Read West Ambae HIBRU 8 Bible Online

HIBRU 8 - West Ambae bible

HIBRU 8

¹U karea, hika a gwataki na leo vano hi kemo toko vitira. A noda Hugwe na Tangaloi* Lingilingi katukwale eia u hugu lolo taetae lo matuai God hinea u hugwe koro na kinau savia.

²U tuku boloki lo hala na bolokiana nona hugwe na tangaloi lingilingi lolo Tanotano Kokona Karakara, lolo ingwa haleki na kaikaluhakiana kareaki hinea a Hugwe i God aia u tabea, hete tangaloi.

³Vataha na hugwe na tangaloi lingilingi i God u taura kwara rana hilehile lakwae, rana kwohi mate a kairoroi* huri na hatiana nona tangaloi. Vae lo hala hokinia hi, a noda Hugwe na Tangaloi Lingilingi vake nona hilehile ne eia kwara ne bete lakwai God.

⁴Kwara vae diko u hugu hike lo varamana nehe kwali na hina te hi vohoki kwara aia a tangaloi* lingilingi, huri a tangaloi lingilingi eia rau hilehile lakwai God hoki na Tangwata* noi Mosis mo viti.

⁵A boloki hi a tangaloi lingilingi ramo toko vai, aia hoki na dumu diko a nunu na kinau hinea rau eno lolo taetae. Hokinia tuai, lolona i God mo viti lakwai Mosis kwara ne tabe na ingwa haleki na kaikaluhakiana, u viti kwara, “Ko tagahuri ne karea kwara kona vai savi na kinau aira vano hi ne taritarisa mana dumu hinea nomo vosangiko kinia hivoulu lo vuti lakua.”

⁶Vae hika tau taga kwara a bolokiana nona tangaloi lingilingi hinea i Jisas mo toko vai, u hahaburuka sileti na bolokiana hinea a tangaloi lingilingi tuai ramo toko vai. Vunu lo hala hokinia hi, a leo harikiana noi God mana bulana tangaloi hinea i Jisas mo vaia mo tu, u karea karakara sileti na leo harikiana tomua, huri u tu lo tulikileo na kinau hinea rau hahaburuka.

⁷Kwara vae diko a hatiki u tikei lo leo harikiana hinea tomua, kwara vae a leo harikiana kairuaki tanahe lengaia tea.

⁸Vae a Hugwe i God u hagwe na hatiki lo bulana tangaloi hoki na Uliuli* Kokona mo viti kwara, “Ngwera Isrel* mana ngwera Suta. A rani rana toko vanamai, i nau vae na vai na leo harikiana karagwa maikamu.

⁹Vae nehe hoki na leo harikiana tea hinea i nau mai ratubumiu kemo hariki leo luna tuai, lo taro hi nomo hago lo kabaga nomo turukinira tina vanua Isiv. Aira rau galo lo nomai leo harikiana, vae huri hi nohe domi hurira tea.

¹⁰Lo taro hi vae neri vanamai, a leo harikiana kwara na vai maikamu aia hika. I nau nari huhuikamu kina leo na nogu tangwata, i nau nari ulibibira tilolo domimiu. I nau nari kwareki nomiu God, i kamu tulu neri kwareki a bulagu tangaloi. Vae hete katukwale tikamu kwara vae ne huhui na ngwera tatana taliku kwara, ‘Kona kikilai na Hugwe i God.’ Hete katukwale kwara ne vano ne viti na leo hi lakwai tuana, huri i kamu vunu tulu ne kikilaiau. Ne tinakaki lumiu hinea a hinamiu rau lalakua haburu, ne vano vae vaki lumiu hinea hete tangaloi vitivitihuri lumiu. Na domidomi koro lakwakamu huri na nomiu hatiana. Nanahe domihagwe na nomiu vakasileana tea taliku. A leogu hi, i nau a Hugwe i God, i nau nu vitia.”

¹³Kwahaia hi i God mo viti huri na leo harikiana karagwa, u vai na noga leo harikiana hinea tomua u ngwanika u hati ba. Vunu savi na kinau hinea rau hati u rovo ba, vae nehe tuai tea rana va titikeiki.