Read West Ambae HIBRU 13 Bible Online

HIBRU 13 - West Ambae bible

HIBRU 13

¹Tulu lagwalagwa maikamu huri tulu vituatua vohoki lui Kraes*.

²Tulu rarai tigwaravu kwara tulu ne lai tabetabeki a vanamaiana vaki tatamiu. Tulu kikilai, a tangaloi tuaki hinea tuai rau vai hokinia hi, ramo lai tabetabeki a kaihora tina taetae rau soro vaki tataga, vae rahe kikilai te vohoki kwara aira a kaihora tina taetae.

³A lolomiu ne hatu bongi kinira hinea rau hugu lolo ingwa na gwarugwaru hokinia kwara i kamu vake tulu hugu maira takwa-hi. Vake a lolomiu ne hatu bongi kinira hinea rau rongo hati lolo tarabehiga hokinia kwara i kamu vake tulu rongo hati hokinira.

⁴A lakiana aia a hala katukwale hinea i kamu doluaki tulu ne domi mavakinia. A ngwera ne hugu mai vavinehina kehekeheki, vunu a vavine ne hugu mai tuana ngwarasea kehekeheki. I God vae ne areki na ngwalagelo ngwera mana ngwalagelo vavine hinea raru maturu tabulutaki, vake ne areki na ngwera hinea u maturu mana vavine hinea hete vavinehina bakotoki, vunu vake ne areki na vavine hinea u maturu mana ngwera hinea hete tuana ngwarasea bakotoki.

⁵Lo nomiu tokaana tulu hatu lagwa mana mane* haburu, vae tulu lagwa mana kinau hinea a nomiu eia ba, huri i God u viti ba kwara, “Nanahe tirakinigo te vohoki, nanahe tiraki bari letiukinigo tea.”

⁶Vae huri hi, ta vai na domida ne huira, tana viti “A Hugwe i God aia a nogu kaihago. !I nau nahe mataku tea! ?A tangaloi rana vai aha maiau?”

⁷A lolomiu ne hatu bongi kinira hinea tuai ramo toko tomuakikamu, ramo viti na leo noi God lakwakamu. Tulu domidomi-bibi na bohianaga kwara rau toka kworohokinia vunu rau mate kworohokinia, vunu tulu ne huri na tanoi-garuga tulu ne hauhuri hokinira.

⁸I Jisas Kraes he toko bohi tea. Aia hokinia tuai, hika karagwa, vaki tuai nehe bohi tea.

⁹Tulu hatu tiraki na huhuiana rusa hinea rau doludolua ramo turukikamu tina hala karea. Tana taga vovohi God hinea u hago maikita kina nona domi tabetabe lakua kwara ne vai na domida rana huira. Vae he karea te kwara tana rongohuri na hala rusa huri na hinaka kwara ne vaikita tana huira, huri a tangaloi hinea rau rongohuri na hala aira vano hi, vae kareaki a hinaka aira vano hi rahe hago te maira vohoki.

¹⁰A tangaloi* lingilingi nona gwaloana noi Isrel* hinea rau tuku vai noga bolokiana lolo noga tanotano na kaluhakiana, vae rahe taritarisa te kwara rana bulu maikita te lo noda kaluhakiana hinea hoki na noda kairoroi* tau hile lakwai God lo noda voda.

¹¹A doridori na noga hugwe na tangaloi lingilingi aia hokinia hika. U kwohi matei na kairoroi mo rovo, vunu u lavi na daiki mo soro vaki lolo Tanotano Kokona Karakara, u betea lakwai God huri na hatiana nona tangaloi savia. Vae vaki takuni, rau lavi na tarabehi na boboroa vano hi, rau huraira tavalavarea tina tokakivanua.

¹²Vae huri hi i Jisas hokinia vake, mo soro tivarea tina matakihala na gwatuivanua lakua hi, mo rongo hati lo tarabehina tavalavarea tina tokakivanua. Lo hala hi mo mate, a daina hi mo huki kwara ne vai na tangaloi rana ngwasara, rana kokona, rana tu lai koro na nako i God.

