Read West Ambae HIBRU 10 Bible Online

HIBRU 10 - West Ambae bible

HIBRU 10

¹A Tangwata* noi Mosis aia a nunu vohoki huri na kinau hinea rau kareaki, vae he matangwasara tea kwara ne karea huri na kinau karekarea hinea vae rana vanamai. Tigwaravu vataha na hukao a tangaloi* lingilingi rau tuku kwohi mate kairoroi* lo hala katukwale huri na hatiana nona tangaloi. Vae lo hala hi a Tangwata noi Mosis nehe vai lavi na tangaloi tea hinea rau tuku vanamai vaki mai God kwara rana bakoto.

²A tangaloi hinea rau tuku vai kaluhakiana lakwai God hokinia hini, rahe ngwasara te haburu tina noga hatiana. Kwara vae diko rau ngwasara kareaki vae ranahe rongo te lo tarabehiga kwara a hatiki aia luga radu. Kwara vae diko rau ngwasara kareaki, a doridori hini ramo toko kwohi mate kairoroi vae ne rovo.

³Aia vataha na hukao, a doridori hi u vaira ramo domihagwe na noga hatiana,

⁴huri a dai na buluki ngwera mana dai na nani ngwera raru nehe lai letiuki lavi na hatiana te nona tangaloi.

⁵Huri na kinau hi, tuai u garagarani kwara i Kraes* ne vanamai vaki lo varamana, mo viti lakwai God kwara “I nigo kohe lengai na hilehile tea mana kairoroi hinea a tangaloi ramo toko kwohi mateira. Vae ku vai rarai na tarabehi huriau.

⁶Kohe lagwa te mana hura boniboni hinea a tangaloi ramo toko hura dodoluakinira lo voda. Kohe lagwa te mana kairoroi hinea rau kwohi mateira huri na noga hatiana.”

⁷Vunu mo viti kwara, “God, i nau hika, nu rarai kwara na vai savi na kinau hinea i nigo ku lengaia, u taritarisa hoki na leo hinea rau ulia huriau ba lo buku* na Tangwata.”

⁸Tomua i Kraes u viti kwara, “I nigo kohe lengai ne hilehile tea mana kairoroi hinea a tangaloi ramo toko kwohi mateira, mana hura boniboni hinea a tangaloi ramo toko hura dodoluakinira lo voda, mana kairoroi hinea rau kwohi mateira huri na noga hatiana, vake kohe lagwa te maira.” Vae a doridori vano hi hinea a tangaloi ramo toko vai, rau taritarisa vohoki mana leo hinea a Tangwata noi Mosis mo vitira.

⁹Vunu vaki takuni u viti kwara, “God, i nau hika, nu rarai kwara na vai savi na kinau hinea i nigo ku lengaia.” A leo hi u vosangi kwara i God u lai letiuki savi na doridori tuai hinea ramo toko kwohi mate kairoroi, mo tau na doridori karagwa lo tanotanoga hinea i Kraes sibona u kwareki a kairoroi, mo mate.

¹⁰I God u vaikita tamo ngwasara tina noda hatiana tamo kokona, huri i Jisas Kraes u vai a havakinau hinea i God u lengaia kwara ne vai. I God mo vai kwehi lalahi na hilehile noi Kraes hinea mo hile na tarabehina sibona mo mate vakatukwale vohoki, mo vakatukwalekinira mo rovo.

¹¹Vataha na rani, vataha na tangaloi lingilingi nona gwaloana noi Isrel* rau tuku vai noga boloki, rau tuku kwohi mate a kairoroi vakarusa lo hala katukwale. Vae a doridori hi nehe lai letiuki lavi na hatiana te vohoki.

¹²Vae i Kraes u hilea sibona vakatukwale mo mate kwara ne lai letiuki na hatiana nona tangaloi, vae a nona hilehile hi ne lai letiuki na hatiana nona tangaloi vaki tuai a gwereki tikei. Vunu mo vano mo hugu lo matuai God.

¹³Vae ne hugu takwa-hi tarisaki hi i God ne vai na nona tavaluivuro rana hugu tavutina rana kwareki a nona tangaloi boloki vuroki.

¹⁴I Kraes u mate vakatukwale kwara ne lai letiuki na hatiana nona tangaloi. U vaira rau ngwasara tina noga hatiana, rau kokona rau kwareki a nona. Vae kina nona mateana hi aia u vai na tangaloi aira vano hi ramo bakoto vohoki, vae rana bakoto vaki tuai a gwereki tikei.

¹⁵A Tanungwe Kokona vake u matangwasaraki na kinau hi lakwakita. Tomua u viti kwara,

¹⁶“A Hugwe i God u viti kwara ‘A leo harikiana kwara na vai maikamu lo taro hi vae neri vanamai, aia hika. I nau nari huhuikamu kina leo na nogu Tangwata, i nau nari ulibibira tilolo domimiu.’ ”

¹⁷Vunu vaki takuni u viti taliku kwara a Hugwe i God u viti “Hika vae nanahe domihagwe na noga hatiana tea mana noga vakasileana hinea ramo galo lo nogu Tangwata.”

¹⁸I God mo domidomi koro savi na noga hatiana, vae aia nehe lengai na kinau te taliku kwara rana hile lakwae kwara ne lai letiuki na noga hatiana.

¹⁹Rabela. A dai i Jisas u vaikita tau ngwasara ba, vae huri hi tau taritarisa kwara tana soro vaki lolo Tanotano Kokona Karakara.

²⁰I Jisas u takahi na halada ba, hinea a hala karagwa. Aia sibona a hala hi, vunu vake u ahi. Aia hokinia kwara u vano lalahi na lugwa bolo kabakaba hi hinea tuai mo dule koro na Tanotano Kokona Karakara. Mo takahi na hala hi lo bohianana hi mo bete a tarabehina hoki na kairoroi, mo mate lo kaibetu.

