Read West Ambae HIBRU 6 Bible Online

HIBRU 6 - West Ambae bible

HIBRU 6

¹Huri na kinau hi, tana tiraki na gwataki na leo na huhuiana huri Kraes* ne eno ba, vae tana vano vakevake lo huhuiana huri na tangaloi hinea rau ngwarasea. Tahe toko horongi na tanovi na ingwa te tigwaravu. Vae lo hala hokinia hi, tanahe toko huhui te tigwaravu kwara tana toko bohiki na domida tina doridorida tuai hinea a mateana luga, kwara vae tana hauhuri lui God.

²Tanahe toko huhui na hala na bavtaes te tigwaravu mana hala hinea tamo toko tatagao lo tangaloi. [1] Vunu vake tanahe toko vano te lo huhuiana huri na marakaana tina mateana, mana huhuiana huri na hala hinea i God ne taga kwaheki na doridori na tangaloi, vae ne viti kwara rana ahi vaki tuai, diko rana mate vaki tuai.

³A kinau aira vano hi aira hoki na tanovi na ingwa vohoki. Vae i kita ta vano nga. Diko i God u masinge vae tana vai hokinia hi.

⁴Vae a hala tikei lakwara hinea rau mule taliku, huri rau vanamai vaki lo leleha noi God ba. Rau lavi na hilehile ba hinea u vanamai tina taetae. Aira mana tangaloi ratuaki rau lavi na Tanungwe Kokona ba.

⁵Rau hagwe ba kwara a leo noi God u karea haburu, vunu rau rongo na huirana na varamana karagwa ba hinea vae ne vanamai.

⁶Vunu vaki takuni ramo tiraki na noga hauhuriana ramo mule taliku vaki lo bohianaga tuai. Vae hika a hala tikei vohoki kwara tana lavira taliku mulemai kwara tana vaira rana bohi na domiga taliku tina noga vaivai hati, huri rau vai kwehi, hokinia hinea rau duru i Natu i God tilo kaibetu taliku, rau vai na maemaeana lakua lakwae koro na nako na tangaloi doluaki.

⁷Diko a mahigwai-tano u medumedu huri mo toko uha tiluna, ne vai na rivurivu karea rana mauri, ne hago mana tangaloi hinea a nona tano. Hikani i God u vai tabetabeki na tano hi.

⁸Vae diko a mahigwai-tano hini a karo hohokoti mana duvu hati rau tubu luna, a tano hi he karea te mana kinau vohoki. Hokinia u garagarani kwara a tangaroa hati noi God ne eno luna, vunu i God ne magarakinia kina kabu.

⁹Rabela. Keu lagwa haburu maikamu. Keu tuku kwaha hokinia hi maikamu vae lolo domimai keu kikilai kareaki kwara tulu nehe vai te hokinia hi. Keu kikilai kareaki kwara tulu lavi na karekarea hinea i God u bete lakwakamu, huri aia u tuku vakahikikamu.

¹⁰Tigwaravu i God u vai kinau rau karea kehe nga. A lolona nehe bongi tea kina nomiu boloki hinea tulu mo toko vaira. Aia ne domidomi-bibi kwara tulu lagwa haburu maia, vae tulu mo vosangi na nomiu lagwaana hi lolona tulu mo hago mai rabelamiu lui Kraes. Vae tulu hago maira radu nga.

¹¹Vunu i kami keu lengaia haburu kwara vatavatahakikamu a domimiu rana tu ne madi tigwaravu, vunu tulu neri lavi na kinau rusa hinea a domimiu u tu madimadi luga.

¹²Kehe lengaia tea kwara tulu ne keokeo tulu ne huguhugu vuroki. Keu lengaia kwara vae tulu ne huri na tanoi-garuga hinea rau hauhuri u madi a domiga u bua, vae rau hagwe lavi na kinau rusa hinea i God mo tulikinira lakwara.

¹³Tuai, kwahaia hini i God mo tuliki na leona lakwai Evraham, i God u hahariki kwara ne kwiribibi na nona tulikileo hi. Vae huri a tangaloi tikei hinea kwara u lakua sileti God, aia mo hahariki tiluna sibona.

¹⁴U tuliki lakwai Evraham, mo viti kwara, “I nau vae na vai tabetabekinigo vunu nana vai na nomu gwaloana ne matala.”

¹⁵Hikani i Evraham mo vai na domina mo bua, vae huri hi mo hagwe savi na kinau hinea i God mo tulikinira lakwae.

¹⁶Lo doridorida i kita a tangaloi, lolona a tangaloi mo hahariki, u hahariki tilo tangaloi hinea a hinana u lakua siletia. Vunu lolona a tangaloi mo hahariki hokinia hi, vae a leo tikei vake kwara rana viti takuni tiua hi.

¹⁷U karea, i God u tuliki na leona ba lakwa na tangaloi hinea vae rana lavi na kinau savia hinea mo tulikinira lakwara. Vae u lengaia kwara ne vaira rana kikilai vakevake kwara vae nehe bohi na domina te vohoki. Huri hi, mo hahariki tiluna sibona kwara ne vai na nona tulikileo hi ne tu ne madi vakevake. Hikani a leo noi God kairua raru eno, a nona tulikileo mana leo hi kwara ne vai na nona tulikileo ne tu.

¹⁸A leo kairua hi raru nehe bohi lai tea, vunu vake lo leo kairua hi i God nehe kura lai te vohoki. I kita hinea tau hagwe na tanotano na ahiana ba, a leo kairua hi raru rakati na domida vakevake. Vae tana tau doluaki na domida tilo tulikileo hi tana kwiribibia ne madi.

¹⁹A doridori hini tamo tau doluaki na domida mo madi lo tulikileo hi kwara tana hagwe savi na kinau vano hi, aia hoki na vatuliko hinea ne kwiribibi doluaki na mamaurianada. Aia a vatuliko hinea u haga u madi, nehe kilu lai tea. A vatuliko hi aia hokinia u vano sileti na lugwa* na bolo kabakaba [2] vaki lolo Tanotano Kokona Karakara na Ingwa Kokona noi God lolo taetae.

²⁰I Jisas u soro ba tilolo Tanotano hi hurikita, vae mo takahi na hala hurikita. Aia u mulemai ki Hugwe na Tangaloi Lingilingi ba hoki na tangaloi lingilingi hi, i Melkisedek tuai, vae ne vai na bolokiana na hugwe na tangaloi lingilingi vaki tuai a gwereki tikei.