Read West Ambae HIBRU 12 Bible Online

HIBRU 12 - West Ambae bible

HIBRU 12

¹A tangaloi aira vano hi aira a hagoleo noi God rau rusa lengalenga rau tu dalidalikikita. Vae huri hi u taritarisa kwara tana tiraki na kinau savia hinea rau tu korokita, mana hatiki hinea rau kwiribibikita u madi, vunu tana vai na domida ne madi, tana kwalakwalao viviseu lo hala hinea u eno koro na nakoda.

²Vunu tigwaravu tana taga vovohi Jisas huri a noda hauhuriana u vanamai tiua, u tinakaki lo tinatinakakiki vaki lo gweregwereki. Lolona hi mo vano kwara ne mate lo kaibetu, he tiraki na halana tea. Aia u kikilai kwara vae lo taroki ne havutia, vae huri hi he domi huri tea kwara a kaibetu hi ne vai na maemaeana lakua lakwae. Aia u vano nga. Vae hikani u hugu lo matuai God hinea a Hugwe Lakua u hugu lo hagehagelena lakua lolo taetae.

³U karea kwara tulu ne domidomi lo taro hati vano hi aia mo vano lalahira, hinea a tangaloi vaivai hati rau maraka ramo bega kinia ramo vai taratarakinia. Vae hikani a domidomimiu ne tu ne madi, vae tulu mai tiraki na nomiu hauhuriana.

⁴Hokinia lo nomiu tokaana hinea tulu mo toko vai vuro vovohi na hatiki, vae hete kwara te katukwale tikamu a daina u huki huri, vunu mo mate.

⁵?A lolomiu bongi kina leo hi lo Uliuli* Kokona hinea i God mo kwahakwaha maikamu luna, kwara ne rakati na domimiu hokinia hi kwara i kamu i raranatuna bakotoki? U viti hikwe kwara, “Natugu. I nau a Hugwe i God. Diko na bete a sanguniana lakwako, ko mai domi bulakikinia, vae kona huhui luna. Diko na kwaha lumu, vae ko mai rongo hati hokinia a domimu mo sovi.

⁶I nau a Hugwe i God, vae nu tuku bete sanguniana lakwara hinea nu lagwa maira haburu. Vunu nu tuku takwilira hinea nu lavira ki raranatugu.”

⁷Tulu mo rongo hati lo tarabehimiu tulu hatu kwalao tiua, huri i God u vai kwehi lakwakamu, hi u vosangi kwara i kamu i raranatuna. A natu tikei hinea kwara u hugu hikwe, i tamana he toko bete te sanguniana lakwae.

⁸Kwara vai diko i God he bete te sanguniana lakwakamu hokinia hi mo toko bete lakwai raranatuna savia, a domianaki kwara i kamu hete raranatuna bakotoki, i kamu a raranatu lo mahaoki.

⁹Lo bohianada hi i kita a tangaloi na varamana, i ratamada rau tuku bete sanguniana lakwakita, vae tau domi mavakinira huri. ?Vae kworohokinia mai Tamada hi lolo taetae? Tana domi mavakinia siletia hi tau domi mavaki i ratamada hike lo varamana. Tana hugu tavutina vae tana ahi.

¹⁰I ratamada hike lo varamana rau bete sanguniana lakwakita huri na taro gwanugwanu vohoki, hokinia rau domi kwara u taritarisa kwara rana vai. Vae i God u bete sanguniana lakwakita kwara ne vaikita tana mulemai ki tangaloi karea, huri kwara tana bulu maia tana mulemai ki tangaloi kokona hokinia.

¹¹Vae tau kikilai kwara lolona i God u bete sanguniana lakwa na tangaloi, a sanguniana hi he vaia te kwara ne rongo karea, u vaia u rongo hati. Vae vaki takuni, aira hinea i God u bete sanguniana hokinia hi lakwara kwara ne haharara, rana hagwe na kwai na sanguniana hi. Rana toka lo magemuana, vae a noga tokaana ne taritarisa vohoki lo nako i God.

¹²Huri na kinau hi, tulu vai hokinia a Uliuli Kokona mo viti kwara, “Tulu tabe hakeki na kabamiu hinea rau keokeo, vunu tulu kwiri gwaumiu hinea rau kwirikwiri, rana huira taliku.”

¹³Tulu lakao lo hala tavola kehekeheki kwara vae a garumiu hinea rau hati vae rana mai gwohi, vae rana karea taliku.

¹⁴Tigwaravu tulu ne toka lo magemuana mana tangaloi vunuhia. Tigwaravu tulu ne toka lo bakotoana tulu ne kwareki a tangaloi kokona noi God, huri diko hetea tulu nehe taga lavi na noda Hugwe* tea.