¹³I kita vake ta vai kwehi, ta vano ta bulu maia tavalavarea tina tokakivanua. Vunu tana rarai kwara a tangaloi rana vaikita tana maemae hokinia hi ramo vai lakwae.

¹⁴A noda gwatuivanua kwara u eno vaki tuai tikei hike lo varamana, vae tau soro haro na gwatuivanua katukwale hinea neri vanamai.

¹⁵Huri na kinau hi, ta bulu mai Jisas, ta kaluhaki na hina i God tigwaravu. Vae a doridori hi ne kwareki a noda kairoroi lakwae. Vataha na taroki tau matangwasaraki lo nako na tangaloi kwara i Jisas aia a noda Hugwe*, aia hokinia hinea tau bete na hilehile lakwai God.

¹⁶Tulu tagahuri ne karea kwara tulu ne vai kinau ne karea tigwaravu, tulu ne hagohago maikamu, huri a doridori aira hi vake rau hoki na kairoroi hinea tulu mo betera lakwai God hinea u lagwa haburu maira.

¹⁷Tulu domi mavakinira hinea a nomiu kaitomuaki, tulu rongohuri na leoga savia. Aira hi rau tagahuri na mamaurianamiu lui Kraes, rahe mabu te vohoki huri vae rana viti lakwai God kwara rau vai na noga bolokiana kworohokinia. Tulu ne vaira rana rongo karea lo noga bolokiana. Vae diko tulu ne toko vaira rana rongo hati lo bolokiana hi, a doridori hi vae nehe hago te maikamu vohoki.

¹⁸Keu rongo lo tarabehimai kwara keu vai na kinau karea kehe nga, a domimai rahe kilukilu tea, huri keu lengaia kwara kena bohibohi ne bakoto tigwaravu. Tulu ne tiutangaroa hurikami tigwaravu.

¹⁹Nu seseaka hurikamu vakevake kwara tulu ne uduhuri ki God kwara vae na mulemai lai taliku vaki maikamu heheri.

²⁰A tangaroa karea hika lakwakamu. I God aia hi a gwataki na magemuana, vunu vake mo rakati Jisas tina mateana mo ahi taliku, vae ne hile vatavataha na kinau karekarea lakwakamu hinea tulu gwanugwanu luga, ne vaikamu tulu ne taritarisa kwara tulu ne vai savi na kinau hinea aia u lengaia. I Jisas aia a noda Hugwe*, vae lolona mo mate, a daina mo huki kwara ne vai na leo harikiana noi God maikita ne tu, vae ne tu vaki tuai a gwereki tikei. Vae huri a daina mo huki, i God mo rivukia mo kwareki a kaitagahuri lakua koro na bulana sivsivi. Vake nu tiutangaroa kwara i God ne vaikita hinea tau hariki lui Jisas Kraes* tana bakoto hokinia hi aia u lengaia. Vae tana tabe hakeki na hina i Kraes vakevake vaki tuai a gwereki tikei. Io kareaki.

²²Rabela. Nu kwaha tabetabeki maikamu kwara tulu ne vai na domimiu ne bua, tulu ne rongohuri na leo hi nomo vitia lakwakamu kwara ne rakati na domimiu, huri a leta hika nomo ulia lakwakamu he gwaravu tea.

²³Nu lengaia kwara tulu ne kikilai kwara i belada i Timoti rau tirakinia tina ingwa na gwarugwaru ba, vae diko mo vanamai heheri kenaru venatu nari tagaikamu.

²⁴Tulu bete nomai lagwaana lakwa na nomiu kaitomuaki savira mana tangaloi na kwarelua* noi God doluaki. A rabela lui Kraes* lo vanua Itali rau hokaki noga lagwaana lakwakamu vake.

²⁵A tangaroa karea hika lakwakamu. I God ne hago maikamu doluaki kina nona domi tabetabe lakua.