Read West Ambae HIBRU 9 Bible Online

HIBRU 9 - West Ambae bible

HIBRU 9

¹Kareaki lo leo harikiana tomua noi God mana tangaloi, a bohianaki eia huri na noga kaluhakiana. Vake a tanotano katukwale eia hinea a tangaloi rau tabea kwara rana kaluhaki God eia.

²A ngwera tuai rau tabe na ingwa haleki hinea a tanotano kairua lolona. A tanotano hi tomuaki rau kwarekinia kwara a Tanotano Kokona. A laeti u eno takwa-hi mana tevo katukwale hinea a bereti* kokona rau tuku eno takwa-hi koro na nako i God.

³Vunu a lugwa kairuaki, hinea a lugwa bolo kabakaba, mo dule koro na Tanotano Kokona, vae tavaluki tina lugwa hi a tanotano kairuaki hinea rau kwarekinia kwara a Tanotano Kokona Karakara.

⁴A voda katukwale u tu eia mana bokisi kokona hi hinea a kaimatai na leo harikiana noi God mana bulana tangaloi. A voda hi ramo kihia kina vikai vunu ramo obo doluakinia kina kol, vae a tangaloi* lingilingi rau tuku hura a kinau* boniboni luna. A bokisi hi vake ramo kihia kina vikai, ramo obo doluakinia kina kol. Lo bokisi hi lolona, a botele katukwale u eno eia hinea ramo kihia kina kol. U kukwere kina mana*, a duvi na hinaka hinea i God mo toko betea tuai lakwa na gwaloana noi Isrel* lo vanua vuroki. Vunu a kinau kairuaki lolo bokisi hi, a kaitiko noi Eron, hinea tuai i God mo vaia mo gwarogwaro taliku mo tavu. Vunu a vatu kairua raru eno lolona, hinea a Tangwata* noi God u uliana lugaru.

⁵Hivoulu lo bokisi hi aia a tanotano hinea i God u tuku domidomi koro na hatiana nona tangaloi doluaki luna. Vunu hivoulu tiluna vake a kinau kairua raru kwareki a Serubim. I rarua a kaimatai kwara i God aia takwa-hi, a kabagaru rau vano kakavuki na tanotano hi. Vae hika a taro tikei kwara na viti tabetabeki savi na duviki kwaririgi huri na kinau vano hi.

⁶Savi na kinau vano hi rau raraiana ba hokinia hi, vae vataha na rani a tangaloi lingilingi rau tuku soro vaki lolo ingwa haleki hi lo tanotano hinea u tu tomua, ramo toko vai na boloki nona tangaloi lingilingi.

⁷Vae a hugwe na tangaloi* lingilingi kehekeheki aia u vano vaki lolo tanotano kairuaki hi lolona radu, vae u soro vaki lolo tanotano hi vakatukwale vohoki lo hukao. Lolona hi mo soro, vae u lavi na dai na boboroa kwara ne hile lakwai God huri na nona hatiana sibona, vunu vake huri na hatiana nona tangaloi, huri rau vakasile vae rahe kikilai tea.

⁸Lo kinau aira vano hi a Tanungwe Kokona u vosangi matangwasaraki na kinau hika. Lolona a tanotano na ingwa haleki hi tomua mo tu radu nga, a hala he matakahi tea vaki lolo Tanotano Kokona Karakara.

⁹Aia hi hoki na tavaluileo katukwale hinea u matai na taro aia hi tau hugu luna. A leo hi a domianaki kwara savi na hilehile hinea a tangaloi rau tuku bete lakwai God, vunu a boboroa hinea rau tuku kwohi mate huri na noga hatiana rahe taritarisa tea. A kinau vano hi rahe vai lavi na domi na tangaloi tea kwara ne bakoto koro na nako i God.

¹⁰Savi na kinau vano hi rau viti huri na hala kehekeheki huri na kanikani mana inuinu, vunu a hala kwara rana kwasu vataha na kinau rana ngwasara koro na nako i God. Aira vunu a tangwata* huri na tarabehi kehekeheki, vae rau tu tarisaki hi i God mo bohiki savi na kinau mo rivuki na hala karagwa.

¹¹Vae i Kraes* u vanamai ba hinea aia a Hugwe na Tangaloi* Lingilingi huri na kinau karekarea hinea rau vanamai ba. [4] Vunu a ingwa haleki hi hinea i Kraes mo toko vai na nona boloki lolona, u hahaburuka u taritarisa vohoki siletia hi tomua. A ingwa haleki hi, hete kinau kwara a tangaloi rau tabea, aia hete kinau na varamana hika hinea i God mo taura.

¹²Vake lolona i Kraes mo soro tilolo ingwa haleki hi, mo hena tilolo Tanotano Kokona Karakara, vae he vai tea hoki na hugwe na tangaloi lingilingi ratuaki ramo toko vai. He lai te dai na nani ngwera mana dai na buluki ngwera kelekele, kwara ne lai letiuki na hatiana nona tangaloi kinia, hetea. U lai a daina sibona, mo soro vakatukwale vohoki vae nehe mule te taliku, u vakatukwalekinira u rovo vohoki. U volitukuhikita tina noda hatiana, vae tana ahi vaki tuai a gwereki tikei.

¹³A dai na nani ngwera mana dai na buluki ngwera mana gwia na buluki vavine takwae hinea rau huraia lo kabu, a tangaloi* lingilingi rau bulaki girigirikinira tilo tangaloi hinea a tarabehiga hokinia rau hogora koro na nako i God. Hikani a kinau aira vano hi rau vai lavi na tarabehiga hokinia ramo ngwasara kinia taliku koro na nako i God.

