Read West Ambae 1 PITA 3 Bible Online

1 PITA 3 - West Ambae bible

1 PITA 3

¹Lo halaki hokinia nga i kamu a natu vavine hinea tulu laki ba, tulu ne vai tabetabeki ratuamiu ngwarasea. Vae diko te ratuaki tiura rahe hauhuri te lo leo noi God, vae a nomiu bohibohi karea neri reveira rana hauhuri. Diko rana taga kwara a bohibohianamiu u ngwasara, tulu tuku domi mavakinira, vae a bohibohianamiu hi ne taritarisa kwara ne reveira. A kinau tikei kwara tulu ne viti lakwara.

³Tulu hatu vai dedekikamu lo tarabehimiu tavalavarea. Tulu hatu vai dedekikamu lo vulumiu, diko tulu mo vinu a kol, diko tulu mo lugwaki na lugwa karekarea, kwara tulu ne vosangi kwara tulu karea haburu lo nako na tangaloi.

⁴Aia u karea siletia hi kwara tulu ne vai na domimiu ne bakoto lo nako i God. U karea kwara tulu ne kwareki a ravavine magemagemu, tulu ne kwareki a ravavine huguhugu butu, vunu tulu ne kwareki a ravavine karekarea vaki tuai, huri a bohiana aira vano hi rau karea haburu lo nako i God.

⁵A ravavine kokona tuai hinea rau domi mavaki God, rau tau noga domidomi u madi luna, rau vaira siboga ramo kwareki a ravavine karekarea lo hala aia hika, ramo vai tabetabeki ratuaga ngwarasea.

⁶I Sera u vai kwehini, mo rongohuri i Evraham mo kwarekinia kwara, “A nogu hugwe.” Vae hikani i kamu, diko tulu vai kinau karea, tulu he mataku te kina kinau, tulu kwareki i raranatu i Sera.

⁷Lo halaki hokinia hi, i kamu a ngwera hinea tulu laki ba, lo nomiu tokaana mai ravavinehimiu, tulu ne domidomi ne karea tulu ne hago maira, huri tulu kikilai kwara rahe huira tea hokikamu. Tulu ne domi mavakinira huri i kamurua haragoki kuru ne lavi na ahiana hinea i God ne betekamurua kinia kina nona domi tabetabe lakua. Kuru ne vai hokinia hi kwara vae a kinau nehe tu koro na nomiru tiutangaroa tea.

⁸A leogu rovonaki aia hika. I kamu vunu a domidomimiu ne katukwale, tulu ne hakahakavikamu muleki, tulu ne lagwalagwa maikamu hokinia tulu vituatua vohoki. Tulu ne vaivai karea maikamu, vake tulu ne hivokikamu.

⁹Diko a tangaloi rana vai kinau hati vovohikamu tulu hatu gele lakwara taliku. Diko a tangaloi rana tiutangaroa hati kikamu, i kamu tulu hatu tiutangaroa hati kinira taliku. Aia tulu ne gele lakwara taliku kina tangaroa karea, huri lolona i God mo kwarekamu mo tuliki kwara ne vai tabetabekikamu.

¹⁰A Uliuli* Kokona u viti kwara, “Ihe tea hinea u lengaia kwara ne havutia lo mamaurianana, u lengaia kwara ne tagai na taro karea, ne kwiribibi na leona tina hatiki, ne hatu kurakura taliku.

¹¹Ne bohi tina hatiki, ne vai kinau rau karea, ne huira kwara ne lavi na magemuana, ne huria.

¹²A Hugwe i God u tagataga-bibira hinea rau bakoto, vunu tigwaravu u gwerongo huri na noga tiutangaroa. Vae ne halebohi ne tu dori kinira hinea rau tuku vai kinau rau hati.”

¹³?Diko tulu lengaia haburu kwara tulu ne vai kinau karea, vae ihe ne vai kadikamu huri?

¹⁴Vae diko te lo taroki tulu mo rongo hati lo tarabehimiu huri kwara tulu mo vai kinau hinea rau bakoto, ne havutikamu. Tulu hatu mataku kina tangaloi, a domimiu ne hatu kwalao laliki.

¹⁵Tulu tau i Kraes* ne kwareki a nomiu Hugwe*, tulu domi mavakinia lolo domimiu. Tulu rarai vataha na taroki kwara tulu ne daraki na leo nona tangaloi haro hinea rana uduhuri kikamu kwara tulu ne matangwasaraki lakwara kwara kworohokinia tulu mo tau na nomiu domidomi mo madi lui Kraes.

¹⁶Vae tulu ne vai luna hi kina domi magemu mana domi mavakiana. Tulu ne vai kinau ne karea tigwaravu kwara tulu ne rongo lo tarabehimiu kwara tulu he vai te kinau hinea rau hati. Vunu diko a tangaloi rana kwahakwaha hati vovohikamu, rana viti kwara a hala karea hinea tulu mo bohibohi luna huri i kamu a tangaloi noi Kraes he taritarisa tea, vae rana maemae.

¹⁷Diko tulu vai kinau rau bakoto kehe nga, vae a tangaloi rau vaikamu tulu mo rongo hati lo tarabehimiu huri, vae huri aia a domikiana noi God, aia hi u karea siletia hi a tangaloi ramo vaikamu tulu mo rongo hati lo tarabehimiu huri na kinau tulu mo vaira hinea rahe bakoto tea.

¹⁸I Kraes* u mate huri na hatiana vakatukwale vohoki vae nehe mate te taliku. Aia a tangaloi hinea u bakoto u mate huri na tangaloi vaivai hati, kwara vae ne lavikamu vaki mai God. A tangaloi rau kwohi mateia, a tarabehina mo mate, vae i God mo vai na tanungwena mo ahi,

¹⁹vae lo ahiana karagwa hi mo vano vaki mana tanungwe na tangaloi hinea rau hugu hoki na tangaloi gwarugwaru vae mo heretuva lakwara.

²⁰A tanungwe na tangaloi vano hini, aira hinea rahe rongohuri God te lo taro i Noa mo kihi na aga. Vae i God u vai na domina mo bua mo hugu tarara lo rani aira vano hi. Lo aga hi, a tangaloi rahe rusa tea, aira kaikwalu vohoki, ramo ahi kina kwai.

²¹A kwai hini u kwareki a kaimatai na bavtaes, aia hi tulu ahi luna hikani, hete kwara u kwasu letiuki na hogo tina tarabehimiu, aia tulu tau na tulikileo lakwai God kina domi karea. A bavtaes hini u vakahikikamu lalahi na marakaana taliku noi Jisas Kraes.

²²I Jisas aia hi mo mule vaki lolo taetae u hugu lo matuai God, vae u hugwe koro na kaihora lolo taetae doluaki, mana tangaloi lalakua mana kaitomuaki savira lolo taetae.