Read West Ambae 1 PITA 1 Bible Online

1 PITA 1 - West Ambae bible

1 PITA 1

¹I nau i Pita, a kaihora* kokona noi Jisas Kraes*, nu uli na leta hika lakwakamu hi a tangaloi noi God hinea tulu hugu laliki hoki na vanamaiana vohoki lo vanua aira hika, Pontas, Galesia, Kavatosia, Esia* maia Bitinia.

²I God a Tamaki u mataikamu lo nona domidomi tuai kwara ne vaikamu kina nona Tanungwe tulu ne kwareki a tangaloi kokona, tulu ne rongohuri i Jisas Kraes, vake a daina ne vaikamu tulu ne ngwasara tina hatiki. A tangaroa karea hika lakwakamu. I God ne hago maikamu vakevake kina nona domi tabetabe lakua, ne bete na magemuana ne eno maikamu tigwaravu.

³Tana lai noda lagwaana lakwai God a Tama na noda Hugwe* i Jisas Kraes*. Huri na nona hahakaviana lakua, mo vaikita tamo vora taliku, mo hiletikita kina ahiana karagwa luna hi mo rakati i Jisas Kraes tina mateana. Vae huri i kita tau mulemai ki tangaloi karagwa, tau tau na noda domidomi u huira lui Jisas Kraes, vae mo toko huira vakevake tigwaravu.

⁴Vunu vake tau kikilai kwara tana lavi na kinau karekarea lalakua hinea i God mo tau terekakinira huri na bulana tangaloi. A kinau karekarea vano hi aira a nomiu, vae ranahe hati lai tea, ranahe madamada lai tea, vake ranahe tikei tea huri i God u tau terekakinira lolo taetae.

⁵A kinau aira hi rau eno lakwakamu hinea tulu hauhuri, vae lalahi na nomiu hauhuriana hi, i God u kwiribibikamu kina nona huirana vae tarisaki hi ne vakahikikamu. U vai rarai savi na kinau ba kwara ne vakahikikamu, vae ne vosangira tivarea lo taro hi ki rovonaki.

⁶Vae huri na kinau hi tulu ne lagwalagwa, venaha diko u taritarisa kwara tulu ne rongo hati lo taro gwanugwanu hika lo kinau rusa hinea rau tuku vaivai rongohikamu.

⁷A kinau aira vano hi rau tuku vaikamu kwara rana vosangi kwara a nomiu hauhuriana u kareaki. A kol aia a kinau karea, vae ne hati lai, vae a tangaloi rau hurahura rongohia kina kabu kwara rana taga kikilakinia. Vae lo hala hokinia hi, a nomiu hauhuriana hinea u karea haburu sileti na kol, vae aia vake i God ne vaivai rongohia kwara ne eno lai vaki tuai. Vunu lo Rani ki Rovonaki [1] hinea i Jisas Kraes ne maravuti, vae i God ne kalukikamu, ne tabe hakekikamu, ne bete na hina lakua lakwakamu.

⁸Tulu he tagai Jisas Kraes te vohoki, vae tulu lagwa maia haburu. Tulu he tagaia tea hikani, vae tulu hauhuri luna, tulu lagwalagwa, u havutikamu kina lagwaana hinea u vanamai ti God, vae tulu viti lengalengakinia.

⁹Tulu lagwalagwa kwehi huri tulu tuku lavi na kinau hinea tulu hauhuri kwara tulu ne lai, vae aia hi i God ne vakahikikamu.

¹⁰A tangaloi* duruduruki tuai rau tuku soro haro na hala kwara i God ne vakahikikamu luna, ramo toko uhi haro na leo uhiuhi rusa huria. Vunu ramo duruki na leo ti God, ramo viti huri kwara i God ne hago maikamu kina nona domi tabetabe lakua.

¹¹Rau kahi haro kwara rana kikilai na halaki mana taroki hinea a kinau vano hi rana mule luna, huri a Tanungwe noi Kraes hinea mo toka luga mo toko tihu na kinau vano hi. Aia u tuku viti terekaki lakwara kwara i Kraes ne rongo hati lo tarabehina, vunu vaki takuni i God ne bete na hina lakua lakwae lolo taetae.