¹⁵Tulu tagahuri ne karea kwara vae katukwale tikamu ne mai halebohi ne vano tina domi tabetabe lakua noi God. Tulu tagahuri ne karea kwara vae katukwale tikamu ne mai hoki na vikai hinea u mauri hake, a rauki rau amiami, vae a tangaloi rau kania ramo lenga kinia.

¹⁶Tulu tagahuri ne karea kwara vae katukwale tikamu ne mai hoki i Iso hinea a nona tokaana he bakoto tea, vake he domihagwe i God tea. U hokaki savi na nona kinau hinea u taritarisa kwara ne lai huri aia a natu tomua, vae a kaivoli na kinau aira vano hi a hinaka hinea u kania vakatukwale vohoki vunu va rovo.

¹⁷Tulu kikilai kwara vaki takuni u lengaia kwara i tamana ne tau na tangaroa karea tiluna, vae i tamana u tu dori kinia, huri i Iso he vai lai te kwara ne tukuhi na leona taliku ti tuana, venaha diko u tangi huri, vae he vai lai tea huri u rovo ba.

¹⁸Tuai a gwaloana noi Isrel* ramo maravuti mana Vuti Saenae, vae lo vanua hi ramo tagai na kabu mo sea luna, a dodo lakua mo gui koro na kinau savia, vunu ramo rongo a langi lakua mo here, vunu vake ramo rongo a tavui lakua mo tatangi, vae ramo rongo kwara i God mo kwahakwaha maira. Lolona ramo rongo na leona ramo viti karakara kwara rau bega rongo na leo hi taliku huri rau mataku haburu kina leo hinea mo viti kwara, “Diko te boboroa katukwale vohoki u maravuti lo vuti lakua hika, tulu voho mateia kina vatu lalakua.” Kareaki, lolona i Mosis mo tagai na kinau aira vano hi aia vake u rongo hati haburu, mo viti kwara, “I nau nu mataku haburu a huigu u rururu kinia.” Vae i kamu tulu he maravuti tea mana vanua hokinia hi.

²²Aia i kamu tulu maravuti ba lo Vuti Saeon* hinea a gwatuivanua lakua noi God Tatoka, aia hi Serusalem kairuaki lolo taetae. Takwahini a kaihora na taetae taritari rau tuku lagwalagwa tigwaravu,

²³vunu vake a kwarelua* noi God savia rau vileki tabulutaki eia, vae aira vunu hokinia aira i raranatuna rau vora tomua halaradu, a hinaga rau ulibibiana ba lolo taetae. [8] Vake i kamu tulu vanamai vaki mai God ba hinea u taga kwaheki na doridori na tangaloi savia, tulu bulu mana tanungwe na tangaloi bakoto savia hinea rau mate ba, hinea i God u vaira rau bakoto ba.

²⁴Tulu vanamai vaki mai Jisas ba hinea a kaikao na tangaloi, u tu lo livukada mana livuka i God, mo vai na leo harikiana noi God mana bulana tangaloi mo tu. Vake tulu vanamai vaki mana dai i Jisas ba hinea u vaikamu tulu mo ngwasara, u viti huri na kinau hinea rau karea sileti na kinau hinea a dai i Evol mo toko viti huri.

²⁵Huri na kinau hi, tulu tagahuri ne karea huri vae tulu mai tu dori kinia hinea mo toko kwaha maikamu. Savi na tangaloi hinea tuai rau bega rongo na leo i God hinea u vitiana hike lo varamana kwara ne vakarada na tangaloi savia, vae rahe kwalao lai te ti God. ?Vae hika diko i kita tau beda rongo na leo i God hinea u vanamai tina taetae kwara ne vakaradakita, tana kwalao lai kworohokinia tiua?

²⁶Lo taro hi tuai, a leona u kiluki na varamana, vae hikani u tuliki lakwakita, mo viti “Vae na kiluki na varamana vakatukwale vake. Vae lo taro hi nanahe kiluki na varamana te kehekeheki, vae a taetae vake.”

²⁷A leo aia hi i God mo vitia kwara, “vakatukwale vake” u matangwasaraki kwara i God u tuku viti na kinau savia hike lo varamana hinea aia u taura. Vae ne kiluki savi na kinau aira hi, vunu ne lai letiukinira. Vae doluaki na kinau hinea rahe kilukilu lai tea, aira hi rana eno.

²⁸Huri na kinau hi, u karea kwara tana lagwaki God huri aia u lavikita vaki maia, vae hikani aia a noda Hugwe Lakua. Aia a Hugwe Lakua hinea a nona huirana nehe kilukilu lai tea, vake nehe tikei tea. U taritarisa kwara tana kaluhakinia kina domi mavakiana mana matakuta lo hala hinea aia u lagwa luna,

²⁹huri kareaki a noda God aia hoki na kabu sea lakua hinea mo kao letiuki na kinau savia.