Read West Ambae VILIMON 1 Bible Online

VILIMON 1 - West Ambae bible

VILIMON 1

¹Vilimon. I nau i Pol, nu hugu lolo ingwa na gwarugwaru huri i nau a tangaloi noi Jisas Kraes*. I kamirua mai tuada i Timoti keru uli na leta hika lakwako, keru lagwa maiko haburu i nigo buluimaru hinea tuai tamo boloki haragoki.

²Keru uli vake lakwa na kwarelua* noi Jisas hinea rau vileki tabulutaki tatamu, vunu vake lakwai hagweda i Avia mai tuada i Akivas hinea keu boloki haragoki hoki na tangaloi na vuro.

³A tangaroa karea hika lakwakamu. I God i Tamada mai Jisas Kraes a noda Hugwe* raru ne hago maikamu kina nogaru domi tabetabe lakua, vake raru ne bete na magemuana ne eno maikamu.

⁴Vilimon. Tigwaravu lolona nomo tiutangaroa nu domihagweko. Nu lagwaki na noda God

⁵huri nu tuku rongo na roromu kwara ku lagwa mana tangaloi noi God savia, vake kwara ku hauhuri lui Jisas a noda Hugwe*.

⁶Nu tiutangaroa huri kwara tamo bulu katukwale lo hauhuriana, vae ne vaiko a nomu kikikila ne bua vakevake lo kinau karekarea savia hinea tamo lai huri tau hariki lui Kraes*.

⁷Tuagu karea. A nomu lagwaana u vaiau u havutiau haburu mo rakati na domigu huri komo vai na domi na tangaloi noi God savia ramo lagwalagwa.

⁸Lo taro hikani i nau i Pol nu ngwarasea, vake nu hugu lolo ingwa na gwarugwaru huri na hina i Jisas Kraes*. [1] Huri taru bulu katukwale lui Jisas Kraes nu taritarisa kwara na haharako nana viti a havakinau hinea u taritarisa kwara kona vai. Vae huri taru lagwalagwa maikitarua na kwaha tabetabeki maiko. Nu lengaia kwara na viti huri na bulamu tangaloi boloki i Onesimas. Nomo hugu lolo ingwa na gwarugwaru nomo lavia vaki mai Kraes, vae hokinia kwara aia i natugu vohoki, i nau i tamana vohoki. Vae nu lengaia kwara kona vai tabetabekinia.

¹¹Tuai i Onesimas [2] he vai na kinau te vohoki kwara ne hago maiko, vae hikani ne vai na kinau rusa kwara ne hago maiko vae ne hago maiau vake.

¹²Vae hikani na hokakinia muleatu taliku vaki maiko, vae a domigu aia luna.

¹³Hikani nu hugu lolo ingwa na gwarugwaru huri nu heretuvaki na Roro Karea noi Kraes, vae nu lengaia haburu kwara na kwiribibia ne hugu maiau kwara ne lai tanotanomu ne hago maiau.

¹⁴Vae hetea, huri nahe lengaia te kwara na bibiriko kwara kona hago maiau. Vae nu lengaia kwara i nigo kona vai lo domimu sibomu. Hokinia i nau nanahe vai na kinau tea, vae kehekeheki kona masinge luna.

¹⁵Nahe kikilai tea, vae nu domi kwara i Onesimas u kwalao tiuko lo taro gwanugwanu vohoki kwara vae kona lavia taliku ne hugu maiko vaki tuai.

¹⁶Hikani aia hete tangaloi boloki vuroki kehekeheki, vae u sileti na tangaloi* boloki vuroki. Aia i tuada lui Kraes, hinea u taritarisa kwara tana lagwa maia. I nau nu lagwa maia vohoki, vae nu domi kwara i nigo kona lagwa maia siletiau, huri aia a bulamu tangaloi boloki, vae silesiletia hi, aia i tuamu, huri u hariki lo noda Hugwe*.

¹⁷Karea koe, diko i nigo a buluimu i nau, kona lavia vaki tatamu hokinia kwara ko laviau.

¹⁸Diko aia u vai kinau hati vovohiko, diko a bukuna eia maiko, vae kona tau na bukuna lugu.

¹⁹A leo hika vae na ulia kina kabagu. I nau i Pol nana vai na bukuna lakwako. Nu domi kwara ku kikilai te ba kwara a bukumu eia maiau huri komo ahi lalahiau.

²⁰Tuagu. Kona hago maiau lo kinau hika, huri taru hariki lo noda Hugwe. I kitarua taru vituatua lui Kraes, vae nu lengaia kwara kona vaiau ne havutiau taliku.

²¹Nu tuku uli na leta hika lakwako, vae nu kikilai kwara kona vai na havakinau hi nu viti lakwako. Kareaki, nu kikilai kwara kona vai silesiletia hi nomo viti lakwako.

²²Vunu vake, ko vai rarai tanotanogu lolo ingwamu, huri tigwaravu nu tau na nogu domidomi luna hika kwara i God ne daraki na nomiu tiutangaroa i kamu vunu, vae ne tirakiau nana muleatu vaki maikamu taliku.

²³I Evavras, hinea u hugu lolo ingwa na gwarugwaru maiau huri aia a tangaloi noi Jisas Kraes*, u hokaki nona lagwaana lakwako.

²⁴Vunu a tangaloi aira hika hinea rau boloki haragoki maiau, i Mak, i Aristakas, i Demas mai Luk, aira vake rau hokaki noga lagwaana lakwako.

²⁵A tangaroa karea hika lakwakamu. A noda Hugwe* i Jisas Kraes ne hago maikamu kina nona domi tabetabe lakua.