¹²I God u matangwasaraki lakwa na tangaloi duruduruki vano hi kwara a vitikareaki hinea rau tuku matangwasarakinia, hete hurira siboga vae hurikamu. Vae hikani a vitikareaki hi u maravuti maikamu ba. A tangaloi aira hinea ramo toko viti na Roro Karea, rau tuku kwahakwaha kina huirana na Tanungwe Kokona hinea i God u horae vanamai tina taetae. Aira hi rau viti na vitikareaki vano hi lakwakamu. A vitikareaki hi a kaihora lolo taetae vake rau lengaia haburu kwara rana kikilaia.

¹³Huri na kinau vano hi, u taritarisa kwara tulu ne vai rarai na domimiu. A domimiu rana ngwasara, tulu ne tagataga, tulu ne tau na nomiu domidomi ne madi lo kinau karekarea hinea vae i God neri hile lakwakamu kina nona domi tabetabe lakua, kwahaia hi i God ne vai i Kraes* ne maravuti kikita tana tagaia.

¹⁴Tulu ne rongohuri i God. Tulu hatu tiraki na nomiu lengalengaiana na tarabehi rana reve gegeakikamu hokinia tuai, lolona hinea tulu mo lengalengaki na uta.

¹⁵Aia tulu ne kokona lo kinau savia hinea tulu mo toko vai, hokinia i God hinea mo kwarekamu aia u kokona.

¹⁶Lo Uliuli* Kokona u viti kwehi kwara, “I kamu vae tulu ne kokona huri i nau nu kokona.”

¹⁷I God u tuku taga kwaheki na doridori na tangaloi doluaki tigwaravu lo hala katukwale vohoki, u taritarisa mana kinau hinea vatavatahakinira ramo toko vai. Vae tulu mo toko tiutangaroa lakwae, tulu mo toko kwarea kwehi kwara, “Mama”, vae huri hi lo nomiu tokaana hike lo varamana tulu ne domi mavakinia tigwaravu.

¹⁸I kamu tulu kikilai kwara lolona i God mo volitukuhikamu kwara tulu ne ahi tina tokaana hi he taritarisa tea, hinea tulu mo lavia ti ratubumiu tuai, vae he volitukuhikamu tea kina kinau hinea vae rana hati lai, hoki na silva mana kol.

¹⁹Aia u volitukuhikamu kina dai i Kraes luna hi mo mate lo kaibetu. A dai hi u karea haburu lo nako i God huri i Kraes aia hoki na kairoroi* hinea a kinau he tigelia te vohoki, u ngwasara vohoki.

²⁰Tuai, i God he tau na varamana te radu nga, u matai Kraes ba kwara ne volitukuhikamu, vae hikani lo taro hinea a taro ki rovonaki i God u vosangia tivarea kwara ne vakahikikamu.

²¹Vae huri na kinau hinea i Kraes mo vai, tulu hauhuri lui God hinea mo rakatia tina mateana, vunu mo tabe hakekinia lolo taetae. Vae huri hi tulu mo hauhuri lui God mo madi, tulu mo tau na domimiu mo madi luna radu.

²²Tulu vaikamu tulu ngwasara ba huri tulu rongohuri na vitikareaki, vae huri hi tulu lagwa kareaki mana rabela savia lui Kraes*. Vae hikani tulu ne lagwalagwa maikamu vunuhia mana domimiu kina lagwaana hinea nehe bohi tea.

²³A leo noi God aia a leo tatoka, nehe sala lai te vohoki, vae u vaikamu tulu vora taliku, tulu lavi na ahiana karagwa. Lo ahiana hi i God aia i Tamamiu, vunu vake, he mate lai tea lo taroki, vae u toka vaki tuai, vaki tuai.

²⁴Hoki na Uliuli* Kokona mo viti kwara, “A tangaloi vunuhira aira hoki na duvu, a noga karekarea doluaki aira hoki na viraki. A duvu hi ramo goru, a viraki rava ngwangwarasuki letiu,

²⁵vae a leo nona Hugwe i God u eno vaki tuai.” A leo hi aia hini a Roro Karea hinea ramo matangwasarakinia lakwakamu.