Read West Ambae TAETAS 2 Bible Online

TAETAS 2 - West Ambae bible

TAETAS 2

¹Taetas. I nigo kona huhui na kinau hinea rau taritarisa mana huhuiana bakoto.

²Kona huhui na ngwera ngwarasea kwara rana hatu inuinu a inuinu hati hinea ramo reraka kinia. A bohianaga ne karea, rana kwiribibira siboga, rana hauhuri ne bakoto, rana lagwa haburu mana tangaloi, vake rana karohuri vaki lo gwereki.

³Lo hala hokinia hi kona huhui na ravavine ngwarasea kwara rana bohibohi ne bakoto, rana kokona, rana kwareki a noi God. Rana hatu vitiviti huri tangaloi, rana hatu inu haburu a inuinu hati. Rana vosangi na tangaloi kina bohiana karea,

⁴vae lo hala hi rana huhui na ravavine ngwalagelo kwara rana lagwa mai ratuaga ngwarasea mai raranatuga.

⁵Vae rana huhuira kwara rana kwiribibira siboga, rana toka ne taritarisa. Rana huhuira kwara rana tagahuri na noga tokakivanua ne karea rana vai tabetabeki na tangaloi, vake rana hugu tavuti ratuaga ngwarasea. Vunu a tangaloi ranahe kwahakwaha hati te vovohi na leo i God.

⁶Lo hala hokinia hi vake kona hahara na ngwalagelo ngwera kwara rana kwiribibira siboga tina noga lengalengahuri.

⁷I nigo sibomu lo bohibohianamu savia kona vosangira kina hala karea kwara rana huri na tanoi-garumu. Lo nomu huhuiana a havakinau komo viti kona viti kareaki tina domimu, vake a leomu ne mava.

⁸Kona viti a leo rau bakoto kehe nga kwara a nomu tavaluivuro ranahe kwahakwaha hati lai te vovohiko. Vunu kona vaira rana maemae huri ranahe hagwe na hatiki te luda.

⁹Kona huhui na tangaloi boloki [2] kwara rana hugu tavuti na noga masi rana vai a kinau hinea rau karea kehe nga, kwara a noga masi rana lagwa mana noga bolokiana savia. A tangaloi boloki rana hatu malo na leo na noga masi taliku,

¹⁰vake rana hatu kini taveaki tiura. Aia tigwaravu rana vosangi kwara rau tuku vai na kinau karea kehe nga, rau karohuri lo noga bolokiana, vae a noga masi rana hauhuri lai luga. Lo hala hokinia hi a bohibohianaga savia ne vai na tangaloi rana domi mavaki na huhuiana huri i God a noda Kaivakahi.

¹¹I God u vosangi na nona domi tabetabe lakua lakwakita ba, luna hi mo vai na hala kwara ne vakahiki na tangaloi savia.

¹²Hikani tau hugu tara na Rani lakua[3] hinea tau tau na noda domidomi luna, hinea i Jisas Kraes* a noda God lakua vake a noda Kaivakahi ne maravuti luna lo huirana na nona hahaviada. Vae hikani hinea tau tuku hugu tarae, a domi tabetabe lakua noi God u vosangikita kwara hikani tana tiraki na bohiana hinea rahe taritarisa te koro na nako i God, vake tana hatu lengahuri na kinau na varamana. Vae tana kwiribibikita siboda tina noda lengalengahuri, tana bohibohi lo hala bakoto, vake hike lo varamana tana vai na kinau aira hinea i God u lagwa luga.

¹⁴I Jisas Kraes u tiraki na mamaurianana kwara ne vakahikikita. U kasatukuhikita tina bohiana savia hinea rahe taritarisa tea, kwara vae ne vaikita tana ngwasara, tana kwareki a nona tangaloi bakotoki, tana huira kwara tana vai na bolokiana hinea rau karea.

¹⁵Kona huhui na nomu tangaloi kina kinau aira vano hi. I nigo a nomu huirana eia huri i nigo a kaitomuaki katukwale lo kwarelua*. Vae huri hi kona kwahabibira, kona surira hinea rau vai na hatiki. Kona hatu tirakinira ramo taga bulakikinigo.