Read West Ambae HIBRU 7 Bible Online

HIBRU 7 - West Ambae bible

HIBRU 7

¹I Melkisedek hi aia a hugwe lakua hinea u hugwe koro na gwatuivanua Salem. [3] Vunu vake aia a tangaloi* lingilingi noi God hinea i God Aulu Karakara. Lolona i Evraham mo mulemai tina vuro hinea mo kwohi matei na hugwe lalakua kaivati, i Melkisedek mo hagwea lo hala mo tau na tangaroa karea tiluna.

²Hikani i Evraham mo lai savi na vivilagoki hinea mo hagwera lo taro na vuro, mo kwahekinira gwatu hangavulu, mo betea gwatu katukwale lakwai Melkisedek. A hina i Melkisedek a domianaki kwara, “A Hugwe Lakua na Bakotoana.” Vake a hinana kairuaki rau kwarekinia kwara “A Hugwe Lakua na gwatuivanua Salem”, hinea a domianaki kwara, “A Hugwe Lakua hinea u Vai Tangwata.”

³A vevehuri huri i tamana mai retahina tikei, diko huri ratubuna vanamai evina kinia tuai, tikei. A vevehuriki tikei kwara ne viti huri na nona voraana mana nona mateana. Aia hokinia i Natu i God, aia a tangaloi lingilingi hinea u kwiribibi na hina na tangaloi lingilingi vaki tuai.

⁴Tulu domidomi lo tangaloi hi i Melkisedek, aia a tangaloi lakua haburu. I tubuda tuai i Evraham aia a tangaloi lakua, vae mo lai savi na vivilagoki hinea mo hagwera lo taro na vuro, mo kwahekinira gwatu hangavulu, vae mo havutia gwatu katukwale mo betea lakwai Melkisedek.

⁵Vae tau kikilai kwara vataha na hukao a gwaloana noi Isrel* rau kwaheki savi na noga kinau gwatu hangavulu. Vunu a Tangwata* u viti kwara a gwaloana noi Livae* hinea aira a tangaloi lingilingi rana lavia gwatu katukwale tina gwaloana noi Isrel vano hi. A ngwera tataga vano hi aira vake a gwaloana noi Evraham, vae a tangaloi lingilingi vano hi rau lai kinau tiura hokinia hi.

⁶I Melkisedek hi aia he gwalo vanamai te lui Livae, vae venaha aia u lavi na vivilagoki gwatu katukwale tiura hangavulu ti Evraham, vunu mo tau na tangaroa karea tilui Evraham, aia hi mo lavi na tulikileo ti God.

⁷U matangwasara kwara lolona a tangaloi mo tau na tangaroa karea tilo tangaloi, aia hinea u lakua u tau na tangaroa karea tilo tangaloi hinea u evina tiua.

⁸Vae a tangaloi lingilingi hinea rau lavi na kinau gwatu katukwale tiura hangavulu, aira a tangaloi matemate. Aia i Melkisedek hi hinea u lavi na kinau gwatu katukwale tiura hangavulu, a Uliuli* Kokona u viti huria kwara aia a tangaloi tokatoka.

⁹Vae i kita tana viti lai hokinia hi, kwara kwahaia hini i Evraham mo bete na kinau gwatu katukwale tiura hangavulu lakwai Melkisedek, aia hokinia kwara i Livae vake u bete. Vae hika kwahale, a gwaloana aia hi noi Livae ramote toko lavi na kinau gwatu katukwale tiura hangavulu hokinia hi, tina gwaloana noi Isrel.

¹⁰Vae lo taro hi i Livae he vora te radu. Aia a gwaloana katukwale noi Evraham hinea u vora vaki takuni vohoki. Vae huri aia u gwalo vanamai lui Evraham, kwahaia hini i Evraham mo domi mavaki i Melkisedek aia hokinia kwara i Livae vake u domi mavakinia.

¹¹Kinahavaki a Tangwata hinea i God mo bete lakwai Mosis tuai u viti kwara a tangaloi lingilingi rana gwalo vanamai lui Livae, vae a tangaloi lingilingi vano hi rahe vai lavi na tangaloi tea kwara rana mulemai ki tangaloi bakoto koro na nako i God. Vae huri a tangaloi lingilingi vano hi rahe taritarisa tea, u taritarisa kwara a tangaloi lingilingi dolua ne vanamai hinea he gwalo vanamai tea lui Eron, vae aia ne hoki i Melkisedek.

¹²Vae lo taro hini a tangaloi lo gwaloana hi ne kwaniana, vunu a tangaloi hinea u gwalo vanamai lo bela dolua ne lai tanotanona, a tangwata* vake, vae ne kwaniana.

