Read West Ambae HIBRU 3 Bible Online

HIBRU 3 - West Ambae bible

HIBRU 3

¹Rabelagu. I God u kwarekamu ba, vae hikani tulu kokona, i kamu a bulana tangaloi. Vae huri na leo hinea nu vitia ba, tulu domidomi lui Jisas hi hinea tau matangwasarakinia ba kwara tau hauhuri luna. Aia u kwareki a noda Kaihora* Kokona vake u kwareki a noda Hugwe na Tangaloi* Lingilingi.

²I Jisas u vai u bakoto koro na nako i God hinea mo mataia huri na bolokiana hikani, hokinia hinea tuai, i Mosis mo vai u bakoto lo nona bolokiana hinea mo tagahuri na tangaloi noi God.

³A tangaloi hinea mo tabe na ingwa, a hinana u lakua sileti na ingwa hi mo tabea. Vae lo hala hokinia hi, u taritarisa kwara i God ne tabe hakeki i Jisas sileti i Mosis.

⁴Io kareaki, vataha na ingwa, a tangaloiki eia hinea ramo kihira, vae i God u kihi savi na kinau.

⁵I Mosis u vai u bakoto lo nona bolokiana lakwa na tangaloi noi God. Aia a tangaloi boloki noi God u tuku viti huri savi na kinau ki tomuaki hinea vunu vaki takuni i God mote vitira tivarea lalahi na nona tangaloi* duruduruki ratuaki.

⁶Vae i Kraes* u vai u bakoto lo nona bolokiana. Aia i Natu i God hinea u tuku tagahuri raranatu i Tamana. Vae diko a domida u eno u madi, vake tau tuku hauhuri kwara tana lavi na kinau hinea tau tau na domida tilui God huri kina domi bua, i kita i raranatu i God.

⁷Vae huri hi ne hoki na Tanungwe Kokona mo viti lo Uliuli* Kokona kwara, “Hika karagwa diko tulu rongo na leo i God,

⁸vae tulu hatu vai gwatu madi hoki i ratubumiu hinea tuai ramo toko vai, ramo maraka ramo tu vovohi God. Vae tulu hatu vai na doridori hinea i ratubumiu ramo vai, lolona hi tuai lo vanua vuroki ramo toko vaivai rongohia.”

⁹I God u viti kwara, “Lo vanua vuroki hi i ratubumiu ramo toko tagai na bohianagu a hukao ngavu kaivati. Vae rau galo lo leogu kwara rana vai rongohiau.

¹⁰Vae huri hi nu lologutekinira haburu. Vunu nomo viti kwara, ‘Tigwaravu rau vano rerarera, rau bega kwara rana rongohuri na leogu.’

¹¹Nomo lologute vae nomo hahariki kwara, ‘Ranahe soro lai te vohoki vaki lo vanua hinea kwara vae nana bete na mabuana lakwara eia.’ ”

¹²Rabelagu, tulu tagahuri ne karea kwara vae hete kwara te katukwale tikamu a domina ne kukwere kina hatiki, vae nehe hauhuri tea lui God Tatoka vunu ne maraka ne halebohi tiua.

¹³Tulu hatu vai hokinia hi. Aia vatavataha na rani hoki na leo hinea mo viti kwara “Hika karagwa” hi u eno luda radu nga, vae tulu kwahabibikamu muleki kwara tulu ne rakati na domimiu. Lo hala hokinia hi a vaivai hati nehe sina lavikamu tea kwara te katukwale, a gwatuna ne madi.

¹⁴A noda hauhuriana lui Kraes hinea tamo kwiribibia lo tinatinakakiki, u taritarisa kwara tana kwiribibia ne madi vaki lo gwereki. Diko tana vai kwehini, vae i kita vunu tana bulu maia lo nona bolokiana.

¹⁵A leo lo Uliuli Kokona u viti hikwe kwara, “Hika karagwa diko tulu rongo na leo i God, vae tulu hatu vai gwatu madi hoki i ratubumiu hinea tuai ramo toko vai, ramo maraka ramo tu vovohi God.”

¹⁶?Ihe tangaloi maira hinea rau rongo na leo i God vae ramo maraka ramo tu vovohia? Aira vunu hinea i Mosis mo tomuakinira tivarea tina vanua Isiv.

¹⁷?Vunu ihe tangaloi maira hinea i God mo lologutekinira haburu a hukao ngavu kaivati? Aira kehekehekinira hinea rau vai na hatiki, ramo mate, a tarabehiga rava saro haro nga lo vanua vuroki.

¹⁸?Vunu ihe tangaloi maira hinea i God mo hahariki korora kwara, “Ranahe soro lai te vohoki vaki lo vanua hinea kwara vae nana bete na mabuana lakwara eia”? Aira hinea ramo maraka ramo tu vovohia.

¹⁹Vae hika i kita tau taga tau kikilai kwara aira hini, vae rahe soro lai tea vaki lo vanua hi huri rahe hauhuri tea lui God.