hinea nomo heretuvakinia nu viti kwara, “U karea kwara tana domidomi lui Jisas Kraes* tigwaravu hinea u maraka taliku tina mateana, vake aia u gwalo vanamai lo Hugwe Lakua i Devit tuai.”

⁹I nau nomo heretuvaki na Roro Karea, vae huri hi a tangaloi ramo vaiau nomo rongo hati, ramo gwaruau kina seni hoki na tangaloi hinea u tuku galo lo tangwata. Vae a leo i God he gwarubibiana te kina seni.

¹⁰Vae huri hi, venaha diko nu rongo hati lo kinau savia, vae a domigu he sovi tea. Nu lengaia kwara na hago maira hinea i God u mataira ba. Vae lo hala hokinia hi aira vake rana kwali na ahiana hinea tau hagwea lui Jisas Kraes, vae rana bulu maia lo tokaana karea lolo taetae hinea a gwereki tikei.

¹¹A leo hika u viti kareaki kwara, “Diko tau bulu mai Kraes lo nona mateana hokinia kwara tau mate ba maia, vae tana ahi maia vake.

¹²Diko tau rongo hati vae tau tu madi radu, vunu tana kwareki a hugwe maia. Diko tau viti kwara i kita hete nona tangaloi, vae aia vake ne viti kwara aia hete noda Hugwe*.

¹³Diko i kita tahe kwiribibi na noda tulikileo tea, vae aia u kwiribibi na nona tigwaravu, huri aia nehe vai lai tea kwara ne bohiki na leona.”

¹⁴A leo aira vano hi kona matangwasarakinira tigwaravu lakwa na nomu tangaloi kwara a lologa nehe bongi tea kinira. Vake kona kwahabibira lo nako i God kwara rana hatu viroro huri na leo. A doridori hi he vai na kinau tea hinea u karea, aia u magaraki na tangaloi kehekeheki hinea rau gwerongo huria.

¹⁵Kona vuvuturaki lo nomu bolokiana savia kwara kona vai na kinau hinea i God u lagwa luna tigwaravu. Lo hala hi, konahe maemae tea mana nomu bolokiana lo nako i God, vae kona huhui na tangaloi kina leo na vitikareaki noi God lo hala bakoto.

¹⁶Kona hatu bulubulu lo kwahakwaha hinea rau kwahakwaha hati vovohi God, diko mana kwahakwaha hinea a kwahakwaha rera, huri a leo hokinira hi rana revei na tangaloi rana vano vakahao ti God vakevake.

¹⁷A leo hokinira hi aira hoki na kovi kwalu nehe mavo lai tea, vae u tuku lakua vakevake. A leo na tangaloi kairua hika, i Haemenaeas mai Vaelitas, aira hokinia hi.

¹⁸Raru tiraki na hala na vitikareaki, vae hikani raru magaraki na hauhuriana nona tangaloi noi Kraes* tuaki, huri raru tuku viti kwara i God u vai na tangaloi ramo maraka tina mateana u rovo ba, vae nehe vai te taliku.

¹⁹Aia vae a tanovi hinea i God mo haribibia u madi nehe masura lai tea. A leo aira hika rau uliana luna, rau viti “A Hugwe u kikilai na nona tangaloi,” vunu vake “U taritarisa kwara a tangaloi hinea u viti kwara aia a nona Hugwe* vae ne tiraki na hatiki.”

²⁰A laha gwatu na rusa rau eno lolo ingwa na tangaloi hugwe. Tuaki rau kihira kina kol, tuaki kina silva. Tuaki rau kihira kina vikai, tuaki kina tano memea. Tuaki a tangaloi rau tau tabetabekinira, rau kanikani luga lo taro na kanikani lakua, vunu ratuaki rau kanikani luga vataha na rani.

²¹Diko a tangaloi ne vai na mamaurianana ne ngwasara ne tiraki na hatiki savia hinea nomo vitira, vae aia ne hoki na laha karea hinea a tangaloi rau kanikani luga lo taro na kanikani lakua. Lo hala hokinia hi ne mulemai kina tangaloi kokona noi God, ne taritarisa kwara a nona Hugwe ne boloki lalahia, vunu ne rarai kwara ne vai vataha na bolokiana rau karea.

²²Ko hatu huri na domidomi hati nona ngwalagelo hinea rau lengai na kinau hinea rahe taritarisa tea. U taritarisa kwara kona bulu maira hinea rau tuku tiutangaroa lakwa na noda Hugwe* kina domi ngwasara. Kona vai rongo hokinira kwara kona bohibohi lo hala bakoto, kona huri na hala na hauhuriana mana lagwaana mana magemuana.

²³Ko hatu bulu mana tangaloi lolona rau tuku vireve lo kwahakwaha rera maira, hinea rahe vai na kinau tea, huri ku kikilai ba kwara a doridori hi, a gweregwereki a viroroa.

²⁴He taritarisa tea kwara a tangaloi boloki na noda Hugwe ne viroro mana tangaloi. Aia ne vai tabetabeki na tangaloi tigwaravu, ne vai lai ne huhui na tangaloi ne karea, a domina ne bua.

²⁵Ne hahara na tangaloi hinea rau tu vovohia lo hala karea, ne kwaha tabetabe maira. Vae diko i God ne bete te taro lakwara kwara rana bohi na domiga tina noga vaivai hati, rana mulemai rana kikilai na vitikareaki.

²⁶Vunu rana domidomi ne karea taliku rana ahi tina vuna noi Setano*. Lo taro hika hokinia kwara rau kona lo vuna hi ba, vae i Setano u tuku vaira kwara rana huri na nona domidomi kehekeheki.