¹³Vae hika a noda Hugwe* hinea a leo vano hi ramo toko vitia, u gwalo vanamai lo gwatuidamu dolua. Vae hete kwara te katukwale hinea u gwalo vanamai lo gwatuidamu hini, u boloki lo hala na bolokiana nona tangaloi lingilingi lo voda noi God.

¹⁴I kita tau kikilai ba kwara u gwalo vanamai lo gwatuidamu noi Suta. Vae lolona i Mosis mo toko viti huri na bolokiana nona tangaloi lingilingi, he viti te huri na gwatuidamu hi vohoki.

¹⁵Vae hika a kinau hi mo toko matangwasara vakevake huri a tangaloi* lingilingi dolua hi, u vanamai ba, aia hoki i Melkisedek.

¹⁶Aia u mulemai kina tangaloi lingilingi, hete huri u gwalo vanamai lo bela na tangaloi lingilingi lo hala na tangwata, vae u mulemai kina tangaloi lingilingi kina huirana na nona ahiana hinea a gwereki tikei.

¹⁷A Uliuli* Kokona u viti kwara, “I nigo a tangaloi lingilingi hoki a tangaloi lingilingi hi i Melkisedek tuai, vae kona tu lo boloki hi vaki tuai a gwereki tikei.”

¹⁸A leo hi u lai letiuki na tangwata hinea tuai, huri a tangwata hi a huirana tikei luna, vae he vai lavi na kinau te vohoki.

¹⁹A Tangwata* noi Mosis he vai bakotoki lavi na kinau te vohoki. Vae hikani i God u bete na hala dolua lakwakita hinea u karea karakara, vae tau tau na domida u madi luna. Aia u lavikita tau vanamai garagarani vaki mai God.

²⁰Vunu vake, lolona i God mo rivuki i Kraes* mo kwareki a tangaloi lingilingi, mo hahariki koro na leona kwara ne tu. Vae lolona hinea a tangaloi ratuaki tuai ramo rivukiana ramo mulemai ki tangaloi lingilingi, i God he hahariki koro na leona tea hokinia hini.

²¹Vae i Jisas u mulemai ki tangaloi lingilingi huri na leo hinea i God mo hahariki koroa hinea u uliana lo Uliuli Kokona kwara, “A Hugwe i God u hahariki koro ba vae nehe bohi na domina tea. Aia u viti ‘I nigo a tangaloi lingilingi vae kona tu lo boloki hi vaki tuai a gwereki tikei.’ ”

²²Hikani i Jisas sibona aia u tokanaki na leo harikiana noi God mana bulana tangaloi mo vaia mo tu. Vae huri hi a leo harikiana hinea i Jisas mo tokanakinia u karea sileti na leo harikiana hinea u eno tomua.

²³Vunu a kinau dolua vake nga he hokinia te hini tuai. Tuai a tangaloi lingilingi rau rusa huri aira a tangaloi hinea rau tuku mate, vae rahe tu lai tea lo noga bolokiana kwara ne tuai.

²⁴Vae i Jisas u tu lo nona bolokiana hi, aia a tangaloi lingilingi vaki tuai, huri u ahi vae nehe mate lai tea.

²⁵Vae huri hi u tinakaki hika ne vano nga, vae a gwereki tikei, ne vakahiki lavira hinea rau vanamai vaki mai God lalahia, huri u toka vaki tuai, vae u tu koro na nako i God mo toko tiutangaroa hurira.

²⁶I Jisas aia a noda Hugwe na Tangaloi* Lingilingi bakotoki hinea u taritarisa kwara ne hago maikita. Aia u kokona, he vai na kinau tea kwara u hati, vake a hatiki tikei luna. Aia u dolua vohoki tina tangaloi vaivai hati, vae i God u tabe hakekinia aulu sileti na taetae.

²⁷Aia hete hoki na hugwe na tangaloi lingilingi ratuaki kwara ne kwohi mate kairoroi* vataha na rani huri na nona hatiana tomua, vunu nete kwohi mate kairoroi vake, huri na hatiana nona tangaloi doluaki. Hetea. I Jisas sibona aia a noda kairoroi. U hilea sibona hurikita, u hilea vakatukwale vohoki, mo lai letiuki na hatiana nona tangaloi savia, u vakatukwalekinira u rovo vohoki.

²⁸A Tangwata* noi Mosis u rivuki na tangaloi aira hi kwara rana kwareki a hugwe na tangaloi lingilingi, vae a noga huirana tikei, rau tuku vai na hatiki. Vae a tulikileo hinea i God mo hahariki koroa u vanamai vaki takuni tina Tangwata hini. A leo hi u rivuki na Natu i God hinea i God u vaia u bakoto ba, kwara ne hugu hokinia hi vaki tuai a gwereki tikei.