²¹Aia a noda Hugwe na Tangaloi* Lingilingi hinea u lakua karakara, u tuku tagahuri savi na tangaloi noi God.

²²Vae hika u karea kwara tana vanamai vaki garagarani mai God, hinea a domida u ngwasara, a noda hauhuriana u tu madi, a domida hinea tomua u hogora kina noda hatiana vae u ngwasara ba kina dai i Kraes. Vunu a tarabehida vake rau ngwasara kina kwai ngwasara hinea tau ngwada luna ba.

²³U karea kwara tana kwiribibi ne madi a doridori aia hi tau vitia ba kwara a doridorida, hinea tamo tau savi na domida mo tu mo madi lui God. Tau vai kwehi huri u kareaki tau hauhuri lai lui God kwara aia vae ne vai savi na nona tulikileo rana mule luna.

²⁴U karea kwara vatavatahakikita tana domidomi-hagwekita, tana hagohago maikita kwara tana lagwalagwa maikita tana vaivai karea maikita.

²⁵Ta hatu hugu tina bulubulu na kwarelua* hokinia hinea tuaki tikita ramo toko vai. Aia tigwaravu tana hagohago maikita tana rakati na domida muleki vakevake kwara rana huira, huri tulu taga kikilaki kwara a Rani nona Hugwe[6] u vanamai mo toko garagarani.

²⁶Vae hika i kita hinea tau lavi na vitikareaki tau kikilaia u karea, vae diko tau domikinia tamo maraka tamo vano nga tamo vai na hatiki, vae hokinia hi a hala ne tikei. A kairoroi tikei vake hinea kwara tana kwohi mateia kwara ne lai letiuki na noda hatiana.

²⁷Aia a hala aia hika kehekeheki ne eno hurikita, vae tana matakutaki God karakara lolona hinea tana hugu tara kwara ne taga kwaheki na doridorida ne vai kadikita. Tana hugu tara na kabu hinea u huira haburu vae ne kao letiuki doluaki na tavaluivuro noi God.

²⁸Diko a tangaloi hinea u galo lo Tangwata* noi Mosis, a tangaloi kairua diko kaitolu rau hago leo huria kwara u galo lo Tangwata kareaki, a tangaloi ranahe hakavia tea vae rana koso mateia.

²⁹?Vae kworohokinia mana tangaloi hinea u domi bulakiki na Natu i God? A dai i Jisas Kraes hinea u vai na leo harikiana noi God mana bulana tangaloi mo tu, aia kehekeheki u vai na tangaloi hi mo ngwasara tina nona hatiana, mo kokona mo kwareki a noi God. ?Vae kworohokinia mana tangaloi hi hinea u taga bulakiki na dai i Jisas hoki na kinau vuroki vohoki? A Tanungwe Kokona u hago mana tangaloi kina nona domi tabetabe lakua. ?Vae kworohokinia mana tangaloi hinea u kwaha bulakikinia? A tangaloi hi ne kwali na kakadiki ne lakua vohoki siletia hinea mo galo lo Tangwata noi Mosis.

³⁰I kita tau kikilai ba kwara i God u viti kwara, “I nau kehekeheki nu taritarisa kwara na gele lakwara hinea rau vai kinau rahe taritarisa tea. I nau kehekeheki nana vai kadira huri.” Vunu vake aia mo viti kwara, “I nau a Hugwe i God, nana taga kwaheki na doridori na bulagu tangaloi, vae nana vai kadira huri.”

³¹I God aia i God Tatoka, vae diko aia ne kwiribibikita ne vai kadikita, hika a matakuta haburu.

³²U karea kwara tulu ne domihagwe savi na kinau hinea tuai tulu mo hagwera. Takuni tina taro hinea a leleha noi God mo kwaka tilumiu, tulu rongo hati lo kinau u rusa, vae a kinau aira hi rahe guikamu tea.

³³Lo taroki a tangaloi rau kwahakwaha hati vovohikamu lo nako na tangaloi rusa, vunu rau vai bulakikikamu vake. Vunu lo taroki vake i kamu tulu tu maira hinea a tangaloi rau tuku vai bulakikinira hokinia hi nga.

³⁴Tulu hagwe na rongoana hati hi ba hinea a tangaloi na gwarugwaru ramo toko hagwea. Vunu lolona a tangaloi ramo toko lai nomiu vivilagoki leletiu tulu he rongo hati te haburu huri na nomiu vivilagoki hinea ramo sala. Tulu lagwa huri tulu kikilai vunu ba kwara a nomiu vivilagoki te dolua eia rau eno, hinea rau karea siletira hi tomua, vae rana eno vaki tuai.

³⁵U karea, vae hika tulu kwiribibi na domimiu ne eno ne madi hokinia hi, huri a kaitakwe hinea vae tulu ne lai huri, u seleka vohoki.

³⁶U taritarisa kwara a domimiu ne bua kwara tulu ne vai savi na kinau hinea i God mo lengaia. Vae tulu ne hagwe lavi na kinau hini mo tuliki terekakinira lakwakamu.

³⁷Hika hoki na Uliuli* Kokona mo viti kwara, “A taro kelekele maeno vae aia hi vae ne vanamai ne maravuti, nehe vaivai ta tuai tea.

³⁸A bulagu tangaloi bakoto vae rana hauhuri lugu rana ahi lai. Vae diko te katukwale tiura ne halebohi ne mule taliku, i nau vae nanahe rongo karea te kinia.”

³⁹Vae i kita hete tangaloi kwehi kwara vae tana halebohi taliku tana va sala. Aia i kita tau hauhuri lui God vae u vakahikikita.