Read West Ambae 1 PITA 5 Bible Online

1 PITA 5 - West Ambae bible

1 PITA 5

¹I nau a ngwarasea* na kwarelua*, nu lengaia kwara na kwaha tabetabe mana ngwarasea lo kwarelua hike maikamu. I nau nu tagai Kraes* ki matagu lolona mo rongo hati lo tarabehina, vunu i nau vake nu taritarisa kwara na lavi na karekarea na taetae hinea i Kraes ne lavia vanamai. Nu seseaka lumiu kwara

²tulu ne tagahuri na tangaloi hinea i God mo betera lakwakamu hokinia hinea a kaitagahuri na sivsivi mo tagahuri na bulana sivsivi. Tulu tagahuri tabetabekinira kina domi lagwalagwa hokinia i God u lengaia. He karea tea kwara tulu ne tagahurira hokinia tulu he lagwa te luna. Tulu hatu vai nomiu boloki kwara tulu ne lai kaivoli huri, vae tulu boloki kina domimiu savia huri tulu lagwa luna kareaki.

³Tulu hatu vai kwara tulu ne hugwe korora hinea i God u betera tilo kabamiu. Vae tulu tau na tanoigaru karea lakwara rana huri luna hoki na sivsivi ramo huri tabulaga.

⁴Vunu a Kaitagahuri Lakua na Sivsivi hinea a Hugwe na kaitagahuri na sivsivi savia ne maravuti. Aia neri vulehikamu hokinia ramo vulehi na tangaloi hinea mo gui na nona tavaluivuro, [4] aia ne tabe hakeki na hinamiu vaki tuai nehe rovo tea.

⁵Lo hala hokinia hi, i kamu a ngwalagelo tulu rongohuri na nomiu ngwarasea. Vunu i kamu doluaki tulu lailai hivokikamu kwara tulu ne hagohago maikamu, huri a Uliuli* Kokona u viti kwara, “I God u bulakiki vovohira hinea rau lailai hakekinira, vae aira hinea rau lailai hivokinira, u hago tabetabeki maira kina nona domi tabetabe lakua.”

⁶Vae huri hi tulu hivokikamu kwara tulu ne hugu tavuti na kaba i God hinea a huirana luna, vunu lo taro hinea mo tagaia kwara u taritarisa aia neri tabe hakekikamu.

⁷I kamu hinea a domimiu rau tuku kwalao laliki, tulu tau savi na nomiu rongoana hati tiluna huri aia u domi hurikamu tigwaravu.

⁸Tulu likoki tulu tagahuri ne karea, huri a nomiu tavaluivuro, aia hi i Setano*, mo toko lakao laliki hoki na laeon hinea u marakatia mo toko ngara, u tuku soro haro kwara ne kania te katukwale.

⁹Tulu tu ne madi lo nomiu hauhuriana kwara tulu ne tu koroa, huri tulu kikilai kwara vataha na mahagweki lo varamana, i rabelamiu lui Kraes* vake rau hagwe na rongoana hati huri na hina i Jisas, hokinia hi i kamu tulu mo toko hagwea.

¹⁰Vae i God u tuku hago maikita tigwaravu kina nona domi tabetabe lakua, vake u kwarekamu kwara tulu ne bulu mai Kraes lo nona tokaana karea lolo taetae hinea nehe rovo lai tea. Tulu ne rongo hati lo tarabehimiu lo taro gwanugwanu, vae vaki takuni i God sibona neri vaikamu tulu mo bakoto vohoki. Ne vaikamu tulu ne huira, ne bete na huirana lakwakamu, ne rivukikamu hoki na beru hinea he kilu lai tea.

¹¹A huirana a nona savia, u hugwe koro na kinau doluaki vaki tuai a gwereki tikei. Io. Kareaki.

¹²A nogu leta gwanugwanu hikani i Saelas u ulia lakweau kwara na hokakinia vaki maikamu. I nau nu tagaia hokinia kwara aia i belada lui Kraes* hinea u karohuri, vae nu hauhuri lai luna. Nu lengaia kwara na rakati na domimiu kina leta hika. Vunu vake nu lengaia kwara na matangwasaraki na hala hinea i God mo hago maikita luna kina nona domi tabetabe lakua kwara u kareaki. Tulu tu ne madi luna.

¹³A kwarelua* lo gwatuivanua lakua Babilon [5] rau hokaki noga lagwaana lakwakamu. I God u mataira hokinia u mataikamu vae rau kwareki i ratuamiu. I natugu i Mak, aia vake u hokaki nona lagwaana lakwakamu.

¹⁴Tulu hahavakikamu kina boboniana [6] kwara tulu ne vosangi kwara tulu lagwalagwa maikamu huri tulu vituatua lui Kraes. A tangaroa karea hika lakwakamu. A magemuana ne eno maikamu doluaki hinea tulu kwareki a noi Kraes.