¹⁴Vae a dai i Kraes u vai na boloki hinea u huira vohoki sileti na boloki na kinau aira vano hi tuai. Lalahi na huirana na Tanungwe Kokona hinea nehe mate lai tea, i Kraes u tirakinia sibona lakwai God. Aia hoki na kairoroi* hinea a kinau he tigelia te vohoki. Hikani a daina hi u vaikita tau rongo lo tarabehida kwara tau ngwasara tina boloki na mateana hinea tamo toko vaira, kwara vae tana boloki noi God hi Tatoka.

¹⁵Huri na kinau hi i Kraes* aia a kaikao na tangaloi, u tu lo livukada mana livuka i God, mo vai na leo harikiana karagwa mo tu. Huri u mate, u volitukuhikita tina noda hatiana hinea tamo galo lo noda leo harikiana tomua halaradu. U vai hokinia hi kwara i kita hinea i God mo kwarekita, tana lavi na kinau karekarea hinea rau eno vaki tuai hinea i God u tuliki terekakinira lakwakita.

¹⁶Diko te tangaloi katukwale u tuliki terekaki na nona vivilagoki te lakwa na tangaloi tea, kwara vae lolona ne mate a tangaloi hi ne lavira, vae u matangwasara lakwa na tangaloi vunuhia kwara a tangaloi hinea mo tuliki terekaki na vivilagoki vano hi, vae ne mate tomua vunu a tulikileo hi neri tu.

¹⁷Vae diko a tangaloi hinea u tuliki terekaki na nona vivilagoki u ahi radu nga a nona tulikileo hi nehe tu lai tea. Vae ne tu lai kehekeheki lo taro hi ne mate.

¹⁸Vunu lo hala hokinia hini vake lolona i God mo vai na leo harikiana [5] mana bulana tangaloi tomua halaradu, a boboroa mo abe a dai mo huki, vae hokinia a dai kehekeheki mo vai na leo harikiana hi mo tu.

¹⁹Tomua i Mosis u matangwasaraki savi na tulikileo na Tangwata* noi God lakwa na tangaloi u taritarisa hokinia hi a Tangwata mo viti. Vunu vaki takuni u lavi na dai na natu na buluki mana dai na nani, mo rokerarua kina kwai. Vunu mo lavi na vulu na sivsivi memea mana ranga na rivurivu hi a hisov*, a rauki luna, mo tulirarua tilo dai hi, mo bulaki girigiriki na dai hini tilo buku* na Tangwata hi, vunu tilo tangaloi savia vake.

²⁰Mo viti, “Hika a dai na noda leo harikiana mai God kwara ne vai na leo harikiana hi ne tu. A leo harikiana hi, i God u viti lakwakita kwara tana rongohuria.”

²¹Vunu lo hala hokinia nga i Mosis u bulaki girigiriki na dai hi tilo ingwa haleki na kaikaluhakiana mana vivilagoki hinea ramo toko kaluhaki God kinira.

²²Kareaki lo hala na Tangwata noi Mosis u garagarani maeno kwara a tangaloi* lingilingi rana vai savi na kinau rana ngwasara koro na nako i God kina dai na boboroa. Vunu vake diko a dai nehe huki tea, i God nehe domidomi koro lavi na hatiana te nona tangaloi.

²³A kinau aira vano hi hinea a tangaloi* lingilingi tuai ramo toko kaluhaki God kinira, hinea aira a nunu na kinau lolo taetae, rana ngwasara kina dai na boboroa hinea ne huki. Vae a kinau hinea lolo taetae, u taritarisa kwara vae a dai na kairoroi* ne huki hinea u karea siletia hi, kwara ne vaira rana ngwasara.

²⁴I Kraes* he soro te tilolo Tanotano Kokona hinea a tangaloi rau tabea kina kabaga, hinea aia a nunu na Tanotano Kokona bakotoki. Vae aia u soro vaki lolo taetae, vunu hika u tu koro na nako i God u tuku kwaha maia hurikita.

²⁵A hugwe na tangaloi* lingilingi nona gwaloana noi Isrel*, vataha na hukao u tuku soro tilolo Tanotano Kokona Karakara, u lai a dai na boboroa. Vae i Kraes he vano tea vakarusa kwara ne hilea sibona lakwai God.

²⁶Kwara vae diko u tuku vai hokinia hi kwara vae ne dule lo kaibetu vakarusa ne rongo hati lo tarabehina vakarusa, mo tinakaki lolona hinea a varamana mo tauana tarisaki na hika. Aia hikani u garagarani kwara a varamana ne rovo, u vanamai vakatukwale vohoki, mo vakatukwaleki na kinau aira vano hi kwahaia hi mo hilea sibona kwara ne lai letiuki na hatiana nona tangaloi.

²⁷I God u domiki na hala huri na tangaloi doluaki u rovo ba. A tangaloi vae ne mate vakatukwale, vunu vaki takuni i God neri taga kwaheki na doridorina savia.

²⁸Vae lo hala hokinia hi i Kraes u hilea sibona vakatukwale kwara ne lai letiuki na hatiana nona tangaloi rusa. Vae ne vanamai taliku vakairuaki, hete kwara ne lai letiuki na hatiana, vae kwara ne vakahikinira hinea rau hugu tarae.