Read West Ambae SEMIS 5 Bible Online

SEMIS 5 - West Ambae bible

SEMIS 5

¹Vunu i kamu vake a tangaloi hugwe, tulu rongo na viti. U taritarisa kwara tulu ne tangi, tulu ne ulo, huri na rongoana hati lakua hinea vae ne kihikamu.

²Lo nako i God a nomiu vivilagoki karekarea aira hokinia kwara rau madamada ba, vake a lugwamiu aira hokinia kwara a kanikani rau kanira ba.

³A nomiu mane* hi a kol mana silva aia hokinia kwara rau daira ba. Vae a dairaki neri matangwasaraki kwara tulu hati, vunu ne kani na tarabehimiu hoki na kabu mo kani utuutuhi na kinau. Lo taro hika hinea a varamana u garagarani kwara ne rovo, vae tulu mo maraka tulu mote tau vileki na nomiu mane kwara ne lakua.

⁴A tangaloi boloki rau boloki u rovo ba lo bulamiu agoago*, vae tulu he malaira tea. Vae a kaimalaiga u hagoleo u viti kwara tulu hati, vae u tuku ngarahakikamu radu nga. A leo na tangaloi boloki vano hi hinea rau kwaha langalanga u maravuti lo gwero na Hugwe i God hinea u hugwe koro na kinau doluaki.

⁵Lo varamana hika tulu toka u karea, tulu tuku lai kinau hinea rau vaikamu tulu lagwalagwa tigwaravu. I kamu hoki na buluki hinea u kanikani karea u damoi, vae a ranina u maravuti ba kwara rana kwohi mateia.

⁶Tulu areki na tangaloi bakoto tulu mo viti kwara rana mate, tulu mo kwohi matei na tangaloi hinea a hatiki tikei luga. Vae a tangaloi bakoto vano hi rahe tu korokamu tea.

⁷Rabela. Tulu ne vai a domimiu rana bua vae tarisaki a noda Hugwe* ne mulemai taliku. Tulu domidomi lo hala na rivurivu. Tulu vai na domimiu ramo bua kwara tulu ne hugu tara na bulamiu kwai na rivurivu karekarea lolo agoago*. Tulu hugu tara na kaitavu kukwehu kwara a tano ne medumedu, a rivurivu rana mauri ne karea. Vunu tulu hugu tara na kaitavu lakua kwara a rivurivu rana kwai a kwaiga rana horo.

⁸Vae lo hala hokinia hi tulu ne vai na domimiu rana bua, vake tulu ne tau na domimiu ne madi lo noda Hugwe, huri a rani na nona mulemaiana u garagarani.

⁹Rabela. Tulu hatu kwahakwaha hati vovohikamu muleki, hinea tulu viti kwara, “A tangaloi hi u vakasile vae huri hi tau rongo hati, vunu a tangaloi hinea vake.” Diko tulu vai kwehi, vae i God ne arekikamu. Vae tulu kikilai kwara a Kaiareki hi na tangaloi u garagarani lo matakihala vohoki.

¹⁰Rabela. U taritarisa kwara tulu ne domidomibibi na tangaloi* duruduruki tuai hinea rau duruki na leo lo hina na Hugwe i God. A tangaloi ramo vaira ramo rongo hati haburu, vae a domiga rahe sovi tea. Lo hala hokinia hi rau tau na tanoigaru karea kwara tana huria.

¹¹Ramo tu mo madi rahe tiraki tea, vae huri hi tau viti kwara i God u vaira ramo rongo karea. Vake tulu rongo na vevehuri huri i Sov ba hinea a domina mo bua. Tulu kikilai na kinau ba hinea i God mo vai lakwae vaki takuni, huri a Hugwe i God u tuku vai tabetabeki na tangaloi, u hakavira tigwaravu.

¹²Rabela. Hivoulu tina kinau ratuaki, lolona tulu mo viti na leo, tulu hatu hahariki kwara a leomiu ne tu. Tulu hatu hahariki vaki lolo taetae, diko te lo varamana, diko te tilo kinau dolua. Diko tulu viti kwara, “Io,” tulu ne viti “Io” vohoki. Vunu diko tulu viti kwara, “Hetea,” tulu ne viti vohoki kwara, “Hetea.” Diko tulu viti kinau haroki, vae i God ne arekikamu huri.

¹³?Te kworohokinia? Diko te katukwale tikamu u rongo hati te lo kinau, u karea kwara ne tiutangaroa. Diko te katukwale tikamu u lagwalagwa, u karea kwara ne kaho kaluhaki i God.

¹⁴Diko te katukwale tikamu u lenga, u karea kwara ne kware na ngwarasea* na kwarelua* rana tiutangaroa maia, rana lilingi oel tiluna lo hina na noda Hugwe*.

¹⁵Vae a tiutangaroa nona tangaloi hinea u tiutangaroa u hauhuri, ne vakahiki na tangaloi hi. A noda Hugwe ne vai na tarabehina ne huira taliku, vunu diko u vai na hatiki tea, a noda Hugwe ne domidomi koro lakwae.

¹⁶Vae huri hi u taritarisa kwara tulu ne matangwasaraki na nomiu vaivai hati lakwakamu muleki, vunu tulu ne tiutangaroa hurikamu muleki kwara i God ne vakahikikamu tina kamiu lengeana. A tiutangaroa huira nona tangaloi bakoto a huiranaki eia.

¹⁷I Elaesa aia a tangaloi hokikita, vae aia u tiutangaroa, a domina u huira kwara ne hatu uha, vae he uha te vohoki a hukao kaitolu a vula kaiono.

¹⁸Vunu taliku mo tiutangaroa, a uha mo ngwangwarasuki vanamai tina mahaleki, a tano mo medumedu, a rivurivu ramo mauri.

¹⁹Rabela. U karea kwara tulu ne kikilai na kinau hika. Diko te katukwale tikamu u halebohi tina vitikareaki, vunu katukwale tikamu vake u lavia mulemai taliku, aia u vai na bolokiana karea hi. Ihe tea hinea u kwaha tabetabeki mana tangaloi vaivai hati mo mulemai taliku tina hala hati vaki lo hala bakoto, vae u vakahiki na tangaloi vaivai hati hi kwara nehe sala tea. [3] Vake ne vai na hala kwara i God ne domidomi koro na hatiana rusa.