Read West Ambae 2 TIMOTI 4 Bible Online

2 TIMOTI 4 - West Ambae bible

2 TIMOTI 4

¹Lo nako i God vake lo nako i Jisas Kraes* hinea ne kwaheki na doridori na tangaloi savia, aira hinea rana ahi, maira hinea rana mate, nu kwahabibiko kina leo hika. I Jisas Kraes vae ne mulemai taliku ne kwareki a Hugwe Lakua ne hugwe koro na tangaloi savia, vae huri hi nu seseaka lumu

²kwara kona heretuvaki na leo. Venaha, diko a tangaloi rau lengaia kwara rana gwerongo huriko, diko rau bega gwerongo huriko, aia kona huiratakinia. Kona kwaha tabetabeki maira tarisaki rana hauhuri lo leomu, kona kwaha luga hinea rau vakasile, kona kwahabibi na tangaloi kwara rana huira vakevake, kona huhui tabetabekinira a domimu ne bua tigwaravu.

³A taro ne vanamai hinea a tangaloi rana bega gwerongo huri na huhuiana bakoto. Aira rana vaivai noga, rana soro haro na tangaloi huhui kwara ne rusa hinea rana huhuira kina kinau rau lagwa kwara rana gwerongo huri.

⁴Rana halebohi ranahe gwerongo te huri na vitikareaki vae rana gwerongo huri na dekudekuni tuai.

⁵A havakinau te hinea ne vanamai vovohiko lo mamaurianamu, lo taro karea, lo taro hati, vae kona tagahuri ne karea kwara kona huri na hala bakoto. Diko ku rongo hati vae kona tu ne madi. Kona vai na bolokiana hika, kona kwalahaki na Roro Karea, vunu vake kona vai savi na bolokiana hinea i God u bete lakwako kwara kona vai.

⁶Vae i nau, a tarogu u maravuti kwara rana kwohi mateiau hokinia hinea a tangaloi ramo toko kwohi mate a kairoroi kwara rana kaluhaki i God kinia. A tarogu u garagarani kwara na salati na varamana.

⁷A noda tokaana hike lo varamana aia hoki na kwalakwalao viviseu, vae i nau nu kwalao karea luna. Hika nu maravuti lo gweregwereki, nu kwiribibi na hala na hauhuriana.

⁸Vae hikani a kaitakwegu u raraiana ba huriau hinea a noda Hugwe* u tau rarai hurira hinea rau kwini na noga kwalakwalao viviseu. A kaitakwe hi, hokinia kwara a Hugwe ne viti kwara i nau a tangaloi bakoto lo nakona. Aia u tuku kwaheki na doridori na tangaloi savia lo hala bakoto, vae lo Rani hinea ne kwaheki na doridori na tangaloi savia luna, ne bete na kaitakwe hi lakweau. Hete lakweau kehekeheki vae ne bete lakwara aira vunu hinea rau lagwa maia haburu, rau tuku hugu tarae kwara ne maravuti.

⁹Ko vai rongo kwara kona maravuti maiau heheri.

¹⁰I Demas u lagwa mana doridori na varamana hikani vae mo tirakiau mo vano vaki Tesalonaeka. I Keresenes u vano ba vaki Galesia, vake i Taetas u vano ba vaki Dalmesia.

¹¹I Luk aia kahea hike maiau. U karea kwara kona lavi i Mak ne huriko, huri aia u hagohago maiau lo bolokiana.

¹²I Tikikas nu hokakinia ba vaki Evesas.

¹³Diko komo vanamai komo lavi na kakavugu hinea nomo tau terekakinia tata i Kavas lo gwatuivanua Troas. Vunu vake komo lavi na buku* maira vanamai, vae nu lengaia karakara kwara kona lavi na buku hinea rau kihiana kina vinu na nani.

¹⁴I Aleksada, a tangaloi na kihikihi kinau kina aean, tuai u vai na rongoana hati lakua lakweau. A noda Hugwe* ne gele lakwae ne taritarisa mana kinau hinea mo vai.

¹⁵I nigo vake kona likokinia ne karea huri tuai u tu koro na leoda u huira vohoki.

¹⁶Lo taro hi tomua halaradu, lolona nomo tu lo tanotano na arekiana nomo matangwasaraki na nogu leo, vae a tangaloi tikei hinea kwara ne hago leo maiau. Aira vunu rau tirakiau. A tangaroa karea hika lakwara kwara i God ne hatu kwiribibi na kinau hi hokinia kwara a bukuga.

¹⁷Vae a noda Hugwe u tu maiau, mo beteau kina huirana kwara na heretuvaki na nona leo savia kwara a tangaloi tavalavarea tina gwaloana noi Isrel* savia rana rongoa. Mo laviau tina rongoana hati hi hokinia kwara u laviau tina kwakwa na laeon.

¹⁸A noda Hugwe ne laviau tina hatiki savia, ne vakahikiau, ne laviau vaki lo nona Vanua Karagwa lolo taetae hinea aia u hugwe koroa. Tana tabe hakeki na hinana vaki tuai a gwereki tikei. Io kareaki.

¹⁹Nu hokaki nogu lagwaana lakwai Prisila mai Akwila, vake lakwara aira tata i Onesivoras mai raranatuna.

²⁰I Erastas he huriau tea, u hugu lo gwatuivanua Korin. Lolona nomo tiraki na gwatuivanua Maelitas nomo tiraki Trovimas takwa-hi huri u lenga.

²¹Ko vai rongo kwara kona maravuti vunu vari a taro na kangwkangwa. I ratuada kaitolu hika, i Iubulas, i Pudenes, mai Linus, mai hagweda i Klotia mana rabela savia lui Kraes* hike maiau, rau hokaki noga lagwaana lakwako.

²²A tangaroa karea hika lakwako. A Hugwe* ne bulu mana tanungwemu, vake ne hago maikamu doluaki kina nona domi tabetabe lakua.