Read West Ambae 2 TIMOTI 3 Bible Online

2 TIMOTI 3 - West Ambae bible

2 TIMOTI 3

¹Ko domidomi luna hika kwara ne garagarani mana rani ki rovonaki a taro ne madi lakwa na tangaloi.

²A tangaloi rana domi hurira siboga, rana lengai na kinau vatahae, rana kwaha domidomira, rana domidomi hakekinira haburu. Rana kwaha bulakiki na tangaloi, ranahe rongohuri i tamaga mai retahiga tea, a tangaloi rana hago maira vae ranahe domi huri tea, vake ranahe domi huri i God tea.

³Rana vai bulabula, a hahakaviga ne tikei. Rana vitiviti huri tangaloi kwara rana vai na hinaga ne hati, a domidomiga ne sala, rana vai baribari vovohi na tangaloi. Rana bega kina kinau hinea rau karea.

⁴Rana vai bulakiki rabuluiga, rana vonovonoka, rana kwetukwetutu, rana lagwa mana kinau hinea rau rongo karea luga siletia hinea rana lagwa mai God.

⁵Lo nako na tangaloi rana bohibohi hokinia kwara aira a tangaloi noi God, vae rana bega kina nona huirana lo mamaurianaga. Ko hatu vano garagarani mana tangaloi hokinira hi.

⁶Tuaki tiura rau tuku vano vaki lolo ingwa na tangaloi kwara rana sinasina na ravavine. Rau hagwe a ravavine hinea a domidomiga tikei rau tuku rongo hati kina noga vaivai hati, vake a noga lengalengahuri u tuku reve lalikinira. A ravavine vano hi, tigwaravu rau lengaia kwara a tangaloi ne huhuira kina vitikareaki. Rau rongoa, vae rahe kwiribibi lavia tea. Vae rana huri na tangaloi vano hi heheri.

⁸Aira hinea rau tu koro na vitikareaki, aira hoki na tangaloi na novo kairua hi i Sanes mai Sabres hinea raru mo tu koro i Mosis. A tangaloi hokinira hi a domidomiga rahe bakoto tea, vake rau viti kwara rau hauhuri vae rau kura vohoki.

⁹Vae a noga bolokiana nehe eno te kwara ne tuai, huri a tangaloi rana taga kikilaki na doridoriga hinea rau reraka vohoki, hokinia tuai a tangaloi ramo taga kikilaki na doridori i Sanes mai Sabres hinea rau reraka vohoki.

¹⁰Timoti. Lolona komo huriau ku tagai na nogu huhuiana mana bohibohianagu, mana kinau hinea nomo tau na nogu domidomi luna kwara na vai lo nogu mauriana. Ku taga kwara nu hauhuri u madi, a domigu u bua. Ku tagai na nogu lagwaana, vunu vake kwara nu karohuri lo nogu bolokiana vaki lo gwereki.

¹¹Ku taga kwara a tangaloi rau vai bulakikiau, vake nomo rongo hati lo tarabehigu. Ku kikilai savi na kinau hinea nomo hagwe lo gwatuivanua Antiok, lo gwatuivanua Ikoniam maia Listra, hinea a tangaloi ramo vai bulakikiau haburu eia. Vae a noda Hugwe* mo laviau tina kabaga mo vakahikiau tina rongoana hati savia.

¹²Ku kikilai kwara vatavataha na tangaloi hinea rau lengaia kwara rana hariki lui Jisas Kraes*, vake rau lengaia kwara rana toka hokinia i God u lengaia, vae a tangaloi rana vai bulakikinira.

¹³A tangaloi hati mana tangaloi kurakura rana vano nga vakevake lo hala na hatiki, rana sina na tangaloi vakevake, vae aira vake rana hauhuri lo noga sinasina siboga.

¹⁴Vae i nigo kona tu ne madi lo vitikareaki hinea kemo huhuiko kinira komo hauhuri luga kareaki, huri ku kikilai na tangaloi hinea ramo huhuiko kinira.

¹⁵Vake ku kikilai kwara lolona i nigo a natu radu nga mo vanovano vaki na hika, vae ku kikilai na Uliuli* Kokona. A Uliuli Kokona hi ne vai lai kware ne beteko kina kikikila hinea vae ne tomuakinigo vaki lo ahiana hinea tamo lavia lolona tamo hauhuri lui Jisas Kraes.

¹⁶A Uliuli Kokona savia, i God u lalahi na tangaloi kina lolorani vae ramo ulibibira. A leo vano hi rau taritarisa kwara a tangaloi rana huhui na tangaloi kina vitikareaki, vake kwara rana tu koro na leo kurakura kinira. Rau taritarisa kwara rana vai ngwakutaki na bohiana hinea rahe taritarisa tea, vunu vake rau taritarisa kwara a tangaloi rana huhui na tangaloi kinira lo hala na bakotoana.

¹⁷A Uliuli Kokona vano hi, i God u betera kwara i kita a bulana tangaloi tana kikikila lo kinau savia, vae tana kikilai na hala ne karea kwara tana vai vataha na bolokiana hinea rau karea.