Read West Ambae TAETAS 3 Bible Online

TAETAS 3 - West Ambae bible

TAETAS 3

¹Kona viti tabetabeki lakwa na nomu tangaloi tigwaravu kwara rana hugu tavuti na tangaloi lalakua mana kavman hinea rau hugwe korora. Rana rongohurira, rana rarai tigwaravu kwara rana vai bolokiana hinea rau karea.

²Rana hatu vitiviti huri tangaloi, rana hatu viroro, vae rana vai bela karea mana tangaloi, rana vai tabetabeki na tangaloi savia.

³Rana vai kwehini huri tuai, i kita vake tau vai kinau hinea rahe karea tea, tahe rongorongohuri tea, vake tau vakasile vohoki. Tuai tau vai a havakinau hinea i kita tau lengaia, vake tau lagwalagwa u havutikita luga, vae a doridorida hi u gwarubibikita. Tigwaravu tau varibuka, a kinau rau kadikadikita, i kita a tangaloi hati. A tangaloi rahe lagwa te maikita rau vai taratarakikita, vae i kita vake tahe lagwalagwa te maira tau vai taratarakinira.

⁴Vae i God a noda Kaivakahi u vakahikikita lolona hinea mo vosangikita kina nona lagwaana mana nona vaitabetabe. U vai kwehi, hete huri kwara tau vai na bolokiana karea. U vakahikikita huri u hakavikita, vae u karuhikita kina kwai na voraana taliku lalahi na Tanungwe Kokona hinea mo bete na ahiana karagwa lakwakita.

⁶I God u bete hokoraki na huirana na Tanungwe Kokona lakwakita lalahi Jisas Kraes* a noda Kaivakahi.

⁷I God u vakahikikita kwara tana bakoto koro na nakona lalahi na domi tabetabe lakua noi Jisas Kraes, vae tana lavi na ahiana vaki tuai hinea tau tau na noda domidomi luna ba.

⁸A leo hi a leo kareaki. Nu lengaia kwara kona kwahakwaha lo kinau aira vano hi, kona seseaka kwara a tangaloi hinea rau hauhuri lui God rana vai na domiga ne huira kwara rana vai na bolokiana hinea rau karea. A bolokiana vano hi rau karea haburu, rana hago lai mana tangaloi savia.

⁹Vae kona hatu bulubulu lo kwahakwaha hati hinea a tangaloi rau vireve luna, vake hinea rau liuki huri na tubutubu vanamai evina kinia. Vunu kona hatu bulubulu lo viroroa huri na Tangwata* noi Mosis hinea a tangaloi rau tuku vireve luna. A doridori hi nehe vai na kinau te vohoki, nehe hago lai te mana tangaloi.

¹⁰Diko te tangaloi u vai na kwarelua* ramo makwahekwahe, kona kwaha luna vakairua kwara kona vakaradae. Vae diko he rongohuri tea ko tirakinia,

¹¹huri ku kikilai, a tangaloi hokinia hi a domidomina u hati, a hatiki hinea mo toko vaira, rau vosangi kwara u hati kareaki.

¹²Nana hora i Atemas diko i Tikikas vaki maiko, vae ne maravuti kona vai rongo kwara kona vanamai vaki maiau lo gwatuivanua Nikovolis heheri, huri nu domikinia kwara na hugu takwa-hi lo taro na kangwkangwa.

¹³I Avolos mai Senas hi a tangaloi kikikila lo hala na tangwata savia, kona vai rongo kwara kona hago mairarua mana halagaru, vae kona tagahurirarua kwara raru mai te gwanugwanu lo kinau.

¹⁴U taritarisa kwara a noda tangaloi rana huhui kwara rana mahuki kworohoki na noga taro. Rana vai na bolokiana karea kwara rana hago mana tangaloi hinea rau gwanugwanu lo kinau kareaki. He karea tea kwara rana huguhugu vuroki rahe vai na kinau tea.

¹⁵A tangaloi savia hinea rau hugu maiau rau hokaki noga lagwaana lakwako. Kona bete nomai lagwaana lakwai rabelada hinea rau hariki maikita lo hala na hauhuriana. A tangaroa karea hika lakwakamu. I God ne hago maikamu doluaki kina nona domi tabetabe lakua.