Read West Ambae SEMIS 4 Bible Online

SEMIS 4 - West Ambae bible

SEMIS 4

¹?A gwataki na viroroa mana vikwali maikamu u vanamai kworohokinia? U vanamai huri i kamu tulu domi hurikamu sibomiu kwara tulu ne lagwalagwa tigwaravu lo nomiu lengalengahuri kehekeheki. Vunu a nomiu lengalengahuri vano hi rau vaikamu a domimiu rau kwalao laliki, vae hi rau magaraki na mamaurianamiu.

²Lolo domimiu tulu lengai na kinau haburu vae tulu he lai lavira tea, vunu tulu mo ua mate tangaloi huri. Tulu lengai na kinau nona tangaloi dolua vae tulu he lai lavira tea, vunu tulu mo viroro tulu mo vikwali huri. Vae tulu he lavi na kinau tea hinea tulu lengaira, huri tulu he uduhuri te ki God.

³Vunu lolona tulu mo uduhuri a kinau ki God, tulu he lai lavira tea huri a domidomimiu rau hati. Tulu tuku longi na kinau vano hi ti God kwara rana vaikamu kehekeheki tulu ne lagwalagwa.

⁴I kamu hoki na vavine hinea u veveki rera ki tuana ngwarasea mo tiutokakivanua mana ngwera dolua. ?Tulu he kikilai tea kwara a tangaloi hinea u lagwa mana doridori na varamana aia a tavaluivuro noi God? Ihe hi u lengaia kwara ne huri na doridori na varamana u mulemai kina tavalui vuro noi God.

⁵A Uliuli* Kokona u viti kwara, “I God u lengaia haburu kwara a tanungwe hinea u taua luda ne kwareki a nona kehekeheki.” [2] Vae a leo hi hete leo vuroki.

⁶Vae i God u hago maikita vakevake kina nona domi tabetabe lakua. Vae huri hi a Uliuli Kokona u viti kwara, “I God u tu korora hinea rau domidomi hakekinira, vae a tangaloi hinea rau hivokinira i God u hago maira kina nona domi tabetabe lakua.”

⁷Vae huri hi u taritarisa kwara tulu ne hivokikamu tulu ne hugu tavuti i God. Tulu ne tu koro i Setano*, vae ne kwalao tikamu.

⁸Tulu vanamai vaki garagarani mai God, vae aia ne vanamai vaki garagarani maikamu. I kamu a tangaloi vaivai hati, u taritarisa kwara tulu ne sasavula. I kamu hinea a domimiu rau reve lalikikamu, tulu vai na domimiu ne katukwale ne ngwasara.

⁹U taritarisa kwara tulu ne rongo hati, tulu ne ngara, tulu ne tangi huri na nomiu vaivai hati. Tulu hatu mana, vae tulu ne tangi. Tulu hatu lagwalagwa, vae tulu ne rongo hati.

¹⁰Tulu hivokikamu lo nako na Hugwe i God, vae aia neri tabe hakekikamu.

¹¹Rabela. Tulu hatu kwaha bulabula vovohikamu muleki. A tangaloi hinea u kwaha bulabula vovohi i tuana, diko u taga kwaheki na doridorina kwara u karea diko u hati, aia u kwaha bulabula vovohi na Tangwata* noi God, u taga kwahekinia mo viti kwara u hati. Lolona tulu mo taga kwaheki na Tangwata tulu mo viti kwara u hati, hi tulu he hugu te tavuti na Tangwata, aia tulu vaikamu tulu mo aulu sileti na Tangwata hi.

¹²I God u vai lai kwara ne vakahiki na tangaloi diko ne magarakinira, vae aia kehekeheki u taritarisa kwara ne rivu Tangwata, ne taga kwaheki na bohiana nona tangaloi. ?Vae i kamu tulu domi kwara i kamu i God, tulu taritarisa kwara tulu ne taga kwaheki na bohiana noi rabelamiu hokinia hi?

¹³Tuaki tikamu rau viti kwara, “Hika karagwa diko mavuko kena vano vaki lo gwatui-vanua lakua katukwale. Takwahini kena hugu a hukao katukwale, kena boloki haro a nomai mane*, vae ne lakua.” Vae hika tulu rongo na viti.

¹⁴I kamu tulu he kikilai te vohoki kwara a nomiu mauriana vaki na mavuko te kworohokinia. I kamu hoki na vivi hinea u eno kelekele vohoki vunu va titikeiki taliku.

¹⁵A leo hika u taritarisa maikamu kwara, “Diko a Hugwe i God u masinge kwara kena toka, karea kena toka kena vai hokinia hika diko hokinia hinea.”

¹⁶Vae lo taro hika i kamu tulu kwetukwetutu, tulu kwaha domidomikamu, vae savi na domidomi hokinia hi rau hati.

¹⁷A tangaloi hinea u kikilai na kinau u karea kwara ne vai, vae he vaia tea, hi u kwareki a nona vaivai hati.